ئۇيغۇرچە قۇرئان كەرىم توربىكىتى logo

بِسْمِ اللهِ الرَّحْمٰنِ الرَّحِيمِ‎

16-سۈرە نەھل مەككەدە نازىل بولغان، 128 ئايەت

ئى مۇشرىكلار! ئاللاھنىڭ ئەمرى كەلدى، ئۇنىڭ تېز كېلىشىنى تەلەپ قىلماڭلار. ئاللاھ مۇشرىكلار شېرىك قىلغان نەرسىلەردىن پاك ۋە ئۈستۈندۇر.‏
1




ئاللاھ پەرىشتىلەرنى ئۆز ئەمرى بويىچە رۇھ بىلەن خالىغان بەندىلىرىگە چۈشۈرۈپ[1]، ئۇلارغا: «‹مەندىن باشقا ھېچ ئىلاھ يوقتۇر، ماڭا تەقۋادارلىق قىلىڭلار› دېگەن ھۆكمىم بىلەن ئىنسانلارنى ئاگاھلاندۇرۇڭلار» دەيدۇ.‏
2




ئاللاھ ئاسمانلارنى ۋە زېمىننى ھەق بىلەن ياراتتى، ئاللاھ مۇشرىكلار شېرىك قىلغان نەرسىلەردىن ئۈستۈندۇر.‏
3




ئاللاھ ئىنساننى ئۇرۇقلانغان تۇخۇمدىن ياراتتى. ئەمەلىيەت شۇنداق تۇرۇقلۇق ئىنسان بىردىنلا ئاشكارا دۈشمەنگە ئايلاندى.‏
4




ئاللاھ تۆگە، كالا، قوي ۋە ئۆچكىلەرنىمۇ ياراتتى. ئۇلاردا سىلەر ئۈچۈن ئىسسىتقۇچى نەرسىلەر ۋە باشقا مەنپەئەتلەر بار. ئۇلارنىڭ گۆشلىرىنى يەيسىلەر.‏
5




ئۇلارنى كەچتە ئوتلاقتىن ئېلىپ كەلگەن ۋە ئەتىگەندە ئوتلاققا ئېلىپ بارغان چاغلىرىڭلاردا باشقىچە زوق ئالىسىلەر.‏
6




ئۇلار سىلەر ناھايىتى جاپا تارتمىساڭلار بارالمايدىغان يىراق جايلارغا يۈكلىرىڭلارنى توشۇيدۇ. شۈبھىسىزكى، رەببىڭلار ھەقىقەتەن شەپقەتلىكتۇر، كۆپ ئىنئام قىلغۇچىدۇر.‏
7




ئاللاھ ئاتلارنى، قېچىرلارنى، ئېشەكلەرنى سىلەر ئۈچۈن ئۇلاغ ھەمدە زىننەت قىلىپ ياراتتى. ئاللاھ يەنە سىلەر بىلمەيدىغان نەرسىلەرنى يارىتىدۇ.‏
8




ئاللاھ توغرا يولنى كۆرسىتىدۇ، لېكىن بەزىلەر ئۇ يولدىن ئېزىپ كېتىدۇ. ئاللاھ خالىسا ئىدى، ھەممىڭلارنى توغرا يولنىڭ ئۈستىدە قىلاتتى.‏
9




ئاللاھ شۇنداق زاتكى، ئاسماندىن سىلەرگە سۇ چۈشۈرۈپ بەردى. سىلەر ئۇنىڭدىن ئىچىسىلەر، ماللىرىڭلارنى ئوتلىغىلى قويۇۋىتىدىغان ئوتلاقلىرىڭلارمۇ ئۇنىڭدىن ھاسىل بولىدۇ.‏
10




ئاللاھ يەنە ئۇ سۇ بىلەن سىلەر ئۈچۈن ئېكىنلەر، زەيتۇنلار، خورمىلار، ئۈزۈملەر ۋە خىلمۇخىل مېۋىلەرنى ئۆستۈرۈپ بەرمەكتە. شۈبھىسىزكى، بۇنىڭدا تەپەككۇر قىلىدىغان قەۋم ئۈچۈن ئايەت بار[2].‏
11




ئاللاھ كېچە بىلەن كۈندۈزنى، قۇياش بىلەن ئاينى خىزمىتىڭلارغا سېلىپ بەردى. يۇلتۇزلارمۇ ئاللاھنىڭ ئەمرى بىلەن سىلەرنىڭ خىزمىتىڭلارغا بويسۇندۇرۇلماقتا. شۈبھىسىزكى، بۇنىڭدا ئەقلىنى ئىشلىتىدىغان قەۋم ئۈچۈن ئايەتلەر بار.‏
12




ئاللاھ ئۆزى زېمىندا ياراتقان رەڭگارەڭ نەرسىلەرنىمۇ خىزمىتىڭلارغا سېلىپ بەردى. شۈبھىسىزكى، بۇنىڭدا ئويلىنىدىغان قەۋم ئۈچۈن ئايەت بار.‏
13




ئاللاھ شۇنداق زاتكى، دېڭىزنىمۇ خىزمىتىڭلارغا سېلىپ بەردى. ئاللاھ بۇنى، ئۇنىڭدىن يېڭى گۆش يېيىشىڭلار ئۈچۈن، ئۇنىڭدىن تاقايدىغان زىننەت بۇيۇملىرىڭلارنى چىقىرىشىڭلار ئۈچۈن- سەن ئۇنىڭدا سۇنى يېرىپ كېتىۋاتقان كېمىلەرنى كۆرىسەن- ئاللاھنىڭ پەزلىدىن تەلەپ قىلىشىڭلار ئۈچۈن ۋە شۈكۈر قىلىشىڭلار ئۈچۈن قىلدى.‏
14




