ئۇيغۇرچە قۇرئان كەرىم توربىكىتى logo

بِسْمِ اللهِ الرَّحْمٰنِ الرَّحِيمِ‎

14-سۈرە ئىبراھىم مەككەدە نازىل بولغان، 52 ئايەت

ئەلىف، لام، را. ئى مۇھەممەد! بۇ شۇنداق كىتابكى، بىز ئۇنى ساڭا ئىنسانلارنى رەببىنىڭ رۇخسىتى بىلەن زۇلمەتلەردىن نۇرغا، يەنى ئەزىز ۋە مەدھىيەلەنگۈچى زاتنىڭ يولىغا چىقىرىشىڭ ئۈچۈن نازىل قىلدۇق.‏
1




ئۇ زات ئاسمانلاردىكى ۋە زېمىندىكى نەرسىلەرنىڭ ئىگىسى بولغان ئاللاھتۇر. قاتتىق ئازاب سەۋەبىدىن كافىرلارنىڭ ھالىغا ۋاي! ‏
2




ئۇلار شۇنداق كىشىلەركى، دۇنيا ھاياتىنى ئاخىرەت ھاياتىدىن بەك ياخشى كۆرىدۇ، ئاللاھنىڭ يولىدىن توسىدۇ ۋە ئۇ يولنى ئەگرى قىلىشقا تىرىشىدۇ. ئەنە شۇلار چوڭقۇر ئازغۇنلۇق ئىچىدىدۇر.‏
3




بىز ھەر ئەلچىنى ئۆز قەۋمىگە بايان قىلىشى ئۈچۈن، ئۆز قەۋمىنىڭ تىلى بىلەن ئەلچىلىكنى يەتكۈزىدىغان قىلىپ ئەۋەتتۇق. ئاندىن ئاللاھ خالىغان كىشىنى ئازدۇرىدۇ، خالىغان كىشىنى ھىدايەت قىلىدۇ. ئاللاھ ئەزىزدۇر، ھېكمەت بىلەن ئىش قىلغۇچىدۇر.‏
4




بىز مۇسانى، «قەۋمىڭنى زۇلمەتلەردىن نۇرغا چىقارغىن ۋە ئۇلارغا ئاللاھنىڭ كۈنلىرىنى[1] ئەسلەتكىن» دەپ ئايەتلىرىمىز بىلەن ئەۋەتكەن ئىدۇق. شۈبھىسىزكى، بۇنىڭدا سەۋر قىلغۇچىلار ۋە شۈكۈر قىلغۇچىلار ئۈچۈن ئايەتلەر بار.‏
5




شۇنىڭ بىلەن مۇسا قەۋمىگە مۇنداق دېگەن ئىدى: «ئاللاھنىڭ سىلەرگە ئاتا قىلغان نېمىتىنى ياد ئېتىڭلار. ئۇ سىلەرنى فىرئەۋن خانىدانىدىن قۇتقۇزدى. ئۇلار سىلەرگە ئەڭ يامان ئازابنى تېتىتاتتى، ئوغۇللىرىڭلارنى بوغۇزلاتقۇزۇپ، قىزلىرىڭلارنى چوڭىيىپ خىزمىتىمىزنى قىلسۇن دەپ تىرىك قالدۇراتتى. بۇ رەببىڭلاردىن سىلەرگە چوڭ سىناق ئىدى.‏
6




ئۆز ۋاقتىدا رەببىڭلار: ‹ئەگەر شۈكۈر قىلساڭلار، سىلەرگە تېخىمۇ كۆپ بېرىمەن. ئەگەر تۇزكورلۇق قىلساڭلار، بىلىپ قويۇڭلاركى، ئازابىم بەك قاتتىقتۇر!› دەپ جاكارلىغان ئىدى».‏
7




