ئۇيغۇرچە قۇرئان كەرىم توربىكىتى logo

بِسْمِ اللهِ الرَّحْمٰنِ الرَّحِيمِ‎

12-سۈرە يۈسۈف مەككەدە نازىل بولغان، 111 ئايەت

ئەلىف، لام، را. بۇلار روشەن كىتابنىڭ ئايەتلىرىدۇر.‏
1




شۈبھىسىزكى، بىز ئۇ كىتابنى ئەرەبچە قۇرئان قىلىپ نازىل قىلدۇق. ئەقلىڭلارنى ئىشلەتكەيسىلەر.‏
2




ئى مۇھەممەد! بىز ساڭا بۇ قۇرئاننى ۋەھىي قىلىش ئارقىلىق، ساڭا ئەڭ گۈزەل قىسسەنى بايان قىلىپ بېرىمىز. شۈبھىسىزكى، سەن بۇنىڭدىن ئىلگىرى ئۇ قىسسەدىن بىخەۋەر كىشىلەردىن ئىدىڭ.‏
3




ئۆز ۋاقتىدا يۇسۇف ئاتىسىغا: «ئى دادىكا! مەن چۈشۈمدە ئون بىر دانە يۇلتۇز، قۇياش ۋە ئاينى كۆردۈم. ئۇلارنى ماڭا سەجدە قىلىۋاتقان ھالەتتە كۆردۈم» دېگەن ئىدى،
4




ئاتىسى مۇنداق دېدى: «ئى ئوغۇلچىقىم! چۈشۈڭنى قېرىنداشلىرىڭغا ئېيتمىغىن. ئەگەر ئېيتساڭ ئۇلار ساڭا سۇيىقەست قىلىدۇ. شۈبھىسىزكى، شەيتان ئىنسانغا ئاشكارا دۈشمەندۇر.‏
5




چۈشۈڭدە كۆرگىنىڭدەك رەببىڭ سېنى تاللايدۇ، ساڭا چۈشلەرنىڭ تەبىرىدىن ئۆگىتىدۇ، بۇرۇن ئىككى ئاتاڭ ئىبراھىم ۋە ئىسھاققا نېمىتىنى تاماملىغاندەك، ساڭىمۇ ۋە يەئقۇبنىڭ ئەۋلادىغىمۇ نېمىتىنى تاماملايدۇ. شۈبھىسىزكى، رەببىڭ بىلگۈچىدۇر، ھېكمەت بىلەن ئىش قىلغۇچىدۇر».‏
6




شۈبھىسىزكى، يۇسۇف ۋە ئۇنىڭ قېرىنداشلىرىدا سورىغۇچىلار ئۈچۈن ئايەتلەر بار.‏
7




ئۆز ۋاقتىدا ئۇلار ئۆزئارا مۇنداق دېيىشكەن ئىدى: «شۈبھىسىزكى، يۇسۇف ۋە ئۇنىڭ قېرىندىشى ئاتىمىزغا بىزدىن بەك سۆيۈملۈكتۇر. ھالبۇكى، بىز كۈچلۈك جامائەمىز. شۈبھىسىزكى، ئاتىمىز ئوچۇق-ئاشكارا خاتالىق ئىچىدىدۇر.‏
8




يۇسۇفنى ئۆلتۈرۈۋېتىڭلار ياكى ئۇنى يىراق يەرگە تاشلىۋېتىڭلار، ئاتاڭلارنىڭ يۈزى سىلەرگە ئوڭچە قالسۇن[1]. ئۇنىڭدىن كېيىن تەۋبە قىلىپ ياخشى قەۋم بولىسىلەر».‏
9




ئۇلارنىڭ ئارىسىدىن سۆزى ئۆتىدىغان بىرى: «يۇسۇفنى ئۆلتۈرمەڭلار. ئۇنى قۇدۇقنىڭ تېگىگە تاشلىۋېتىڭلار، كارۋانلارنىڭ بەزىسى تېپىۋالسۇن. قىلساڭلار مۇشۇنداق قىلىڭلار» دېدى.‏
10




شۇنىڭ بىلەن ئۇلار ئاتىلىرىنىڭ يېنىغا كېلىپ مۇنداق دېدى: «ئى ئاتىمىز! ساڭا نېمە بولدىكىن، يۇسۇف توغرۇلۇق بىزگە ئىشەنمەيسەن؟ ھالبۇكى، بىز ئۇنىڭغا راستتىنلا كۆيۈنگۈچى كىشىلەرمىز.‏
11




ئەتە ئۇنى بىز بىلەن بىللە ئەۋەتكىن، يەپ-ئىچىپ يايرىسۇن، ئوينىسۇن. بىز ئۇنى چوقۇم قوغدايمىز».‏
12




ئۇلارنىڭ ئاتىسى: «ئۇنى ئېلىپ كەتسەڭلار خاتىرجەم بولالمايمەن. سىلەر ئۇنىڭدىن خەۋەرسىز قېلىپ، ئۇنى بۆرىنىڭ يەپ قويۇشىدىن قورقىمەن» دېدى.‏
13




ئۇلار: «بىز كۈچلۈك جامائە تۇرۇقلۇق ئۇنى بۆرە يەپ قويسا، ئۇ تەقدىردە بىز قولىدىن ھېچنېمە كەلمەيدىغان كىشىلەرمىز دېمەكتۇر» دېدى .‏
14




شۇنىڭ بىلەن ئۇلار ئەتىسى يۇسۇفنى ئېلىپ چىقىپ، ئۇنى قۇدۇقنىڭ تېگىگە تاشلىۋېتىشنى بىردەك قارار قىلىشقان چاغدا، بىز ئۇنىڭغا: «سەن كەلگۈسىدە ئۇلارغا بۇ قىلمىشلىرىنى چوقۇم خەۋەر قىلىسەن، ئۇلار ئۇ چاغدا سېنى ھېچ تونۇمايدۇ» دەپ ۋەھىي قىلدۇق.‏
15




ئۇلار ئاخشىمى ئاتىلىرىنىڭ يېنىغا يىغلاشقان ھالدا كېلىپ:‏
16




«ئى ئاتىمىز! بىز يۇسۇفنى نەرسە-كېرەكلىرىمىزنىڭ يېنىدا قويۇپ مۇسابىقىلەشكىلى كەتكەن ئىدۇق، ئۇ ئەسنادا ئۇنى بۆرە يەپ كېتىپتۇ! راست گەپ قىلساقمۇ سەن بىزگە ئىشەنمەيسەن» دېيىشتى.‏
17