ئاللاھ زېمىندا سىلەرنى تەۋرىتىۋەتمەسلىكى ئۈچۈن مۇستەھكەم تاغلارنى قويدى، يولۇڭلارنى تاپالىشىڭلار ئۈچۈن ئۆستەڭلەر ۋە يوللارنى پەيدا قىلدى.‏
15




ئاللاھ يەنە نۇرغۇن بەلگىلەرنى ياراتتى، يۇلتۇزلار بىلەنمۇ ئىنسانلار يوللىرىنى تاپىدۇ.‏
16




يارىتالىغان زات، يارىتالمىغان كىشى بىلەن ئوخشاشمۇ؟ يەنىلا ئويلانمامسىلەر؟ ‏
17




ئەگەر ئاللاھنىڭ نېمىتىنى سانىغىلى تۇرساڭلار، ئۇنى ساناپ بولالمايسىلەر. شۈبھىسىزكى، ئاللاھ مەغپىرەت قىلغۇچىدۇر، كۆپ ئىنئام قىلغۇچىدۇر.‏
18




ئاللاھ يوشۇرغان نەرسەڭلارنى ۋە ئاشكارا قىلغان نەرسەڭلەرنى بىلىپ تۇرىدۇ.‏
19




مۇشرىكلارنىڭ ئاللاھنى قويۇپ دۇئا قىلغان كىشىلىرى ھېچ نەرسە يارىتالمايدۇ. ئەكسىچە ئۇلارنىڭ ئۆزلىرى يارىتىلغان كىشىلەردۇر.‏
20




ئۇلار ئۆلۈكلەردۇر، تىرىكلەر ئەمەستۇر، قاچان قايتا تىرىلدۈرۈلىدىغانلىقىنىمۇ ئۇقمايدۇ.‏
21




سىلەرنىڭ ئىلاھىڭلار يالغۇز بىر ئىلاھتۇر. ئەھۋال مۇشۇنداق تۇرۇقلۇق ئاخىرەتكە ئىشەنمەيدىغانلارنىڭ قەلبلىرى بۇ ھەقىقەتنىمۇ ئىنكار قىلىدۇ. ئۇلار چوڭچىلىق قىلىدىغان كىشىلەردۇر.‏
22




شۈبھىسىزكى، ئاللاھ ئۇلارنىڭ يوشۇرغان نەرسىلىرىنى ۋە ئاشكارا قىلغان نەرسىلىرىنى بىلىپ تۇرىدۇ. ئاللاھ چوڭچىلىق قىلغۇچىلارنى ھەرگىزمۇ ياخشى كۆرمەيدۇ.‏
23




ئۇلارغا: «رەببىڭلار نازىل قىلغان نەرسە نېمە؟» دېيىلسە، «بۇرۇنقىلارنىڭ ئەپسانىلىرى» دەيدۇ.‏
24




شۇنىڭ بىلەن ئۇلار قىيامەت كۈنى ھەم ئۆز گۇناھلىرىنىڭ ھەممىسىنى يۈدىدۇ ھەمدە ئۆزلىرى تەرىپىدىن ھېچبىر ئىلىمگە ئاساسلانماستىن ئازدۇرۇلغان كىشىلەرنىڭ گۇناھلىرىدىنمۇ يۈدىدۇ. ئاگاھ بولۇڭلاركى، ئۇلارنىڭ يۈدۈۋالغان يۈكلىرى نېمىدېگەن يامان!‏
25




ئۇلاردىن بۇرۇنقىلارمۇ ھىيلە-مىكىر قىلغان ئىدى. لېكىن ئاللاھ ئۇلارنىڭ ھىيلە-مىكىر بىنالىرىنى ئۇللىرىدىن يىقىپ تاشلىدى- دە، تورۇسلار ئۇلارنىڭ ئۈستىگە چۈشتى. بۇ ئازاب ئۇلارغا، ئۇلار ئويلىمىغان يەردىن كەلدى.‏
26




ئاندىن ئاللاھ قىيامەت كۈنى ئۇلارنى رەسۋا قىلىدۇ ۋە ئۇلارغا: «سىلەر يولىدا كۈرەش قىلغان شېرىكلىرىم قەيەردە؟» دەيدۇ. ئىلىم بېرىلگەنلەر: «بۈگۈن كافىرلار چوقۇم رەسۋا بولىدۇ ۋە يامان ئاقىۋەتكە قالىدۇ» دەيدۇ.‏
27




ئۇلار ئۆزلىرىگە زۇلۇم قىلىۋاتقاندا پەرىشتىلەر ۋاپات قىلدۇرغان كىشىلەردۇر. ئۇ چاغدا ئۇلار: «بىز ھېچ يامانلىق قىلمىغان ئىدۇق» دەپ تەسلىم بولىدۇ. ئۇلارغا: «ئۇنداق ئەمەس، ئاللاھ قىلمىشىڭلارنى ئوبدان بىلىدۇ،
28




شۇنىڭ ئۈچۈن جەھەننەمنىڭ ئىشىكلىرىدىن كىرىڭلار، ئۇنىڭ ئىچىدە مەڭگۈ قالىسىلەر» دېيىلىدۇ. مۇتەكەببىرلەرنىڭ ئورۇنلىشىدىغان يېرى نېمىدېگەن يامان!‏
29