مۇسا يەنە مۇنداق دېدى: «ئەگەر سىلەر ۋە زېمىندىكى بارلىق كىشىلەر تۇزكورلۇق قىلساڭلار، ئاللاھ يەنىلا بىھاجەتتۇر، مەدھىيەلەنگۈچىدۇر».‏
8




سىلەرگە، سىلەردىن بۇرۇن ئۆتكەن نۇھ قەۋمىنىڭ، ئاد، سەمۇد ۋە ئۇلاردىن كېيىنكىلەرنىڭ خەۋەرلىرى كەلمىدىمۇ؟ ئۇلارنى ئاللاھتىن باشقىسى بىلمەيدۇ. ئۇلارغا ئەلچىلىرى روشەن دەلىللەرنى ئېلىپ كەلگەن ئىدى. لېكىن ئۇلار قوللىرىنى ئېغىزلىرىغا قويدى[2] ۋە: «بىز سىلەرنىڭ ئەلچىلىكىڭلارغا ئىشەنمەيمىز! بىزنى چاقىرغان نەرسەڭلەردىن قاتتىق شەك قىلىۋاتىمىز!» دېدى.‏
9




ئەلچىلىرى ئۇلارغا: «ئاسمانلارنى ۋە زېمىننى ياراتقۇچى ئاللاھ توغرىسىدا شەك قىلامسىلەر؟ ئاللاھ سىلەرنى بەزى گۇناھلىرىڭلارنى مەغپىرەت قىلىش ۋە سىلەرنى بەلگىلەنگەن ئەجەلگىچە كېچىكتۈرۈش ئۈچۈن توغرا يولغا دەۋەت قىلىدۇ» دېدى. ئۇلار: «سىلەر بىزگە ئوخشاشلا ئىنسانسىلەر، بىزنى ئاتا-بوۋىلىرىمىز ئىبادەت قىلغان نەرسىدىن توسماقچى بولۇۋاتىسلەر. بىزگە روشەن دەلىل كەلتۈرۈڭلار» دېدى.‏
10




ئەلچىلىرى ئۇلارغا مۇنداق دېدى: «بىز سىلەرگە ئوخشاشلا ئىنسان. لېكىن ئاللاھ بەندىلىرىدىن خالىغان كىشىگە ياخشىلىق قىلىدۇ. ئاللاھنىڭ رۇخسىتىسىز بىزنىڭ سىلەرگە دەلىل كەلتۈرىشىمىز مۇمكىن ئەمەس. مۇئمىنلار ئاللاھقىلا تەۋەككۇل قىلسۇن.‏
11




بىز نېمىشقا ئاللاھقا تەۋەككۇل قىلمايلى؟ بىزگە يوللىرىمىزنى ئاللاھ كۆرسەتكەن تۇرسا! سىلەرنىڭ بىزگە قىلغان ئەزىيىتىڭلارغا چوقۇم سەۋر قىلىمىز. تەۋەككۈل قىلغۇچىلار پەقەت ئاللاھقىلا تەۋەككۈل قىلسۇن».‏
12




كافىرلار ئەلچىلىرىگە: «يا سىلەرنى يۇرتىمىزدىن چىقىرىۋېتىمىز ياكى بىزنىڭ دىنىمىزغا قايتىسىلەر!» دېدى. شۇنىڭ بىلەن ئۇ ئەلچىلەرگە رەببى مۇنداق ۋەھىي قىلدى: «بىز زالىملارنى چوقۇم ھالاك قىلىمىز،
13




ئۇلاردىن كېيىن ئۇ يۇرتقا چوقۇم سىلەرنى يەرلەشتۈرىمىز. بۇ ياخشىلىق، ئالدىمدا تۇرۇپ ھېساب بېرىشتىن ۋە ئاگاھلاندۇرۇشۇمدىن قورققانلار ئۈچۈندۇر».‏
14