ئۇلار يۇسۇفنىڭ كۆڭلىكىنىڭ ئۈستىدە يالغان قان ئېلىپ كەلگەن ئىدى. ئاتىلىرى ئۇلارغا: «ياق، نەپسىڭلار سىلەرنى بىر ئىشقا كۈشكۈرتۈپتۇ. چىرايلىقچە سەۋر قىلىمەن ۋە سىلەرنىڭ بۇ يالغان سۆزۈڭلارغا قارشى پەقەت ئاللاھتىنلا ياردەم تىلەيمەن» دېدى.‏
18




يۇسۇفنىڭ ئەھۋالىغا كەلسەك، ئۇ يەرگە بىر كارۋان كېلىپ سۇچىسىنى سۇغا ئەۋەتكەن ئىدى. سۇچى بېرىپ سوغىسىنى قۇدۇققا ساڭگىلاتتى ۋە: «خۇش خەۋەر! بۇ بىر ئوغۇل بالا!» دېدى. ئۇلار ئۇنى تىجارەت مېلى سۈپىتىدە سېتىش ئۈچۈن مەخپىي تۇتتى. ئاللاھ ئۇلارنىڭ قىلمىشلىرىنى بىلىپ تۇراتتى.‏
19




ئۇلار ئۇنى ئەرزان باھادا، بىر قانچە دىرھەمگە ساتتى. ئۇلار ئۇنىڭغا قىزىقمىغۇچىلاردىن ئىدى. ‏
20




ئۇنى سېتىۋالغان مىسىرلىق ئادەم ئايالىغا: «ئۇنى قەدىرلىگىن، ئوبدان باققىن! كەلگۈسىدە بىزگە ئەسقاتار ياكى ئۇنى بالا قىلىۋالارمىز» دېدى. بىز يۇسۇفنى ئۇ يەرگە ئەنە شۇنداق يەرلەشتۈردۇق. ئۇنىڭغا چۈشلەرنىڭ تەبىرىدىن ئۆگەتتۇق. ئاللاھ ئىرادىسىنى ئەمەلگە ئاشۇرۇشتا چوقۇم غالىبتۇر، لېكىن ئىنسانلارنىڭ تولىسى بىلمەيدۇ.‏
21




يۇسۇف قىرانلىق يېشىغا يەتكەندە، ئۇنىڭغا توغرا ھۆكۈم قىلىش قابىلىيىتى ۋە ئىلىم ئاتا قىلدۇق. بىز ياخشى ئىش قىلغۇچىلارنى ئاشۇنداق مۇكاپاتلايمىز.‏
22




يۇسۇف تۇرۇۋاتقان ئۆينىڭ ئىگىسى ئايال، يۇسۇفنىڭ كۆڭلىنى ئۆزىگە تارتىشقا ئۇرۇندى، ئىشىكلەرنى مەھكەم تاقىۋەتتى ۋە: «قېنى، كەلسەڭچۇ!» دېدى. يۇسۇف: «ئاللاھ ساقلىسۇن! شۈبھىسىزكى، ئۇ مېنىڭ خوجايىنىمدۇر، ئۇ مېنى ياخشى يەرگە ئورۇنلاشتۇردى. زالىملار ئەسلا مۇرادىغا يېتەلمەيدۇ» دېدى.‏
23




شۈبھىسىزكى، ئۇ ئايال يۇسۇفكە ھەۋەسلەندى، رەببىنىڭ ئوچۇق دەلىلىنى كۆرمىگەن بولسا يۇسۇفمۇ ئۇنىڭغا ھەۋەسلەنگەن بولاتتى. بىز يۇسۇفتىن يامانلىقنى ۋە پاھىشىنى ئۇزاقلاشتۇرۇش ئۈچۈن ئۇنىڭغا ئاشۇنداق دەلىل كۆرسەتتۇق. چۈنكى ئۇ تاللانغان بەندىلىرىمىزدىن ئىدى.‏
24




ئۇ ئەسنادا ئۇلارنىڭ ھەر ئىككىسى ئىشىككە قاراپ يۈگۈرۈشتى، ئايال يۇسۇفنىڭ كۆڭلىكىنى ئارقىدىن يىرتىۋەتتى ۋە ئىككىسى ئىشىكنىڭ ئالدىدا ئايالنىڭ خوجىسىنى ئۇچراتتى. ئايال دەرھال: «سېنىڭ ئەھلىڭنى ئاياغ ئاستى قىلماقچى بولغان كىشىنىڭ جازاسى نېمە؟ زىندانغا تاشلىنىش ياكى ئىسكەنجىگە ئېلىنىش ئەمەسمۇ؟» دېدى.‏
25




يۇسۇف: «ئۇ، كۆڭلۈمنى ئۆزىگە تارتىشقا ئۇرۇندى» دېدى. ئايالنىڭ ئائىلىسىدىن بىر گۇۋاھچى مۇنداق گۇۋاھلىق بەردى: «ئەگەر يۇسۇفنىڭ كۆڭلىكى ئالدىدىن يىرتىلغان بولسا خانىم توغرا سۆزلىگەن بولىدۇ، يۇسۇف يالغانچىلاردىن بولغان بولىدۇ.‏
26




ئەگەر يۇسۇفنىڭ كۆڭلىكى ئارقىدىن يىرتىلغان بولسا خانىم يالغان سۆزلىگەن بولىدۇ، يۇسۇف راستچىللاردىن بولغان بولىدۇ».‏
27




ئايالنىڭ ئېرى يۇسۇفنىڭ كۆڭلىكىنىڭ ئارقىدىن يىرتىلغانلىقىنى كۆرۈپ مۇنداق دېدى: «ئى ئاياللار! شۈبھىسىزكى، بۇ سىلەرنىڭ ھىيلەڭلەردىندۇر. سىلەرنىڭ ھىيلەڭلار ھەقىقەتەن چوڭدۇر.‏
28




يۇسۇف! سەن بۇ ئىشنى ھېچكىمگە تىنمىغىن. خوتۇن! سەن گۇناھىڭغا ئەپۇ تىلىگىن، چۈنكى سەن خاتالاشقۇچىلاردىن بولدۇڭ».‏
29




شەھەردە بەزى ئاياللار: «ئەزىز[2]نىڭ ئايالى ياش خىزمەتكارىنىڭ كۆڭلىنى ئۆزىگە تارتىشقا ئۇرۇنۇپتۇ! ئۇ ئايال ئۇنىڭغا كۆيۈپ قاپتۇ! بىزچە ئۇ خوتۇن ھەقىقەتەن ئېزىپتۇ!» دېيىشتى.‏
30