تەقۋادارلارغا: «رەببىڭلار نازىل قىلغان نەرسە نېمە؟» دېيىلسە، «ياخشىلىق» دەيدۇ. ياخشىلىق قىلغۇچىلارغا بۇ دۇنيادا ياخشىلىق بار، ئۇلار ئۈچۈن ئاخىرەت يۇرتى تېخىمۇ ياخشىدۇر. تەقۋادارلارنىڭ يۇرتى نېمىدېگەن ياخشى!‏
30




ئۇ يۇرت ئەدن جەننەتلىرىدۇر. ئۇلار ئۇ جەننەتلەرگە كىرىدۇ، ئۇ جەننەتلەرنىڭ ئاستىدىن ئۆستەڭلەر ئېقىپ تۇرىدۇ، ئۇ جەننەتلەردە ئۇلارغا خالىغىنى بار. ئاللاھ تەقۋادارلارنى مۇشۇنداق مۇكاپاتلايدۇ.‏
31




ئۇ تەقۋادارلار پاك تۇرغان چاغدا پەرىشتىلەر جانلىرىنى ئالغان كىشىلەردۇر. پەرىشتىلەر ئۇلارغا: «سالام سىلەرگە! جەننەتكە كىرىڭلار، چۈنكى سىلەر ئەمەل قىلغان ئىدىڭلار!» دەيدۇ.‏
32




كافىرلار پەرىشتىلەرنىڭ كېلىشىدىن ياكى رەببىڭنىڭ ئەمرىنىڭ كېلىشىدىن باشقا ھېچنېمىنى ساقلاۋاتمايدۇ. بۇلاردىن ئىلگىرىكىلەرمۇ شۇنداق قىلغان ئىدى. ئاللاھ ئۇلارغا زۇلۇم قىلمىدى، لېكىن ئۇلار ئۆزلىرىگە ئۆزلىرى زۇلۇم قىلدى.‏
33




ئاخىرىدا ئۇلارنىڭ قىلمىشلىرى ئۆزلىرىنىڭ باشلىرىغا بالا بولدى ۋە ئۇلارنى ئۆزلىرى مەسخىرە قىلغان نەرسە قورشىۋالدى.‏
34




مۇشرىكلار: «ئەگەر ئاللاھ خالىسا ئىدى، بىز ئاللاھتىن باشقا ھېچ نەرسىگە ئىبادەت قىلمىغان بولاتتۇق- بىزمۇ، ئاتا-بوۋىلىرىمىزمۇ ئۇنداق قىلمىغان بولاتتۇق- ۋە ئاللاھقا قارشى ھېچ نەرسىنى ھارام قىلمىغان بولاتتۇق» دېدى. ئۇلاردىن ئىلگىرىكىلەرمۇ شۇنداق قىلىشقان ئىدى. ئەلچىلەرنىڭ روشەن تەبلىغ قىلىشتىن باشقا ۋەزىپىسى بارمۇ؟
35




شۈبھىسىزكى، بىز ھەر ئۇممەتكە ئەلچى ئەۋەتتۇق. ئۇ ئەلچى ئۇلارغا «ئاللاھقا ئىبادەت قىلىڭلار، تاغۇتتىن نېرى تۇرۇڭلار» دېدى. ئاندىن ئۇلارنىڭ بەزىسى ئاللاھنىڭ ھىدايىتىگە ئېرىشتى، بەزىسى ئازغۇنلۇققا لايىق بولدى. يەر يۈزىدە سەير قىلىپ راستنى يالغان دېگۈچىلەرنىڭ ئاقىۋىتىنىڭ قانداق بولغانلىقىنى كۆزىتىڭلار.‏
36




سەن ئۇلارنىڭ توغرا يولغا كېلىشىگە ھېرىس بولساڭمۇ، ئاللاھ ئۆزى ئازغۇنلۇقتا قويغانلارنى توغرا يولغا كەلتۈرمەيدۇ، ئۇلارنىڭ ياردەمچىلىرىمۇ يوقتۇر.‏
37




ئۇلار ئاللاھ بىلەن ئەڭ كۈچلۈك قەسىمىنى قىلىپ تۇرۇپ: «ئاللاھ ئۆلۈكلەرنى ھەرگىزمۇ قايتا تىرىلدۈرمەيدۇ» دەيدۇ. ئۇنداق ئەمەس، چوقۇم تىرىلدۈرىدۇ. بۇ ئاللاھنىڭ ۋەدىسى بولۇپ، ئۇ چوقۇم ئەمەلگە ئاشىدۇ. لېكىن ئىنسانلارنىڭ تولىسى بۇنى بىلمەيدۇ.‏
38




ئاللاھنىڭ ئۆلۈكلەرنى قايتا تىرىلدۈرۈشى ئۆزىنىڭ ئۇلار ئىختىلاپ قىلىشقان نەرسىنى ئۇلارغا بايان قىلىشى ۋە كافىرلارنىڭ ئۆزلىرىنىڭ يالغانچى ئىكەنلىكىنى بىلىشى ئۈچۈندۇر.‏
39




بىز بىر نەرسىنىڭ بولۇشىنى ئىرادە قىلغان چېغىمىزدا ئۇنىڭغا دەيدىغان سۆزىمىز «بول» دېيىشتىنلا ئىبارەتتۇر. شۇنىڭ بىلەن ئۇ نەرسە بولىدۇ.‏
40




زۇلۇم قىلىنغاندىن كېيىن ئاللاھ يولىدا ھىجرەت قىلغانلارنى دۇنيادا گۈزەل يۇرتلارغا يەرلەشتۈرىمىز. ئۇلارنىڭ ئاخىرەتتە ئالىدىغان مۇكاپاتى تېخىمۇ چوڭدۇر. ئۇلار بۇنى بىلگەن بولسىچۇ!‏
41