ئەلچىلەر ئاللاھتىن فەتىھ تىلىدى ۋە ھەر تەرسا مۇستەبىت زىيانغا ئۇچرىدى.‏
15




ئىش بۇنىڭ بىلەن تۈگىمەيدۇ، ئۇ جەھەننەمگە كىرىدۇ. ئۇ يەردە ئۇنىڭغا يىرىڭدىن ئىبارەت بولغان سۇ ئىچۈرۈلىدۇ.‏
16




ئۇ ئۇنى يۇتۇشقا تىرىشىدۇ، لېكىن گېلىدىن ئۆتكۈزەلمەيدۇ. ئۇنىڭغا ھەر تەرەپتىن ئۆلۈم كېلىدۇ، لېكىن ئۇ ھەرگىزمۇ ئۆلمەيدۇ. بۇنىڭ ئارقىسىدىن دەھشەتلىك ئازاب بار.‏
17




رەببىگە كافىر بولغانلارنىڭ ئەھۋالى مۇنداق: ئۇلارنىڭ ئەمەللىرى بورانلىق كۈندە شامال سورۇۋەتكەن بىر دۆۋە كۈلگە ئوخشايدۇ. ئۇلار ئەمەللىرىدىن ھېچ نەرسىنى قوللىرىدا تۇتالمايدۇ. ئەنە شۇ[3] چوڭقۇر ئازغۇنلۇقتۇر.‏
18




كۆرمىدىڭمۇ؟ ئاللاھ ئاسمانلارنى ۋە زېمىننى ھەق بىلەن ياراتتى. ئاللاھ خالىسا سىلەرنى كەتكۈزىۋېتىپ يېڭى خەلق كەلتۈرىدۇ.‏
19




بۇ ئاللاھقا تەس ئەمەس.‏
20




ئۇلارنىڭ ھەممىسى ئاللاھنىڭ ھۇزۇرىغا چىقىدۇ. ئاجىزلار ئۆزلىرىنى چوڭ تۇتقانلارغا: «ئۆز ۋاقتىدا بىز سىلەرنىڭ ئەگەشكۈچىڭلار ئىدۇق، ھازىر سىلەر بىزدىن ئاللاھنىڭ ئازابىدىن بىرەر نەرسە دەپئى قىلالامسىلەر؟» دەيدۇ. ئۇلار: «ئەگەر ئاللاھ بىزگە توغرا يولنى كۆرسەتسە ئىدى، بىزمۇ سىلەرگە توغرا يولنى كۆرسەتكەن بولاتتۇق. ھازىر نالە-پەرياد قىلساقمۇ، سەۋر قىلساقمۇ ئوخشاش. قاچىدىغان ھېچقانداق يېرىمىز يوق» دەيدۇ.‏
21




ئىشلار بىر تەرەپ قىلىنىپ بولغاندا شەيتان ئۇلارغا مۇنداق دەيدۇ: «شۈبھىسىزكى، ئاللاھ سىلەرگە ئەمەلگە ئاشىدىغان ۋەدىنى ۋەدە قىلدى. مەنمۇ سىلەرگە ۋەدە قىلدىم، لېكىن ۋەدەمگە خىلاپلىق قىلدىم. مەن سىلەرنى زورلىمىغان. مەن سىلەرنى پەقەت چاقىردىم، سىلەر چاقىرىقىمنى قوبۇل قىلدىڭلار. شۇنىڭ ئۈچۈن سىلەر مېنى ئەيىبلىمەڭلار، ئۆزۈڭلارنى ئەيىبلەڭلار! مەنمۇ سىلەرنىڭ دادىڭلارغا يېتەلمەيمەن، سىلەرمۇ مېنىڭ دادىمغا يېتەلمەيسىلەر! مەن سىلەرنىڭ ئىلگىرى مېنى ئاللاھقا شىرىك قىلىشىڭلارنىمۇ قوبۇل قىلمىغان ئىدىم». شۈبھىسىزكى، زالىملار ئۈچۈن ئەلەملىك ئازاب بار.‏
22