ئەزىزنىڭ ئايالى، ئۇ خوتۇنلارنىڭ بۇ سۆز-چۆچەكلىرىنى ئاڭلاپ، ئۇلارنى سارىيىغا چاقىرتتى. ئۇلار ئۈچۈن يۆلىنىپ ئولتۇرىدىغان يەرلەرنى تەييارلاتقۇزدى، ئالدىدا قويۇلغان مېۋىلەرنى سويۇپ يېسۇن دەپ ئۇلارنىڭ ھەربىرى ئۈچۈن بىردىن پىچاق بەرگۈزدى. ئۇلار مېۋىلىرىنى سويۇش بىلەن مەشغۇل بولۇۋاتقان ئەسنادا يۇسۇفكە: «شۇلارنىڭ ئالدىغا چىققىن!» دېدى. خوتۇنلار يۇسۇفنى كۆرۈپ ھاڭ-تاڭ بولۇپ قېلىشتى، ئۇنىڭ گۈزەللىكى بىلەن بولۇپ كېتىپ تۇيماستىن ئۆز قوللىرىنى كېسىۋېلىشتى ۋە: «ئاللاھ پاكتۇر. بۇ ئادەمزات ئەمەس. بۇ پەقەت ھۆرمەتلىك پەرىشتە!» دېيىشتى.‏
31




ئەزىزنىڭ ئايالى: «مانا بۇ ئۇ يىگىتتۇر، سىلەر مېنى بۇنىڭ ئۈچۈن ئەيىبلىدىڭلار. شۈبھىسىزكى، مەن بۇنىڭ كۆڭلىنى ئۆزۈمگە تارتىشقا ئۇرۇندۇم، لېكىن بۇ ئۆزىنى ساقلىدى. ئەگەر بۇ مېنىڭ بۇيرۇقۇمنى بۇنىڭدىن كېيىنمۇ ئىجرا قىلمىسا چوقۇم زىندانغا تاشلىنىدۇ ۋە چوقۇم خار ئادەملەردىن بولىدۇ» دېدى.‏
32




يۇسۇف: «رەببىم! ماڭا زىندان بۇلار مېنى دەۋەت قىلغان نەرسىدىن سۆيۈملۈكتۇر. ئەگەر بۇلارنىڭ ھىيلىسىنى مەندىن دەپئى قىلمىساڭ، بۇلارغا مايىل بولۇپ قالىمەن ۋە جاھىللاردىن[3] بولۇپ قالىمەن» دېدى.‏
33




رەببى ئۇنىڭ دۇئاسىنى ئىجابەت قىلىپ ئۇ خوتۇنلارنىڭ ھىيلىسىنى ئۇنىڭدىن دەپئى قىلدى. چۈنكى ئۇ ئاڭلاپ تۇرغۇچىدۇر، بىلىپ تۇرغۇچىدۇر.‏
34




ئاندىن ئەزىز ۋە ئۇنىڭ ئادەملىرى، يۇسۇفنىڭ گۇناھسىزلىقىغا دائىر دەلىللەرنى كۆرگەندىن كېيىن ئۇنى بىر مۇددەت قاماپ قويۇش ئويىغا كېلىشتى.‏
35




زىندانغا يۇسۇف بىلەن بىرلىكتە ئىككى يىگىتمۇ كىرگەن ئىدى. بۇلارنىڭ بىرى: «مەن ھاراق سىقىۋېتىپ چۈش كۆرۈۋاتىمەن» دېدى. يەنە بىرى: «مەن مۇنداق بىر چۈشنى كۆرۈۋاتىمەن: بېشىمنىڭ ئۈستىدە نان كۆتۈرۈۋاتقۇدەكمەن، قۇشلار ئۇ ناندىن يەۋاتقۇدەكمىش» دېدى. ئاندىن ئىككىسى: «ئى يۇسۇف! بىزگە بۇنىڭ تەبىرىنى ئېيتىپ بەرگىن. كۆرۈۋاتىمىزكى، سەن ھەقىقەتەن ياخشىلىق قىلغۇچىلاردىنسەن» دېدى.‏
36




يۇسۇف مۇنداق دېدى: «سىلەرگە بېرىلىدىغان تاماق يېنىڭلارغا كېلىشتىن ئىلگىرى، مەن چۈشۈڭلارنىڭ تەبىرىنى سىلەرگە ئېيتىپ بېرىمەن. بۇ رەببىم ماڭا ئۆگەتكەن ئىلىملەردىندۇر. چۈنكى مەن ئاللاھقا ئىشەنمەيدىغان، ئاخىرەتنى ئىنكار قىلىدىغان قەۋمنىڭ يولىنى تەرك ئەتتىم،
37




ئاتىلىرىم ئىبراھىم، ئىسھاق ۋە يەئقۇبنىڭ يولىغا ئەگەشتىم. ئاللاھقا بىرەر نەرسە شېرىك قىلىشىمىز بىز ئۈچۈن توغرا بولمايدۇ. بۇ ئېتىقاد ئاللاھنىڭ بىزگە ۋە ئىنسانلارغا قىلغان پەزلىدىندۇر. لېكىن ئىنسانلارنىڭ تولىسى شۈكۈر قىلمايدۇ.‏
38




ئى مەن بىلەن زىندانداش بولغان ئىككى ئاغىنەم! تارقاق بىرقانچە رەب ياخشىمۇ، ياكى چەكسىز قۇدرەتلىك، يالغۇز بىر ئاللاھ ياخشىمۇ؟‏
39




سىلەر ئۇنى قويۇپ پەقەت ئۆزۈڭلار ۋە ئاتا-بوۋىلىرىڭلار ئاتىۋالغان ئىسىملارغا ئىبادەت قىلىۋاتىسىلەر. ئاللاھ ئۇ ئىسىملارغا ئىبادەت قىلىنىشى توغرىسىدا ھېچقانداق دەلىل چۈشۈرمىگەن. ھۆكۈم قىلىش ھوقۇقى پەقەتلا ئاللاھنىڭدۇر. ئاللاھ سىلەرنى پەقەت ئۆزىگىلا ئىبادەت قىلىشقا بۇيرۇدى. مانا بۇ توغرا دىندۇر. لېكىن ئىنسانلارنىڭ تولىسى بىلمەيدۇ.‏
40




ئى مەن بىلەن زىندانداش بولغان ئىككى ئاغىنەم! چۈشلىرىڭلارغا كەلسەك، ئىككىڭلاردىن بىرى خوجايىنىغا ھاراق سۇنىدۇ. يەنە بىرى دارغا ئېسىلىدۇ، قۇشلار ئۇنىڭ بېشىدىن يەيدۇ. سىلەر تەبىرىنى سورىغان چۈشلەر بىلەن مۇناسىۋەتلىك ئىش چوقۇم بۇ شەكىلدە ئەمەلگە ئاشىدۇ».‏
41




