ئىزاھات

«فەرج» لۇغەتتە: يوچۇق، يېرىق ۋە ئاراچ دېگەن مەنىلەردە كېلىدۇ. كۆچمە مەنىدە: ئەر - ئاياللارنىڭ ئۇياتلىق يەرلىرى (ئالدى - ئارقا تەرەت يوللىرى) ۋە ئۇ يەرلەرنىڭ ئەتراپى، ئىككى قولنىڭ ۋە ئىككى پۇتنىڭ ئارىلىرى ئۈچۈن ئىشلىتىدۇ (قاراڭ: خەلىل ئىبنى ئەھمەد، «فەرج»، 6: 109؛ ئەزھەرى، «فەرج»، 11: 32؛ ئىسفەھانى، «فەرج»، 628؛ ئىبنى مەنزۇر، «فەرج»، 2: 342). بۇ كەلىمە قۇرئان كەرىمدە 50 - سۈرىنىڭ 6 - ئايىتىدە لۇغەت مەنىسىدە، مۇناسىۋەتلىك باشقا ئايەتلەردە كۆچمە مەنىدە كەلگەن. شۇنىڭ ئۈچۈن بۇ كەلىمىگە 24 - سۈرە نۇر 30 ۋە31؛ 33 - سۈرە ئەھزاب، 35 ۋە 66 - سۈرە تەھرىم 12 - ئايەتلەردە «ئىپپەت»، بۇ ئايەت (23 - سۈرە مۇئمىنۇن، 5 - ئايەت) بىلەن 70 - سۈرە مەئارىجنىڭ 29 - ئايىتىدە ئۇياتلىق يەر ۋە ئۇنىڭ ئەتراپى دەپ مەنە بېرىلدى، چۈنكى «فەرج» كەلىمىسىگە «ئىپپەت» دەپ مەنە بېرىلگەن ئايەتلەردە ئەر - ئايال مۇئمىنلارنىڭ، «فەرج»لىرىنى نامەھرەمدىن ساقلىشى تەلەپ قىلىنىدۇ. «ئۇياتلىق يەرلىرى ۋە ئۇ يەرلەرنىڭ ئەتراپى» دەپ مەنە بېرىلگەن ئىككى ئايەتتە بولسا، ئەر - ئايال مۇئمىنلارنىڭ «فەرج»لىرىنى ئۆزلىرىنىڭ نارەسىدە بالىلىرى ۋە قول ئاستىدىكى قۇل - چۆرىلەردىن ساقلىمىسىمۇ بولىدىغانلىقى بايان قىلىنىدۇ. 24 - سۈرە نۇرنىڭ 58 - ئايىتىدە بامدات نامىزىدىن ئىلگىرى، خۇپتەن نامىزىدىن كېيىن ۋە چۈشتە دەم ئېلىش ۋاقتىدا نارەسىدە بالىلارنىڭ ئاتا - ئانىلىرىنىڭ يېنىغا ۋە قۇل - چۆرىلەرنىڭ ئۆز خوجايىنلىرىنىڭ يېنىغا ئىجازەتسىز كىرسە بولمايدىغانلىقى بايان قىلىنىدۇ. بۇ ھۆكۈمگە، ئۇ ۋاقىتلاردا ئۇلارنىڭ ئۇياتلىق يەرلىرىنىڭ ئېچىلىپ قېلىش ئېھتىماللىقى سەۋەب قىلىپ كۆرسىتىلىدۇ.
2

Quran Uyghur Translation - www.uyquran.com - قۇرئان كەرىم ئۇيغۇرچە ئىزاھلىق تەرجىمىسى تور بىكىتى