ئىمان ئېيتىپ ياخشى ئەمەللەرنى قىلغانلار ئېقىن سۇلىرى بار جەننەتلەرگە كىرگۈزۈلىدۇ، رەببىنىڭ رۇخسىتى بىلەن ئۇ جەننەتلەردە مەڭگۈ قالىدۇ، ئۇ جەننەتلەردە سالام بىلەن قارشى ئېلىنىدۇ.‏
23




ئاللاھنىڭ ياخشى سۆزنى نېمىگە ئوخشاتقانلىقىنى كۆرمىدىڭمۇ؟ ئاللاھ ياخشى سۆزنى يىلتىزى مۇستەھكەم، شاخلىرى ناھايىتى ئېگىز ياخشى دەرەخكە ئوخشاتتى.‏
24




ئۇ دەرەخ رەببىنىڭ رۇخسىتى بىلەن ھەر زامان مېۋىسىنى بېرىدۇ. ئاللاھ ئىنسانلارنىڭ ئويلىنىشى ئۈچۈن ئۇلارغا ئاشۇنداق مىساللارنى بايان قىلىدۇ.‏
25




يامان سۆز بولسا، يىلتىزى يەرنىڭ ئۈستىدىن قومۇرۇلغان، تىك تۇرالمايدىغان ناچار دەرەخكە ئوخشايدۇ.‏
26




ئاللاھ مۇئمىنلارنى دۇنيا ھاياتىدا ۋە ئاخىرەتتە ئۆزگەرمەيدىغان سۆزنىڭ ئۈستىدە مەھكەم تۇرغۇزىدۇ[4]. ئاللاھ زالىملارنى ئازدۇرىدۇ. ئاللاھ خالىغىنىنى قىلىدۇ.‏
27




ئاللاھنىڭ نېمىتىگە شۈكۈر ئېيتىشنىڭ ئورنىغا تۇزكورلۇق قىلغان ۋە قەۋمىنى ھالاكەت يۇرتىغا باشلىغان كىشىلەرنى كۆرمىدىڭمۇ؟
28




ئۇ ھالاكەت يۇرتى جەھەننەمدۇر. ئۇلار ئۇنىڭ ئىچىگە كىرىپ كۆيىدۇ. ئۇ نېمىدېگەن يامان قارارگاھ!‏
29




ئۇلار ئىنسانلارنى ئاللاھنىڭ يولىدىن ئازدۇرۇش ئۈچۈن بەزى كىشىلەرنى ئاللاھ بىلەن ئوخشاش كۆردى. ئۇلارغا ئېيتقىنكى: «دۇنيا مەنپەئەتلىرىدىن قولۇڭلاردىن كېلىشىچە بەھرىمەن بولۇۋېلىڭلار، چۈنكى ئاخىرى بېرىپ ئورۇنلىشىدىغان يېرىڭلار دوزاختۇر».‏
30




مۇئمىن بەندىلىرىمگە ئېيتقىن: «نامازنى تولۇق ۋە داۋاملىق ئۆتىسۇن، ئېلىم- سېتىم ۋە دوستلۇق بولمايدىغان كۈن كېلىشتىن ئىلگىرى، بىز ئاتا قىلغان رىزىقتىن يوشۇرۇن بولسۇن، ئاشكارا بولسۇن چىقىم قىلسۇن».‏
31




ئاللاھ شۇنداق زاتكى، ئاسمانلارنى ۋە زېمىننى ياراتتى، ئاسماندىن سۇ چۈشۈرۈپ، سىلەرگە رىزىق بولسۇن دەپ ئۇ يامغۇر ئارقىلىق تۈرلۈك مېۋە ۋە مەھسۇلاتلارنى چىقاردى، ئۆز ئەمرى بىلەن دېڭىزدا ئۈزۈشى ئۈچۈن كېمىلەرنى سىلەرگە بويسۇندۇرۇپ بەردى، ئۆستەڭلەرنى سىلەرگە بويسۇندۇرۇپ بەردى،‏
32