يۇسۇف ئۇ ئىككىسىدىن، قۇتۇلىدىغانلىقىنى بىلگەن ئاغىنىسىگە: «خوجايىنىڭنىڭ يېنىدا مەن توغرۇلۇق گەپ قىلىپ قويغىن» دېدى. لېكىن شەيتان ئۇ كىشىگە يۇسۇف توغرۇلۇق خوجايىنىغا گەپ قىلىشنى ئۇنتۇلدۇردى. شۇنىڭ بىلەن يۇسۇف زىنداندا بىرقانچە يىل يېتىپ قالدى.‏
42




بىر كۈنى پادىشاھ مۇنداق دېدى: «مەن چۈشۈمدە يەتتە دانە سېمىز كالا كۆرۈۋاتىمەن. ئۇلارنى يەتتە دانە ئورۇق كالا يەۋاتقۇدەك. يەتتە دانە يېشىل باشاق بىلەن باشقا قۇرۇق باشاقلارنىمۇ كۆرۈپتىمەن. ئى جانابلار! ئەگەر چۈشكە تەبىر بېرىدىغان بولساڭلار، ماڭا بۇ چۈشۈمنىڭ تەبىرىنى بايان قىلىپ بېرىڭلار».‏
43




ئۇلار: «بۇ قالايمىقان چۈشلەردۇر. بىز بۇنداق چۈشلەرنىڭ تەبىرىنى بىلىدىغان كىشىلەر ئەمەسمىز» دېدى.‏
44




يۇسۇفنىڭ ھېلىقى ئىككى ئاغىنىسىدىن، قۇتۇلغىنى ئۇزۇن مۇددەتتىن كېيىن يۇسۇفنى ئەسلىدى ۋە: «مەن سىلەرگە بۇ چۈشنىڭ تەبىرىنى ئېيتىپ بېرىمەن. مېنى دەرھال زىندانغا ئەۋەتىڭلار» دېدى.‏
45




شۇنىڭ بىلەن ئۇلار بۇ كىشىنى زىندانغا ئەۋەتتى. بۇ كىشى زىندانغا بېرىپ: «يۇسۇف! ئى راستچىل كىشى! بىزگە يەتتە دانە ئورۇق كالا يەۋاتقان يەتتە دانە سېمىز كالىنى ۋە يەتتە دانە يېشىل باشاق بىلەن باشقا قۇرۇق باشاقلارنى كۆرۈپ چۈشىگەن چۈشنىڭ تەبىرىنى بايان قىلىپ بەرگىن. ئۈمىد قىلىمەنكى، توغرا تەبىرىڭنى ئاڭلاپ مۇناسىۋەتلىك كىشىلەرگە يەتكۈزىمەن، ئۇلارمۇ ھەقىقەتنى چۈشىنىپ سېنىڭ قەدىرىڭنى بىلەر» دېدى.‏
46




يۇسۇف مۇنداق دېدى: «يەتتە يىل ئادىتىڭلار بويىچە تېرىقچىلىق قىلىسىلەر. يىغقان ھوسۇلۇڭلارنى باشاق پېتى قويۇڭلار، لېكىن ئۆزۈڭلار يەيدىغان ئازغىنىسىنى ئۇنداق قويمىساڭلارمۇ بولىدۇ.‏
47




ئاندىن كېيىن قەھەتچىلىك بولىدىغان يەتتە يىل كېلىدۇ. بۇ يەتتە يىل ئىچىدە، ئىلگىرى ساقلىۋالغان ئاشلىقىڭلارنى يەپ تۈگىتىسىلەر. ئايرىپ قويىدىغان ئازغىنە ئۇرۇقلۇقۇڭلار بۇنىڭدىن مۇستەسنا.‏
48




ئاندىن كېيىن ئىنسانلار يامغۇرغا ئېرىشىدىغان يىل كېلىدۇ. ئۇلار ئۇ يىلدا مېۋە سۇلىرى ۋە ياغلارنى سىقىدۇ، ھايۋانلارنى ساغىدۇ».‏
49




پادىشاھ بۇنى ئاڭلاپ: «ئۇنى يېنىمغا كەلتۈرۈڭلار!» دېدى. پادىشاھنىڭ ئەلچىسى يۇسۇفنىڭ يېنىغا كەلگەن ئىدى، يۇسۇف ئەلچىگە: «خوجايىنىڭنىڭ يېنىغا قايتىپ بېرىپ ئۇنىڭدىن، قوللىرىنى كېسىۋالغان ھېلىقى خوتۇنلارنىڭ ئەھۋالىنى سورىغىن. شۈبھىسىزكى، رەببىم ئۇ خوتۇنلارنىڭ ھىيلىسىنى بىلىپ تۇرغۇچىدۇر» دېدى.‏
50




پادىشاھ ئۇ خوتۇنلارنى يىغىپ: «يۇسۇفنىڭ كۆڭلىنى ئۆزۈڭلارغا تارتىشقا ئۇرۇنغان چېغىڭلاردا نېمە ئىش بولغان؟» دېدى. ئۇلار: «ئاللاھ پاكتۇر. بىز ئۇنىڭدا ھېچ يامانلىق بىلمىدۇق» دېدى. ئەزىزنىڭ ئايالى بولسا: «ئەمدى ھەقىقەت ئايدىڭلاشتى. مەن ئۇنىڭ كۆڭلىنى ئۆزۈمگە تارتىشقا ئۇرۇنغان ئىدىم. شۈبھىسىزكى، ئۇ راستچىللاردىن ئىدى» دېدى.‏
51




يۇسۇف مۇنداق دېدى: «زىنداندىن ئالدىراپ چىقماسلىقىم ئەزىزنىڭ شۇنى بىلىشى ئۈچۈنكى: مەن ئۇنىڭغا يوق چېغىدا خىيانەت قىلمىدىم، ئاللاھ خائىنلارنىڭ ھىيلىسىنى مۇۋەپپەقىيەتكە ئېرىشتۈرمەيدۇ.‏
52




مەن ئۆز نەپسىمنى ئاقلىمايمەن. چۈنكى نەپسلەر يامانلىققا بۇيرۇپ تۇرغۇچىدۇر. رەببىم رەھىم قىلغانلىرى بۇنىڭدىن مۇستەسنا. شۈبھىسىزكى، رەببىم مەغپىرەت قىلغۇچىدۇر، كۆپ ئىنئام قىلغۇچىدۇر».‏
53