ئۇلار سەۋر قىلغان ۋە رەببىگىلا تەۋەككۇل قىلغان كىشىلەردۇر.‏
42




ئى مۇھەممەد! بىز سەندىن ئىلگىرىمۇ پەقەت ئەرلەرنىلا ئەلچى قىلىپ ئەۋەتكەن ئىدۇق. ئى مەككىلىكلەر! ئەگەر بىلمىسەڭلار زىكىر ئەھلىدىن سوراپ بېقىڭلار[3].‏
43




بىز ئۇ ئەلچىلەرنى روشەن دەلىللەر ۋە كىتابلار بىلەن ئەۋەتكەن ئىدۇق. ساڭىمۇ بۇ زىكىرنى نازىل قىلدۇق. بىز بۇنى ئۇ ئىنسانلارغا نازىل قىلىنغان نەرسىنى ئۇلارغا بايان قىلىشىڭ ئۈچۈن ۋە ئۇلارنىڭ تەپەككۇر قىلىشى ئۈچۈن قىلدۇق. ‏
44




يامان ئىشلارنى پىلانلىغانلار تۆۋەندىكىلەردىن ئەمىن بولدىمۇ: ئاللاھنىڭ يەرگە يۇتقۇزۇۋېتىشىدىن ياكى ئۆزلىرىگە ئويلىمىغان يەردىن ئازاب كېلىشتىن
45




ياكى سەپەردىكى چاغلىرىدا ئازابقا يولۇقۇشتىن-كى ئۇلار قېچىپ قۇتۇلالمايدۇ-‏
46




ياكى ئۆزلىرىگە ئاللاھنىڭ ئاز-ئازدىن كېمەيتىپ ئاخىرى يىلتىزىنى قۇرۇتۇش جازاسى بېرىشىدىن. لېكىن رەببىڭلار شەپقەتلىكتۇر، كۆپ ئىنئام قىلغۇچىدۇر.‏
47




ئۇلار ئاللاھ ياراتقان نەرسىلەرگە قارىمىدىمۇ؟ ئۇ نەرسىلەرنىڭ سايىلىرى ئوڭ تەرەپكە ۋە سول تەرەپلەرگە يۆتكىلىدۇ ۋە بۇ شەكىلدە ئاللاھقا بويۇن ئېگىپ سەجدە قىلىدۇ.‏
48




ئاسمانلاردىكى ۋە زېمىندىكى بارلىق جانلىقلار ۋە پۈتكۈل پەرىشتىلەر ئاللاھقا سەجدە قىلىدۇ. ئۇلار چوڭچىلىق قىلمايدۇ.‏
49




ئۇلار ئۆزلىرىنىڭ ئۈستىدىكى رەببىدىن قورقىدۇ ۋە بۇيرۇلغاننى قىلىدۇ.‏
50




ئاللاھ مۇنداق دەيدۇ: «ئىككى ئىلاھقا چوقۇنماڭلار، شۈبھىسىزكى، ئىلاھ يالغۇز بىر ئىلاھتۇر، ئۇنداقتا پەقەت مەندىنلا قورقۇڭلار».‏
51




ئاسمانلاردىكى ۋە زېمىندىكى بارلىق نەرسىلەرنىڭ ئىگىسى پەقەتلا ئاللاھتۇر. دىنمۇ ھەر دائىم ئۇنىڭدۇر[4]. شۇنداق تۇرۇقلۇق سىلەر يەنىلا ئاللاھتىن غەيرىيدىن قورقامسىلەر؟‏
52




سىلەردىكى ھەر نېمەت ئاللاھتىندۇر. يەنە تېخى قىيىنچىلىققا ئۇچرىساڭلار ئاللاھقا ئىلتىجا قىلىسىلەر.‏
53




لېكىن ئاللاھ سىلەرنى ئۇ قىيىنچىلىقتىن قۇتقۇزۇپ قويسا، سىلەردىن بىر بۆلۈك كىشى دەرھال رەببىگە شېرىك كەلتۈرىدۇ.‏
54




ئۇلار بەرگەن نېمەتلىرىمىزگە قارشى تۇزكورلۇق قىلىش ئۈچۈن شۇنداق قىلىدۇ. ھازىرچە كەيپ-ساپا سۈرۈپ تۇرۇڭلار، يېقىندا بىلىپ قالىسىلەر!‏
55




ئۇلار يەنە بىز بەرگەن رىزىقتىن ئۆزلىرى بىلمەيدىغان ئويدۇرما ئىلاھلارغا نېسىۋە ئايرىيدۇ. ئاللاھ بىلەن قەسەمكى، سىلەر بۇ بوھتانلىرىڭلارنىڭ ھېسابىنى بېرىسىلەر.‏
56




ئۇلار يەنە قىزلارنى ئاللاھقا ئايرىيدۇ- ئاللاھ بۇنىڭدىن پاكتۇر-، ئۆزلىرى ئارزۇ قىلىدىغان ئوغۇللارنى ئۆزلىرىگە ئايرىيدۇ.‏
57




ئۇلارنىڭ بىرىگە قىز بالا بىلەن خۇش خەۋەر يەتكۈزۈلسە[5]، ئاچچىقىدىن يۈزى قاپقارا بولۇپ كېتىدۇ.‏
58




ئۇ كەلگەن بۇ يامان خەۋەر تۈپەيلى قەۋمىگە كۆرۈنمەسلىككە تىرىشىدۇ. ئۇنى نومۇسقا چىداپ باقايمۇ ياكى كۆمىۋىتەيمۇ دەپ ئويلايدۇ. ئاگاھ بولۇڭلاركى، ئۇلارنىڭ بۇ ھۆكمى نېمىدېگەن يامان!‏
59