مۇنتىزىم ئايلىنىپ تۇرىدىغان قۇياشنى ۋە ئاينى سىلەرگە بويسۇندۇرۇپ بەردى، كېچە بىلەن كۈندۈزنى سىلەرگە بويسۇندۇرۇپ بەردى،
33




سىلەرگە سىلەر ئېھتىياجلىق بولغان نەرسىلەرنىڭ ھەممىسىنى بەردى. ئەگەر ئاللاھنىڭ نېمەتلىرىنى سانىغىلى تۇرساڭلار، ئۇلارنى ساناپ بولالمايسىلەر. شۈبھىسىزكى، ئىنسان ھەقىقەتەن زالىمدۇر، تۇزكوردۇر.‏
34




ئۆز ۋاقتىدا ئىبراھىم مۇنداق دېدى: «رەببىم! بۇ شەھەرنى بىخەتەر قىلغىن، مېنى ۋە بالىلىرىمنى بۇتلارغا چوقۇنۇشتىن ساقلىغىن!‏
35




رەببىم! ھەقىقەتەن ئۇ بۇتلار نۇرغۇن ئىنسانلارنىڭ ئېزىپ كېتىشىگە سەۋەبچى بولدى. بۇنىڭدىن ئېتىبارەن كىم ماڭا ئەگەشسە مەندىندۇر، كىم ماڭا ئاسىيلىق قىلسا سەن ئەلۋەتتە مەغپىرەت قىلغۇچىسەن، كۆپ ئىنئام قىلغۇچىسەن.‏
36




رەببىمىز! مەن ئائىلەمنىڭ بىر قىسمىنى سېنىڭ ھۆرمەتلىك ئۆيۈڭنىڭ يېنىدىكى تېرىقچىلىققا ناباب قاقاس ۋادىغا يەرلەشتۈردۈم. رەببىمىز! ئۇلارنى، نامازنى تولۇق ۋە داۋاملىق ئۆتىسۇن دەپ شۇنداق قىلدىم. شۇڭا بىر قىسىم ئىنسانلارنىڭ كۆڭۈللىرىنى ئۇلارغا مايىل قىلغىن، ئۇلارغا ھەر خىل مېۋە ۋە مەھسۇلاتلاردىن رىزىق ئاتا قىلغىن. ئۈمىد قىلىمەنكى، ئۇلار شۈكۈر قىلغاي.‏
37




رەببىمىز! سەن بىزنىڭ يوشۇرۇن قىلغان نەرسىمىزنى ۋە ئاشكارا قىلغان نەرسىمىزنى بىلىپ تۇرىسەن. زېمىندا بولسۇن، ئاسماندا بولسۇن ھېچ نەرسە ئاللاھقا مەخپىي بولۇپ قالمايدۇ.‏
38




ياشىنىپ قالغان چېغىمدا ماڭا ئىسمائىل بىلەن ئىسھاقنى ئاتا قىلغان ئاللاھقا ھەمدۇسانالار بولسۇن. شۈبھىىسزكى، مېنىڭ رەببىم دۇئالارنى ئىجابەت قىلغۇچىدۇر.‏
39




رەببىم! مېنى نامازنى تولۇق ۋە داۋاملىق ئۆتىگۈچى قىلغىن، نەسلىمدىنمۇ نامازنى تولۇق ۋە داۋاملىق ئۆتىگۈچى كىشىلەر چىقارغىن. رەببىمىز! دۇئايىمنى ئىجابەت قىلغىن.‏
40




رەببىمىز! ھېساب ئېلىنىدىغان كۈندە ماڭا، ئاتا-ئانامغا ۋە مۇئمىنلارغا مەغپىرەت قىلغىن».‏
41