پادىشاھ: «ئۇنى يېنىمغا كەلتۈرۈڭلار، خاس ئادىمىم قىلىمەن» دېدى. ئاندىن پادىشاھ يۇسۇف بىلەن سۆزلەشكەندە ئۇنىڭغا: «شۈبھىسىزكى، سەن بۈگۈن يېنىمىزدا يۇقىرى مەرتىۋىلىك ۋە ئىشەنچلىك ئادەمسەن» دېدى.‏
54




يۇسۇف: «مېنى مەملىكەتنىڭ خەزىنىلىرىنى باشقۇرۇش ۋەزىپىسىگە تەيىنلىگىن. چۈنكى مەن ئۇلارنى ئوبدان ساقلايدىغان ۋە ئۇلارنى باشقۇرۇشنى ئوبدان بىلىدىغان ئادەممەن» دېدى. ‏
55




شۇنىڭدەك، بىز يۇسۇفكە ئۇ مەملىكەتنىڭ ئىشلىرىنى باشقۇرۇش ھوقۇقىنى بەردۇق. ئۇ مەملىكەتنى خالىغانچە تەسەررۇپ قىلاتتى[4]. بىز رەھمىتىمىزنى ئۆزىمىز خالىغان كىشىگە يەتكۈزىمىز ۋە ياخشىلىق قىلغۇچىلارنىڭ ئەجرىنى زايە قىلىۋەتمەيمىز.‏
56




ئاخىرەتتىكى ئەجىر، ئىمان ئېيتقان ۋە تەقۋادارلىق قىلغانلار ئۈچۈن ئەلۋەتتە ياخشىدۇر.‏
57




يۇسۇفنىڭ قېرىنداشلىرى كېلىپ يۇسۇفنىڭ ھۇزۇرىغا كىردى. يۇسۇف ئۇلارنى تونۇدى، ئۇلار يۇسۇفنى تونۇمىدى.‏
58




يۇسۇف ئۇلارغا يۈكلىرىنى يۈكلەتكۈزۈپ بەرگەندىن كېيىن مۇنداق دېدى: «كېلەر قېتىم يېنىمغا ئاتا بىر قېرىندىشىڭلارنىمۇ ئېلىپ كېلىڭلار. كۆرمەيۋاتامسىلەر؟ مەن ئاشلىقنى تولۇق كەمچەنلەپ بېرىمەن، مەن مېھمان قىلغۇچىلارنىڭ ئەڭ ياخشىسىمەن.‏
59




ئەگەر ئۇنى يېنىمغا ئېلىپ كەلمىسەڭلار، مەندىن بىر كەمچەنمۇ ئاشلىق ئالالمايسىلەر، يېنىمغا يېقىنلاشماڭلار!».‏
60




ئۇلار: «بىز ئۇنى ئېلىپ كېلىش ئۈچۈن ئاتىسىنى قايىل قىلىشقا تىرىشىمىز. بىز بۇ ئىشنى چوقۇم قىلىمىز» دېيىشتى.‏
61




يۇسۇف خىزمەتچىلىرىگە: «ئۇلارنىڭ ئاشلىق سېتىۋالغان سەرمايىلىرىنى يۈكلىرىنىڭ ئارىسىغا سېلىپ قويۇڭلار، ئائىلىسىنىڭ يېنىغا قايتىپ بارغان چېغىدا بۇنى تونۇپ يەنە كېلىشلىرى مۇمكىن» دېدى.‏
62




شۇنىڭ بىلەن ئۇلار ئاتىسىنىڭ يېنىغا كەلگەندە: «ئى ئاتىمىز! ئاشلىق ئېلىشىمىز مەنئى قىلىندى. بۇ نۆۋەت قېرىندىشىمىزنى بىز بىلەن بىللە ئەۋەتكىن، شۇنداق قىلساڭ ئاشلىق ئالالايمىز. بىز ئۇنى چوقۇم مۇھاپىزەت قىلىمىز» دېدى.‏
63




ئاتىسى ئۇلارغا: «مەن سىلەرگە بۇنىڭ توغرىسىدا قانداقمۇ ئىشىنىمەن؟ ئىلگىرى سىلەرگە بۇنىڭ قېرىندىشى توغرىسىدا ئىشەنگىنىمدەكمۇ؟ ئاللاھ ئەڭ ياخشى ساقلىغۇچىدۇر. ئۇ رەھىم قىلغۇچىلارنىڭ ئەڭ رەھىم قىلغۇچىسىدۇر!» دېدى.‏
64




ئۇلار يۈكلىرىنى ئاچقان ئىدى، ئاشلىق سېتىۋالغان سەرمايىلىرىنىڭ ئۆزلىرىگە قايتۇرۇپ بېرىلگەنلىكىنى كۆردى ۋە دېدىلەركى: «ئى ئاتىمىز! يەنە نېمە تەلەپ قىلىمىز؟ مانا بۇ ئاشلىق سېتىۋالغان سەرمايىمىز، بىزگە قايتۇرۇپ بېرىلىپتۇ! ئائىلىمىزگە ئاشلىق ئېلىپ كېلىمىز، قېرىندىشىمىزنى مۇھاپىزەت قىلىمىز ۋە بىر تۆگە ئاشلىق ئارتۇق ئالىمىز. چۈنكى بۇ قېتىم ئېلىپ كەلگىنىمىز ئازغىنە ئاشلىقتۇر».‏
65




ئاتىسى: «ئۇنى ماڭا ئېلىپ كېلىدىغانلىقىڭلارغا ئاللاھنىڭ نامى بىلەن مۇستەھكەم ئەھدە بەرمىگۈچە، ئۇنى سىلەر بىلەن ھەرگىزمۇ ئەۋەتمەيمەن. ھەممىڭلار بىرلىكتە ھالاك بولۇپ كەتسەڭلار ئامال يوق» دېدى. ئۇلار ئاتىسىغا ئاللاھنىڭ نامى بىلەن مۇستەھكەم ئەھدە بەرگەن ئىدى، ئاتىسى: «ئاللاھ ئېيتقان سۆزلىرىمىزگە گۇۋاھتۇر» دېدى.‏
66




ئۇ يەنە: «ئى ئوغۇللىرىم! شەھەرگە ھەممىڭلار بىر دەرۋازىدىن كىرمەي، باشقا-باشقا دەرۋازىلاردىن كىرىڭلار. مەن ئاللاھتىن كېلىدىغان ھېچ نەرسىنى سىلەردىن دەپئى قىلالمايمەن. ھۆكۈم پەقەتلا ئاللاھنىڭدۇر[5]. مەن ئاللاھقىلا تەۋەككۈل قىلدىم. تەۋەككۈل قىلغۇچىلارمۇ ئاللاھقىلا تەۋەككۈل قىلسۇن» دېدى.‏
67