ئاخىرەتكە ئىشەنمەيدىغانلارنىڭ ئەنە شۇنداق يامان سۈپەتلىرى بار. ئەڭ ئۇلۇغ سۈپەت ئاللاھنىڭدۇر. ئاللاھ ئەزىزدۇر، ھېكمەت بىلەن ئىش قىلغۇچىدۇر.‏
60




ئەگەر ئاللاھ ئىنسانلارنى قىلغان زۇلۇملىرى تۈپەيلىدىن جازالاندۇرىدىغان بولسا ئىدى، يەر يۈزىدە ھېچبىر جانلىق قويمىغان بولاتتى. لېكىن ئاللاھ ئۇلارنى بەلگىلەنگەن ئەجەلگە قەدەر كېچىكتۈرىدۇ. ئۇلارنىڭ ئەجىلى كەلگەندە، ئۇلار ئۇنى قىلچىلىك ئىلگىرى-كېيىن قىلالمايدۇ.‏
61




ئۇلار ئۆزلىرى يامان كۆرىدىغان نەرسىنى ئاللاھقا مەنسۇپ قىلىدۇ[6]. بۇنىڭغا قارىماي تېخى «ئەڭ ياخشى ئاقىۋەت بىزنىڭ بولىدۇ» دەپ بىلجىرلايدۇ. شۈبھىسىزكى، دوزاخ ئوتى ئۇلارنىڭ بولىدۇ، ئۇلار ئۇ ئوتقا تۇنجى قېتىم تاشلىنىدىغان كىشىلەردۇر.‏
62




ئاللاھ بىلەن قەسەمكى، بىز سەندىن ئىلگىرىكى ئۇممەتلەرگىمۇ ئەلچى ئەۋەتكەن ئىدۇق. شەيتان ئۇ ئۇممەتلەرگە ئۆز ئەمەللىرىنى چىرايلىق كۆرسەتكەن. بۈگۈن ئۇ شەيتان مانا بۇلارنىڭ[7] ۋەلىيىسىىدۇر[8]. ئۇلار ئۈچۈن ئەلەملىك ئازاب بار.‏
63




بىزنىڭ ساڭا بۇ كىتابنى نازىل قىلىشىمىز، ئۇلارغا ئىختىلاپ قىلىشقان نەرسىلىرىنى بايان قىلىپ بېرىشىڭ ئۈچۈندۇر ھەمدە بۇ كىتابنىڭ ئىمان ئېيتىدىغان قەۋمگە ھىدايەت ۋە رەھمەت بولۇشى ئۈچۈندۇر، خالاس.‏
64




ئاللاھ ئاسماندىن سۇ چۈشۈرۈپ ئۇنىڭ بىلەن ئۆلۈك تۇپراققا ھايات بەرمەكتىدۇر. شۈبھىسىزكى، بۇنىڭدا قۇلاق سالىدىغان قەۋم ئۈچۈن ئايەت بار.‏
65




شۈبھىسىزكى، تۆگە، كالا، قوي ۋە ئۆچكىلەردە سىلەر ئۈچۈن ئىبرەت بار: سىلەرنى ئۇ ھايۋانلارنىڭ قورساقلىرىدىكى نەرسىلەرنىڭ بىر قىسمى بىلەن سۇغىرىمىز. ئۇ، ئۇ ھايۋانلارنىڭ ئاشقازىنىدىكى ئوزۇقلۇقلار بىلەن قاننىڭ ئارىسىدىن كېلىدىغان، ئىچكەنلەرنىڭ گاللىرىدىن سىلىق ئۆتۈپ كېتىدىغان ساپ سۈتتۇر. ‏
66




سىلەر خورمىلاردىن ۋە ئۈزۈملەردىن مەست قىلغۇچى ئىچىملىك ۋە ياخشى رىزىق ياسايسىلەر. شۈبھىسىزكى، بۇنىڭدا ئەقلىنى ئىشلىتىدىغان قەۋم ئۈچۈن ئايەت بار.‏
67




رەببىڭ ھەسەل ھەرىلىرىگە مۇنداق ۋەھىي قىلدى: «تاغلاردا، ئورمانزارلىقلاردا ۋە ئىنسانلار تەييارلىغان ساندۇقلاردا ئۆزۈڭلار ئۈچۈن ئۆيلەر ياساڭلار.‏
68




ئاندىن كېيىن مېۋىلەرنىڭ ھەممىسىدىن يەڭلار، ئاندىن رەببىڭلار سىلەرگە بويسۇندۇرۇپ بەرگەن يوللاردا مېڭىڭلار». ئۇلارنىڭ قورساقلىرىدىن ھەر خىل رەڭدە ئىچىملىك چىقىدۇ. ئۇ ئىچىملىك ئىنسانلارغا شىپا بولىدۇ. شۈبھىسىزكى، بۇنىڭدا تەپەككۇر قىلىدىغان قەۋم ئۈچۈن ئايەت بار.‏
69




سىلەرنى ئاللاھ ياراتتى. ئاندىن كېيىن سىلەرنى يەنە ئاللاھ ئۆلتۈرىدۇ. سىلەردىن بەزىلەر ئۆمرىنىڭ ئەڭ ناچار ھالىتىگە قايتۇرىلىدۇ، شۇنىڭ بىلەن ئۇلار بىلگەنلىرىنى بىلمەيدىغان بولۇپ قالىدۇ. شۈبھىسىزكى، ئاللاھ بىلگۈچىدۇر، قادىردۇر.‏
70




