ئىزاھات

2 - سۈرە بەقەرەنىڭ 239 - ئايىتىدە قورققۇچىلارغا نامازلىرىنى پىيادە مېڭىۋېتىپ ياكى ئۇلاغ ئۈستىدە كېتىۋېتىپ ئۆتەشلىرىگە رۇخسەت بېرىلگەنلىكى بايان قىلىنىدۇ. بۇ ئايەتتە بولسا، پىيادە مېڭىۋېتىپ ياكى ئۇلاغ ئۈستىدە كېتىۋېتىپ ناماز ئۆتىمەكچى بولغانلارنىڭ چوڭ ياكى كىچىك تاھارىتى بولمىسا تەيەممۇم قىلىپ ناماز ئوقۇشلىرىغا رۇخسەت بېرىلگەنلىكى بايان قىلىنىدۇ. چۈنكى غۇسۇل چوڭ تاھارەتتۇر، چوڭ تاھارىتى بولمىغان كىشىلەرگە بۇ رۇخسەتنىڭ بېرىلىشى كىچىك تاھارىتى بولمىغانلارغىمۇ بۇ رۇخسەتنىڭ بېرىلگەنلىكىنى كۆرسىتىدۇ. بۇ يەردىكى «يولدىن ئۆتكۈچى» بىلەن «سەپەر ئۈستىدە بولغۇچى» پەرقلىق ئۇقۇملاردۇر. «يولدىن ئۆتكۈچى» سەپەر ئۈستىدە بولغانلارنى ۋە سەپەر ئۈستىدە بولماي ئۆزى ياشاۋاتقان رايونلاردا پىيادە يول مېڭىۋاتقانلار ياكى ئۇلاغ ئۈستىدە كېتىۋاتقانلارنى كۆرسىتىدۇ، لېكىن بۇ يەردە سەپەر ئۈستىدە بولغانلار ئايرىم زىكىر قىلىنغانلىقى ئۈچۈن «يولدىن ئۆتكۈچى» ئىپادىسى ئۆزىنىڭ ئىككىنچى مەنىسىنى يەنى سەپەر ھېسابلانمىغۇدەك مۇساپىدە مېڭىۋاتقانلارنى كۆرسىتىدۇ. «سەپەر ئۈستىدە بولۇش» بولسا، پەقەتلا مۇساپىرلارنى يەنى ئۇزۇن سەپەرگە چىققۇچىلارنى كۆرسىتىدۇ. شۇڭا بۇ ئايەتتىكى «يولدىن ئۆتكۈچى» دېگەن ئىپادە دالالەت قىلىدۇكى: تاھارىتى يوق ياكى غۇسۇل تاھارىتى يوق بىر كىشى مۇساپىر ھېسابلانغۇدەك سەپەردە ئەمەس، لېكىن شەھەر ئىچىدە كەنتلەر ئارىسىدا پىيادە مېڭىۋاتقان ياكى ئۇلاغ (قاتناش ۋاسىتىسى) ئۈستىدە كېتىۋاتقان چېغىدا بىرەر پەرز نامازنىڭ ۋاقتى كىرىپ قالسا ۋە ئۇ كىشى توختاپ ياكى ئۇلاغدىن چۈشۈپ ئۇ نامازنى ئۆتەش پۇرسىتىگە ئىگە بولمىسا، بۇ تەقدىردە ئۇ كىشى پىيادە مېڭىۋېتىپ ياكى ئۇلاغ ئۈستىدە كېتىۋېتىپ، تەيەممۇم قىلىپ نامىزىنى ئوقۇيدۇ.
23

Quran Uyghur Translation - www.uyquran.com - قۇرئان كەرىم ئۇيغۇرچە ئىزاھلىق تەرجىمىسى تور بىكىتى