ئۇلار شەھەرگە ئاتىسى بۇيرۇغان يەردىن كىرگەندە بۇ، ئاللاھتىن كېلىدىغان ھېچ نەرسىنى ئۇلاردىن دەپئى قىلالمايتتى. لېكىن يەئقۇب، كۆڭلىدىكى ئارزۇنى ئوتتۇرىغا قويغان بولدى. ئۇ ھەقىقەتەن ئىلىم ئىگىسى ئىدى، چۈنكى ئۇنىڭغا بىز ئۆگەتكەن ئىدۇق. لېكىن ئىنسانلارنىڭ تولىسى بىلمەيدۇ.‏
68




ئۇلار يۇسۇفنىڭ يېنىغا كىرگەندە، يۇسۇف ئۆز قېرىندىشىنى باغرىغا باستى ۋە: «مەن راستتىنلا سېنىڭ قېرىندىشىڭمەن. ئۇلارنىڭ قىلمىشلىرىغا ئىچىڭنى پۇشۇرمىغىن!» دېدى.‏
69




يۇسۇف ئۇلارنىڭ يۈكلىرىنى تەييارلاتقاندا سۇ قاچىسىنى قېرىندىشىنىڭ يۈكىنىڭ ئىچىگە قويدۇردى. ئاندىن كېيىن بىر جاكارچى: «ئى كارۋان! سىلەر ھەقىقەتەن ئوغرى ئىكەنسىلەر!» دەپ توۋلىدى.‏
70




ئۇلار بۇلارغا قاراپ: «نېمەڭلارنى يوقىتىپ قويدۇڭلار؟» دېدى.‏
71




بۇلار: «پادىشاھنىڭ قاچىسىنى يوقىتىپ قويدۇق، ئۇنى ئېلىپ كەلگەن كىشىگە بىر تۆگە يۈك مۇكاپات بېرىلىدۇ» دېدى. ئۇلارنىڭ ئىچىدىن بىرى: «مەن بۇنىڭغا كېپىل» دېدى.‏
72




ئۇلار: «ئاللاھ بىلەن قەسەمكى، سىلەر ئوبدان بىلىسىلەر، بىز بۇ يەرگە بۇزغۇنچىلىق قىلغىلى كەلمىدۇق، بىز ئوغرىمۇ ئەمەس» دېدى.‏
73




بۇلار: «ئەگەر سىلەر يالغان ئېيتقۇچىلار بولساڭلار، يەنى ئۇنى ئوغرىلىغان كىشى سىلەردىن چىقىپ قالسا، ئۇنىڭ جازاسى نېمە؟» دېدى.‏
74




ئۇلار: «جازاسى شۇ: قاچا كىمنىڭ يۈكىدىن تېپىلسا، ئۇ كىشى ئۇنىڭ جازاسىدۇر. بىز بۇ جىنايەتنى ئۆتكۈزگەن زالىملارغا مۇشۇنداق جازا بېرىمىز[6]» دېدى.‏
75




شۇنىڭ بىلەن يۇسۇف قېرىندىشىنىڭ يۈكىدىن ئىلگىرى، ئۇلارنىڭ يۈكلىرىنى تەكشۈرۈشكە باشلىدى، ئاخىرىدا قاچىنى قېرىندىشىنىڭ يۈكىدىن تېپىپ چىقاردى. بىز يۇسۇفكە ئەنە شۇنداق پىلان كۆرسەتتۇق. ئاللاھ مۇشۇنداق خالىمىسا ئىدى، يۇسۇف قېرىندىشىنى پادىشاھنىڭ دىنى بويىچە ئېلىپ قالالمايتتى[7]. بىز ئۆزىمىز خالىغان كىشىنى يۇقىرى دەرىجىلەرگە كۆتۈرىمىز. ھەر بىلىمدارنىڭ ئۈستىدە تېخىمۇ ئوبدان بىلىدىغان بىرى بار.‏
76




ئۇلار: «بۇ ئوغرىلىغان بولسا، ئىلگىرى بۇنىڭ قېرىندىشىمۇ ئوغرىلىق قىلغان» دېيىشتى. يۇسۇف بۇنى ئىچىدە يوشۇردى[8]، ئۇلارغا مەلۇم قىلمىدى، ئىچىدە «سىلەرنىڭ ئورنۇڭلار بەك يامان![9] بۇ سۆزلىرىڭلارنىڭ ماھىيىتىنى ئاللاھ ئوبدان بىلىدۇ» دېدى.‏
77




ئۇلار: «ئى ئەزىز! بۇنىڭ بەك قېرىپ كەتكەن ئاتىسى بار، شۇڭا بۇنىڭ ئورنىغا بىرىمىزنى ئېلىپ قالغىن. كۆرۈۋاتىمىزكى، سەن ھەقىقەتەن ياخشىلىق قىلغۇچىلاردىنسەن!» دېدى.‏
78




يۇسۇف: «ئاللاھ ساقلىسۇن! بىز نەرسىمىزنى كىمنىڭ يۈكىدىن تاپقان بولساق، پەقەت شۇنى ئېلىپ قالىمىز. بولمىسا بىز زالىم بولۇپ قالىمىز» دېدى.‏
79




ئۇلار تەلەپلىرىنى يۇسۇفنىڭ قوبۇل قىلىشىدىن ئۈمىدلىرىنى ئۈزگەندە، ئۆزئارا مەسلىھەتلىشىش ئۈچۈن ئايرىم بىر تەرەپكە بېرىشتى. ئۇلارنىڭ چوڭى مۇنداق دېدى: «ئاتاڭلارنىڭ سىلەردىن ئاللاھنىڭ نامى بىلەن مۇستەھكەم ئەھدە ئالغانلىقىنى ۋە بۇنىڭدىن ئىلگىرى يۇسۇفكە قىلغان ئەسكىلىكىڭلارنى بىلمەمسىلەر؟ شۇنىڭ ئۈچۈن مەن ئاتامنىڭ رۇخسىتى ياكى ئاللاھنىڭ ھۆكمى كەلمىگۈچە بۇ يەردىن ھەرگىز ئايرىلمايمەن. ئاللاھ ئەڭ ياخشى ھۆكۈم قىلغۇچىدۇر.‏
80