ئاللاھ بەزىلىرىڭلارغا كۆپ، بەزىلىرىڭلارغا ئاز رىزىق بەردى. كۆپ رىزىق بېرىلگەنلەر ئۆزلىرىنىڭ رىزقىنى قول ئاستىدىكىلەرگە بېرىپ ئۇلارنى رىزىقتا ئۆزلىرى بىلەن ئوخشاش قىلمايدۇ- شۇنداققۇ؟! ئۇلار يەنىلا ئاللاھنىڭ نېمىتىنى ئىنكار قىلامدۇ؟
71




ئاللاھ سىلەرگە ئۆزۈڭلاردىن جۈپتىلەرنى يارىتىپ بەردى، جۈپتىلىرىڭلاردىن سىلەرگە بالىلار ۋە نەۋرىلەرنى يارىتىپ بەردى، سىلەرگە پاك رىزىقلارنى بەردى. ئۇلار يەنىلا باتىلغا ئىشىنىپ ئاللاھنىڭ نېمىتىگە تۇزكورلۇق قىلامدۇ؟
72




ئۇلار ئاللاھنى قويۇپ ئۆزلىرىگە ئاسمانلاردىن ۋە زېمىندىن ھېچ رىزىق بېرەلمەيدىغان ۋە بۇنداق قىلىشقا ھەرگىزمۇ كۈچى يەتمەيدىغان ئويدۇرما ئىلاھلارغا ئىبادەت قىلىدۇ.‏
73




ئاللاھقا ھېچ نەرسىنى ئوخشاتماڭلار. چۈنكى ئاللاھ بىلىدۇ، سىلەر بىلمەيسىلەر.‏
74




ئاللاھ باشقىسىنىڭ مېلى ھېسابلىنىدىغان ۋە ھېچ نەرسىگە كۈچى يەتمەيدىغان قۇل بىلەن ئۆزى تەرىپىدىن ياخشى رىزىق بېرىلگەن ھەم ئۇ رىزىقتىن يوشۇرۇن ۋە ئاشكارا چىقىم قىلالايدىغان ھۆر كىشىنى مىسال قىلدى. بۇلار ئوخشاش بولامدۇ؟ ئاللاھقا ھەمدۇسانالار بولسۇن. بەلكى ئۇلارنىڭ كۆپىنچىسى بىلمەيدۇ.‏
75




ئاللاھ يەنە ئىككى كىشىنى مىسال قىلدى. بۇلارنىڭ بىرى گەپ قىلىش قابىلىيىتىگە ئىگە بولمىغان، ھېچ ئىشقا قولى كەلمەيدىغان، خوجايىنىغا يۈك بولۇپ قالغان، خوجايىنى قەيەرگە ئەۋەتسە بىرەر ئىش بېجىرەلمەيدىغان كىشىدۇر. بۇنداق كىشى ئىنسانلارنى ئادىل بولۇشقا بۇيرۇيدىغان ۋە توغرا يولدا ئالغا ئىلگىرىلەۋاتقان كىشى بىلەن ئوخشاش بولامدۇ؟
76




ئاسمانلارنىڭ ۋە زېمىننىڭ غەيبىنى پەقەتلا ئاللاھ بىلىدۇ. قىيامەتنىڭ قايىم بولۇشى پەقەت كۆزنى يۇمۇپ ئېچىشقىلا ئوخشاشتۇر ياكى ئۇنىڭدىنمۇ يېقىندۇر. شۈبھىسىزكى، ئاللاھ ھەر نەرسىگە قادىردۇر.‏
77




ئاللاھ سىلەرنى ئانىلىرىڭلارنىڭ قورساقلىرىدىن چىقاردى، سىلەر ئۇ چاغدا ھېچ نەرسە بىلمەيتتىڭلار. سىلەر ئۈچۈن ئاڭلاش قابىلىيىتىنى، كۆرۈش قابىلىيەتلىرىنى ۋە دىللارنى بار قىلدى. شۈكۈر قىلغايسىلەر!‏
78




ئۇلار ئاسمان بوشلۇقىدا ئۇچۇش ئىمكانىيىتى بېرىلگەن ئۇچارقاناتلارنى كۆرمەمدۇ؟ ئۇلارنى پەقەت ئاللاھ تۇتۇپ تۇرىدۇ. شۈبھىسىزكى، بۇنىڭدا ئىشىنىدىغان قەۋم ئۈچۈن ئايەتلەر بار.‏
79




ئاللاھ ئۆيلىرىڭلارنى سىلەرگە ئارامگاھ قىلىپ بەردى. ئاللاھ سىلەرگە تۆگە، كالا، قوي ۋە ئۆچكىلەرنىڭ تېرىلىرىدىن كۆچكەن كۈنۈڭلاردا ۋە تۇرغان كۈنۈڭلاردا ئېلىپ مېڭىشىڭلارغا ئەپلىك ئۆيلەرنى قىلىپ بەردى. ئاللاھ يەنە سىلەرگە ئۇ ماللارنىڭ يۇڭلىرىدىن، تىۋىتلىرىدىن ۋە چۇپۇرلىرىدىن كىيىم-كېچەكلەر ۋە بىر مۇددەتكىچە چىدايدىغان ئۆي سەرەمجانلىرىنى قىلىپ بەردى.‏
80




ئاللاھ ئۆزى ياراتقان نەرسىلىرىنىڭ بىر قىسمىدا سىلەر ئۈچۈن سايىلارنى قىلىپ بەردى، تاغلارنىڭ بىر قىسمىدا سىلەر ئۈچۈن ئۇۋىلارنى قىلىپ بەردى، يەنە سىلەر ئۈچۈن سىلەرنى ئىسسىقتىن ساقلايدىغان كىيىملەرنى ۋە سىلەرنى ئۇرۇشتا ساقلايدىغان كىيىملەرنى قىلىپ بەردى. ئاللاھ سىلەرگە نېمىتىنى ئەنە شۇنداق تاماملايدۇ. تەسلىم بولغايسىلەر! ‏
81




