ئىزاھات

ھەمد «حمد» لۇغەتتە ماختىماق، مەدھىيەلىمەك، تەشەككۈر بىلدۈرمەك، ھەمدۇسانا ئېيتماق دېگەن مەنىلەردە كېلىدۇ. بۇ سۆزنىڭ بېشىدىكى ئەلىف لام «ال» بۇنىڭ ھەقىقىي تۈردىكىسىنى ئىپادىلەيدۇ. لىللاھ «لله»نىڭ بېشىدىكى لام (ل) بۇنىڭ ئاللاھقىلا ئېيتىلىدىغانلىقىنى كۆرسىتىدۇ. بۇلارغا ئاساسەن بۇ جۈملىنىڭ تەرجىمىسى: «ھەقىقىي ماختاشلار ۋە چىن مەدھىيەلەر پەقەت ئاللاھقىلا ئېيتىلىدۇ» دېگەن بولىدۇ. ئەسلىدە بۇ جۈملىنى ئوقۇغان كىشى ئاللاھ تائالاغا ئۆزى ھەمدۇسانا ئېيتقانلىقىنى ئىپادىلىگەن بولسىمۇ، لېكىن بۇ تەرجىمىدىن ئاللاھقا باشقىسىنىڭ ھەمدۇسانا ئېيتقانلىقىنى خەۋەر قىلغاندەك مەنىمۇ چىقىپ قالىدۇ. شۇڭا بۇ جۈملىگە «ئاللاھقا ھەمدۇسانالار بولسۇن!» دەپ مەنە تەرجىمىسى بېرىلدى. يەنى «پۈتۈن ياخشىلىقلارنى پەقەتلا ئاللاھ ئاتا قىلغان، ئاللاھنىڭ قۇدرىتى نېمىدېگەن ئۇلۇغ، مەرھەمىتى نېمىدېگەن كەڭ، بايلىقى نېمىدېگەن چەكسىز، پەزلى - ئېھسانى نېمىدېگەن ھېسابسىز! نېمەتلىرى نېمىدېگەن سان - ساناقسىز!» دېگەن بولۇپ، «ئاللاھقا ھەمدۇسانالار بولسۇن!» دېگەن كىشى ئاللاھنى ئەنە شۇ ھۆرمەت سۆزلىرى بىلەن ماختىغان بولىدۇ، ئاللاھقا مەدھىيە ئوقۇغان بولىدۇ.‏
2

Quran Uyghur Translation - www.uyquran.com - قۇرئان كەرىم ئۇيغۇرچە ئىزاھلىق تەرجىمىسى تور بىكىتى