ئاتاڭلارنىڭ يېنىغا قايتىپ بېرىپ مۇنداق دەڭلار: ئى ئاتىمىز! شۈبھىسىزكى، ئوغلىڭىز ئوغرىلىق قىلدى. بىز پەقەت بىلگىنىمىزگە گۇۋاھ بولدۇق. بىز غەيبنى بىلمەيتتۇق[10].‏
81




بىز تۇرغان ئۇ شەھەرنىڭ ئاھالىسىدىن ۋە بىز بىلەن بىللە كەلگەن كارۋاندىن سوراپ بېقىڭ. بىز ھەقىقەتەن راست سۆزلەۋاتىمىز».‏
82




ئۇلار ئاتىسىنىڭ يېنىغا قايتىپ كېلىپ، ئاكىسى دېگەن سۆزلەرنى ئۇنىڭغا ئېيتقان ئىدى ئۇ: «ياق، يەنە نەپسىڭلار سىلەرنى بىر ئىشقا كۈشكۈرتۈپتۇ. ئەمدى مەن چىرايلىقچە سەۋر قىلىشىم كېرەك. ئۈمىد قىلىمەنكى، ئاللاھ ئۇلارنىڭ ھەممىسىنى يېنىمغا كەلتۈرۈپ بېرىدۇ. شۈبھىسىزكى، ئۇ بىلىپ تۇرغۇچىدۇر، ھېكمەت بىلەن ئىش قىلغۇچىدۇر» دېدى،‏
83




ئۇلاردىن يۈز ئۆرۈدى، «ئى مېنىڭ يۇسۇفكە چەككەن قاتتىق ھەسرىتىم!»[11] دەپ پەرياد قىلدى ۋە قايغۇدىن ئىككى كۆزى ئاقىرىپ كەتتى. ئۇ بۇنىڭ بىلەن بىرلىكتە دەردىنى يۇتاتتى.‏
84




ئۇلار: «ئاللاھ بىلەن قەسەمكى، سەن يۇسۇفنى ياد ئېتىۋېرىپ ئاخىرى يا بەكلا ئاجىزلاپ كېتىسەن ياكى ھالاك بولغۇچىلاردىن بولۇپ كېتىسەن» دېدى.‏
85




ئۇ مۇنداق دېدى: «مەن چىدىغۇسىز ئەلىمىمنى ۋە قايغۇ- ھەسرىتىمنى ئاللاھقىلا ئېيتىمەن، ئاللاھ تەرىپىدىن سىلەر بىلمەيدىغان نەرسىلەرنى بىلىمەن.‏
86




ئى ئوغۇللىرىم! بېرىڭلار، يۇسۇفنى ۋە قېرىندىشىنى ئىزدەڭلار، ئاللاھنىڭ رەھمىتىدىن نائۈمىد بولماڭلار. شۈبھىسىزكى، ئاللاھنىڭ رەھمىتىدىن پەقەت كافىر قەۋملا نائۈمىد بولىدۇ».‏
87




شۇنىڭ بىلەن ئۇلار مىسىرغا قايتىپ بېرىپ يۇسۇفنىڭ ھۇزۇرىغا كىرگەن چېغىدا: «ئى ئەزىز! بىز ۋە ئائىلىمىز يەنە قىيىنچىلىقتا قالدۇق. بۇ قېتىم ئەرزىمەس سەرمايە ئېلىپ كەلدۇق. لېكىن سەن بىزگە ئاشلىقنى يەنىلا تولۇق بەرگىن ۋە بىزگە سەدىقە قىلغىن. شۈبھىسىزكى، ئاللاھ سەدىقە قىلغۇچىلارنى مۇكاپاتلايدۇ» دېدى.‏
88




يۇسۇف: «سىلەر نادان چېغىڭلاردا يۇسۇفكە ۋە ئۇنىڭ قېرىندىشىغا نېمىلەرنى قىلغانلىقىڭلارنى بىلەمسىلەر؟»[12] دېدى.‏
89




ئۇلار: «سەن، سەن راستىنلا يۇسۇفمۇ؟» دېدى. يۇسۇف: «ھەئە مەن يۇسۇف، بۇ بولسا قېرىندىشىم. ئاللاھ بىزگە ھەقىقەتەن ياخشىلىق قىلدى. چۈنكى كىم تەقۋادارلىق قىلسا ۋە سەۋر قىلسا، ئاللاھ بۇنداق ياخشى ئىش قىلغانلارنىڭ ئەجرىنى ھەرگىزمۇ زايە قىلىۋەتمەيدۇ» دېدى.‏
90




ئۇلار: «ئاللاھ بىلەن قەسەمكى، ئاللاھ سېنى بىزدىن ئۈستۈن قىلدى. بىز خاتالىق ئۆتكۈزگەن ئىدۇق» دېدى.‏
91




يۇسۇف مۇنداق دېدى: «بۈگۈن ھېچ ئەيىبلەنمەيسىلەر، ئاللاھ سىلەرنى كەچۈرسۇن! ئۇ رەھىم قىلغۇچىلارنىڭ ئەڭ رەھىم قىلغۇچىسىدۇر.‏
92




مېنىڭ بۇ كۆڭلىكىمنى ئېلىپ بېرىپ ئاتامنىڭ يۈزىگە تاشلاڭلار، كۆزلىرى كۆرىدىغان بولىدۇ. ئاندىن پۈتۈن ئائىلەڭلارنى ئېلىپ يېنىمغا كېلىڭلار».‏
93




كارۋان مىسىردىن ئايرىلغان چاغدا، ئۇلارنىڭ ئاتىسى يېنىدىكىلەرگە: «شۈبھىسىزكى، مەن يۇسۇفنىڭ ھىدىنى ئېلىۋاتىمەن. مېنى ئالجىپ قالدى دېمىگەيسىلەر!» دېدى.‏
94




يېنىدىكىلەر: «ئاللاھ بىلەن قەسەمكى، سەن يەنىلا بۇرۇنقىدەك تېنەۋاتىسەن» دېدى.‏
95




ئاندىن خۇش خەۋەرچى كېلىپ كۆڭلەكنى يەئقۇبنىڭ يۈزىگە تاشلىغان ئىدى، ئۇنىڭ كۆزلىرى قايتا كۆرىدىغان بولدى، دېدىكى: «مەن سىلەرگە: ‹مەن ئاللاھ تەرىپىدىن سىلەر بىلمەيدىغان نەرسىلەرنى بىلىمەن› دېمىگەنمۇ؟».‏
96




ئۇلار: «ئى ئاتىمىز! گۇناھلىرىمىزنىڭ مەغپىرەت قىلىنىشىنى تىلىگىن. بىز ھەقىقەتەن خاتالىق ئۆتكۈزدۇق» دېدى.‏
97