ئەگەر ئۇلار بۇنچە نېمەتلەرگە قارىماي يەنىلا يۈز ئۆرۈسە، سەن جاۋابكار ئەمەس. چۈنكى سېنىڭ ۋەزىپەڭ پەقەت روشەن تەبلىغ قىلىشتۇر.‏
82




ئۇلار ئاللاھنىڭ نېمىتىنى تونۇيدۇ، ئاندىن ئۇنى ئىنكار قىلىدۇ، ئۇلارنىڭ تولىسى كافىردۇر.‏
83




كۈن كېلىدۇ، بىز ھەر ئۇممەتتىن بىر شاھىت چىقىرىمىز. كافىرلارغا ئۆزرە ئېيتىشلىرى ئۈچۈن رۇخسەتمۇ بېرىلمەيدۇ، ئۆزرە ئېيتىشلىرى تەلەپمۇ قىلىنمايدۇ.‏
84




زالىملار ئازابنى كۆرگەن چاغدا، ئۇلاردىن ئازاب يىنىكلىتىلمەيدۇ ۋە ئۇلارغا مۆھلەت بېرىلمەيدۇ.‏
85




مۇشرىكلار ئۆزلىرىنىڭ ئاللاھقا كەلتۈرگەن شېرىكلىرىنى كۆرگەندە: «رەببىمىز! ئەنە شۇلار بىزنىڭ سېنى قويۇپ دۇئا قىلغان شېرىكلىرىمىزدۇر» دەيدۇ. ئۇ شېرىكلەر بولسا بۇ مۇشرىكلارغا رەددىيە بېرىپ: «سىلەر ھەقىقەتەن يالغانچىسىلەر!» دەيدۇ.‏
86




ئۇ كۈنى ئۇلار ئاللاھقا تەسلىم بولىدۇ، ئويدۇرغان ئىلاھلىرى ئۇلارنى تاشلىۋىتىدۇ.‏
87




بىز كافىر بولغان ۋە ئىنسانلارنى ئاللاھنىڭ يولىدىن توسقانلارنىڭ ئازابىنى قاتمۇقات ئارتتۇرىمىز. چۈنكى ئۇلار بۇزغۇنچىلىق قىلغان.‏
88




كۈن كېلىدۇ، ھەر ئۇممەتكە ئۆز ئىچىدىن ئۆزلىرىگە قارشى بىر شاھىت چىقىرىمىز. سېنىمۇ تەبلىغىڭ يەتكەنلەرگە قارشى شاھىت قىلىپ كەلتۈرىمىز. بىز ساڭا ھەر نەرسىنى ئېنىق بايان قىلىپ بېرىدىغان، ئاللاھقا تەسلىم بولغۇچىلارغا ھىدايەت، رەھمەت ۋە خۇش خەۋەر بولغان بۇ كىتابنى نازىل قىلدۇق.‏
89




شۈبھىسىزكى، ئاللاھ ئادىل بولۇشقا، ياخشىلىق قىلىشقا ۋە ئۇرۇق-تۇغقانلارغا ياردەم قىلىشقا بۇيرۇيدۇ. قەبىھ سۆز-ھەرىكەتلەردىن، يامانلىقتىن ۋە ناھەقچىلىكتىن توسىدۇ. ئاللاھ سىلەرگە نەسىھەت قىلىدۇ. ئېسىڭلاردا تۇتقايسىلەر!‏
90




ئاللاھ بىلەن ئەھدىلەشسەڭلار ئەھدىڭلارغا ۋاپا قىلىڭلار. ئاللاھنى ئۆزۈڭلارغا گۇۋاھچى قىلىپ تۇرۇپ مۇستەھكەملىگەن قەسەملىرىڭلارنى بۇزماڭلار. ئاللاھ قىلمىشىڭلارنى بىلىپ تۇرىدۇ.‏
91




يىپىنى پىششىق ئېگىرىپ بولۇپ چۇۋىۋەتكەن خوتۇندەك بولماڭلار. يەنى بىر ئۇممەتنىڭ يەنە بىر ئۇممەتتىن ئۈستۈن بولغانلىقىغا قاراپ، قەسەملىرىڭلار بىلەن بىر-بىرىڭلارنى ئالدىماڭلار. شۈبھىسىزكى، ئاللاھ سىلەرنى بۇنىڭ بىلەن ئىمتىھان قىلىدۇ. ئاللاھ سىلەر ئىختىلاپ قىلىشقان نەرسىنى قىيامەت كۈنى سىلەرگە ئېنىق بايان قىلىپ بېرىدۇ.‏
92




ئەگەر ئاللاھ خالىسا ئىدى، سىلەرنى بىر ئۇممەت قىلاتتى. لېكىن ئاللاھ خالىغان كىشىنى ئازدۇرىدۇ، خالىغان كىشىنى توغرا يولغا كەلتۈرىدۇ. سىلەر قىلمىشىڭلاردىن سورىلىسىلەر.‏
93




بىر-بىرىڭلارنى ئالداش ئۈچۈن قەسەم ئىچمەڭلار. بولمىسا يەرگە مۇستەھكەم دەسسەپ تۇرغان قەدىمىڭلار تېيىلىپ كېتىدۇ، ئىنسانلارنى ئاللاھنىڭ يولىدىن توسقانلىقىڭلار ئۈچۈن بېشىڭلارغا يامانلىق كېلىدۇ، ئاندىن چوڭ ئازابقا دۇچار بولىسىلەر.‏
94