ئى مۇھەممەد! زالىملارنىڭ قىلمىشلىرىدىن ھەرگىزمۇ ئاللاھنى خەۋەرسىز دەپ ئويلىمىغىن! شۈبھىسىزكى، ئاللاھ ئۇلاردىن ھېساب ئېلىشنى كۆزلەر چەكچىيىپ كېتىدىغان كۈنگە كىچىكتۈرىدۇ.‏
42




ئۇ كۈنى ئۇلار باشلىرى تىك، كۆزلىرى ئوچۇق، قەلبلىرى بوش ھالدا يۈگۈرۈشىدۇ.‏
43




ئىنسانلارنى ئازاب كېلىدىغان كۈندىن ئاگاھلاندۇرغىن! ئۇ كۈنى زالىملار: «رەببىمىز! بىزگە ئازغىنە مۆھلەت بەرگىن، سېنىڭ دەۋىتىڭنى قوبۇل قىلىپ، ئەلچىلىرىڭگە ئەگىشەيلى» دەيدۇ. ئۇلارغا مۇنداق دېيىلىدۇ: «سىلەر ئۆز ۋاقتىدا بىز ھېچ زاۋال تاپمايمىز دەپ قەسەم ئىچمىگەنمىدىڭلار؟‏
44




سىلەر ئۆزلىرىگە زۇلۇم قىلغانلارنىڭ يۇرتلىرىغا يەرلەشكەن ۋە ئۇلارغا نېمە قىلغانلىقىمىزنى ئېنىق بىلگەن ئىدىڭلار، بىز سىلەرگە بۇ ھەقتە ھەرخىل مىساللارنى بايان قىلغان ئىدۇق».‏
45




ئۇلار ئۆزلىرىنىڭ مىكرىنى قىلدى. ئۇلارنىڭ مىكرى تاغلارنى ئۆرۈۋەتكۈدەك بولسىمۇ ئاللاھ ئۇنى بەربات قىلاتتى.‏
46




ئۇنداقتا سەن ھەرگىزمۇ ئاللاھنى ئەلچىلىرىگە قىلغان ۋەدىسىدە تۇرمايدۇ دەپ ئويلىمىغىن! شۈبھىسىزكى، ئاللاھ ئەزىزدۇر، ئىنتىقام ئىگىسىدۇر.‏
47




كۈن كېلىدۇ، زېمىن باشقا زېمىنغا، ئاسمانلارمۇ باشقا ئاسمانلارغا ئۆزگەرتىلىدۇ ۋە پۈتكۈل ئىنسانلار چەكسىز قۇدرەتلىك، يالغۇز بىر ئاللاھنىڭ ھۇزۇرىغا چىقىدۇ.‏
48




ئۇ كۈندە گۇناھكارلارنى زەنجىرلەر بىلەن باغلانغان ھالەتتە كۆرىسەن!‏
49




ئۇلارنىڭ كىيىملىرى قەتىراندىن بولىدۇ[5]، يۈزلىرىنى بولسا ئوت ئورىۋالىدۇ.‏
50




چۈنكى ئاللاھ ھەر كىشىنى ئۆز قىلمىشى بىلەن جازالايدۇ. شۈبھىسىزكى، ئاللاھنىڭ ھېساب ئېلىشى بەك تېزدۇر.‏
51




بۇ قۇرئان ئىنسانلارغا قىلىنغان ئۇقتۇرۇشتۇر. ئۇلار ئۇنىڭ بىلەن ئاگاھلاندۇرۇلسۇن، ئاللاھنىڭ بىر ئىلاھ ئىكەنلىكىنى بىلسۇن ۋە ساغلام ئەقىل ئىگىلىرى ئويلانسۇن.‏
52




Quran Uyghur Translation - www.uyquran.com - قۇرئان كەرىم ئۇيغۇرچە ئىزاھلىق تەرجىمىسى تور بىكىتى