يەئقۇب: «سىلەر ئۈچۈن رەببىمدىن مەغپىرەت تىلەيمەن. شۈبھىسىزكى، ئۇ مەغپىرەت قىلغۇچىدۇر، كۆپ ئىنئام قىلغۇچىدۇر» دېدى.‏
98




ئاندىن ئۇلار ھەممىسى بىرلىكتە يۇسۇفنىڭ ھۇزۇرىغا كىرگەن چاغدا، يۇسۇف ئاتا-ئانىسىنى باغرىغا باستى، «ئاللاھ خالىسا مىسىرغا خاتىرجەملىك ئىچىدە كىرىڭلار» دېدى،
99




ئاتا-ئانىسىنى تەختىگە چىقاردى، ئۇلار ئۇنىڭ ئالدىدا سەجدە قىلىشتى. بۇ چاغدا يۇسۇف مۇنداق دېدى: «ئى دادىكا! مانا بۇ ئىلگىرى كۆرگەن چۈشۈمنىڭ تەبىرىدۇر، رەببىم ئۇنى ئەمەلگە ئاشۇردى. رەببىم ماڭا ھەقىقەتەن ياخشىلىق قىلدى: مېنى زىنداندىن چىقاردى ۋە شەيتان مەن بىلەن قېرىنداشلىرىمنىڭ ئارىسىنى بۇزغاندىن كېيىن سىلەرنى سەھرادىن بۇ يەرگە كەلتۈردى. شۈبھىسىزكى، رەببىم خالىغىنىنى ناھايىتى ئىنچىكە ئورۇنلاشتۇرغۇچىدۇر. چۈنكى ئۇ بىلىپ تۇرغۇچىدۇر، ھېكمەت بىلەن ئىش قىلغۇچىدۇر.‏
100




رەببىم! سەن ماڭا پادىشاھلىقتىن نېسىۋە ئاتا قىلدىڭ ۋە ماڭا چۈش تەبىرىدىن ئۆگەتتىڭ. ئى ئاسمانلارنىڭ ۋە زېمىننىڭ ياراتقۇچىسى! سەن مېنىڭ بۇ دۇنيادا ۋە ئاخىرەتتە ۋەلىيىمسەن![13] مېنى مۇسۇلمان ھالىتىمدە ۋاپات قىلدۇرغىن، مېنى ياخشىلارنىڭ قاتارىدا قىلغىن!».‏
101




ئى مۇھەممەد! ئەنە شۇ قىسسە غەيىب خەۋەرلىرىدىندۇر. ئۇنى ساڭا بىز ۋەھىي قىلىۋاتىمىز. بولمىسا، ئۇلار سۇيىقەست قىلىش ئۈچۈن بىر قارارغا كېلىشكەندە سەن ئۇلارنىڭ يېنىدا ئەمەس ئىدىڭ.‏
102




ئىنسانلارنىڭ تولىسى- سەن ھېرىس بولساڭمۇ- ئىمان ئېيتمايدۇ.‏
103




بولمىسا سەن بۇ تەبلىغ ئۈچۈن ئۇلاردىن ھېچقانداق ئەجىر تەلەپ قىلمايسەن. بۇ قۇرئان ئالەملەر ئۈچۈن پەقەتلا زىكىردۇر[14].‏
104




ئاسمانلاردا ۋە زېمىندا نۇرغۇن ئايەتلەر بار. ئۇلار ئۇ ئايەتلەردىن يۈز ئۆرۈپ ئۆتۈپ كېتىدۇ.‏
105




ئۇلارنىڭ تولىسى شېرىك كەلتۈرمەستىن ئاللاھقا ئىمان ئېيتمايدۇ.‏
106




ئۇلار ئاللاھنىڭ ئازابىدىن زور بالانىڭ ئۆزلىرىگە كېلىشىدىن ياكى تۇيماي قالغان چاغلىرىدا ئۆزلىرىگە قىيامەتنىڭ تۇيۇقسىزلا كېلىشىدىن قورقمامدۇ؟‏
107




ئى مۇھەممەد! ئېيتقىنكى: «مېنىڭ يولۇم شۇ: مەن ئاللاھقا روشەن دەلىل بىلەن دەۋەت قىلىمەن. ماڭا ئەگەشكەنلەرمۇ شۇنداق قىلىدۇ. ئاللاھنى ھەرقانداق كەمچىلىكىتن پاك دەپ تونۇيمەن، مەن مۇشرىكلاردىن ئەمەسمەن».‏
108




سەندىن ئىلگىرىمۇ، يۇرتلارنىڭ ئاھالىلىرىدىن بىز ۋەھىي قىلغان ئەرلەردىن باشقىسىنى ئەلچى قىلىپ ئەۋەتمىدۇق. ئىنكارچىلار يەر يۈزىدە سەير قىلىپ ئۆزلىرىدىن بۇرۇنقىلارنىڭ ئاقىۋىتىنىڭ قانداق بولغانلىقىنى كۆرمىدىمۇ؟ تەقۋادارلىق قىلغانلار ئۈچۈن ئاخىرەت يۇرتى ئەلۋەتتە ياخشىدۇر. يەنىلا ئەقلىڭلارنى ئىشلەتمەمسىلەر؟
109




ئاخىرى ئەلچىلىرىمىز نائۈمىد بولۇپ ئۆزلىرىنىڭ يالغانچىلىققا چىقىرىلغانلىقىنى ئويلاۋاتقان ئەسنادا ئۇلارغا نۇسرىتىمىز كەلدى. بىز خالىغان كىشى قۇتقۇزۇلدى. بىزنىڭ شىددەتلىك ئازابىمىز گۇناھكار قەۋمدىن قايتۇرۇلمايدۇ.‏
110




شۈبھىسىزكى، ئۇلارنىڭ قىسسەسىدە ساغلام ئەقىل ئىگىلىرى ئۈچۈن ئىبرەت بار. بۇ قۇرئان ئويدۇرما سۆز ئەمەس، لېكىن ئۇ ئۆزىدىن ئىلگىرىكى كىتابلارنىڭ تەستىقىدۇر[15]، ھەر نەرسىنىڭ تەفسىلىدۇر[16]، ئىمان ئېيتىدىغان قەۋم ئۈچۈن ھىدايەتتۇر ۋە رەھمەتتۇر.‏
111




Quran Uyghur Translation - www.uyquran.com - قۇرئان كەرىم ئۇيغۇرچە ئىزاھلىق تەرجىمىسى تور بىكىتى