ئاللاھقا بەرگەن ئەھدىڭلارنى ئازغىنە مەنپەئەت بەدىلىگە سېتىۋەتمەڭلار. ئەگەر بىلسەڭلار ئاخىرەتتە ئاللاھ بېرىدىغان مۇكاپات، سىلەر ئۈچۈن ھەقىقەتەن ياخشىدۇر.‏
95




سىلەرنىڭ ئىلكىڭلاردىكى نەرسىلەر تۈگەيدۇ، ئاللاھنىڭ ھۇزۇرىدىكى نەرسىلەر تۈگىمەيدۇ. بىز سەۋر قىلغانلارنى ئەمەللىرىنىڭ ئەڭ ياخشىسنى ئاساس قىلىپ تۇرۇپ مۇكاپاتلايمىز.‏
96




ئەر بولسۇن، ئايال بولسۇن كىم مۇئمىن بولغان ھالدا ياخشى ئىش قىلىدىكەن، بىز ئۇنى ئوبدان ياشىتىمىز، ئۇلارنى ئەمەللىرىنىڭ ئەڭ ياخشىسىنى ئاساس قىلىپ تۇرۇپ مۇكاپاتلايمىز.‏
97




قۇرئان ئوقۇيدىغان چېغىڭدا تاش ئېتىلغۇچى شەيتاندىن ئاللاھقا سېغىنغىن.‏
98




چۈنكى شەيتاننىڭ كۈچى ئىمان ئېيتقان ۋە رەببىگىلا تەۋەككۇل قىلىدىغان كىشىلەرگە ھەرگىزمۇ يەتمەيدۇ.‏
99




شەيتاننىڭ كۈچى پەقەت شەيتاننى ئۆزىنىڭ ۋەلىيسى قىلىدىغان كىشىلەر بىلەن ئاللاھقا شېرىك كەلتۈرگەن كىشىلەرگىلا يېتىدۇ.‏
100




بىز بىر ئايەتنى يەنە بىر ئايەتكە ئالماشتۇرغاندا- ئاللاھ ئۆزىنىڭ نازىل قىلىدىغان ئايەتلىرىنى ئوبدان بىلىدۇ-، ئۇ مۇشرىكلار ساڭا: «شۈبھىسىزكى، سەن ئويدۇرمىچىسەن» دېيىشتى. ئۇنداق ئەمەس، ئۇلارنىڭ تولىسى بىلمەيدۇ.‏
101




ئى مۇھەممەد! ئۇلارغا: «ئۇنى رەببىڭ تەرىپىدىن رۇھۇلقۇدۇسنىڭ ھەق بىلەن نازىل قىلغانلىقىنى، مەقسەتنىڭ مۇئمىنلارنىڭ ئىمانىنى كۈچەيتىش، ئاللاھقا تەسلىم بولغۇچىلارغا توغرا يولنى كۆرسىتىش ۋە خۇش خەۋەر يەتكۈزۈش ئىكەنلىكىنى» ئېيتقىن.‏
102




شۈبھىسىزكى، بىز ئۇلارنىڭ: «بۇ قۇرئاننى مۇھەممەدكە بىر ئىنسان ئۆگىتىدۇ» دېگەنلىكىنى بىلىپ تۇرىۋاتىمىز. ئۇلار مۇھەممەدنىڭ ئوقۇتقۇچىسى دەپ كۆرسەتكەن كىشىنىڭ تىلى ئەجەمچىدۇر، قۇرئان بولسا روشەن ئەرەبچىدۇر.‏
103




ئاللاھنىڭ ئايەتلىرىگە ئىشەنمەيدىغانلارنى ئاللاھ ھەرگىزمۇ توغرا يولغا كەلتۈرمەيدۇ. ئۇلارغا ئەلەملىك ئازاب بار.‏
104




يالغاننى پەقەت ئاللاھنىڭ ئايەتلىرىگە ئىشەنمەيدىغان كىشىلەرلا توقۇيدۇ. ئەنە شۇلار ھەقىقەتەن يالغانچىلاردۇر.‏
105




ئىمان ئېيتقاندىن كېيىن ئاللاھقا كافىر بولۇپ- قەلبى ئىمان بىلەن مۇستەھكەم تۇرۇپ زورلانغانلار مۇستەسنا-، كۆڭلىنى كۇفرىلىققا ئاچقانلارغا ئاللاھ تەرىپىدىن غەزەپ ياغىدۇ ھەمدە ئۇلار چوڭ ئازابقا دۇچار بولىدۇ.‏
106




بۇ ئۇلارنىڭ دۇنيا ھاياتىنى ئاخىرەت ھاياتىدىن ئۈستۈن كۆرگەنلىكى ۋە ئاللاھنىڭ كافىر قەۋمنى توغرا يولغا كەلتۈرمەيدىغانلىقى ئۈچۈندۇر.‏
107




ئەنە شۇلار ئاللاھ قەلبلىرىنى، ئاڭلاش قابىلىيىتىنى ۋە كۆرۈش قابىلىيەتلىرىنى پېچەتلىۋەتكەن كىشىلەردۇر. ئەنە شۇلار غاپىللاردۇر.‏
108




شۈبھىسىزكى، ئۇلار ئاخىرەتتە پۈتۈنلەي زىيان تارتقۇچىلاردۇر.‏
109




بۇلاردىن كېيىن شۇنى بىلگىنكى، رەببىڭ ئەزىيەتلەرگە دۇچ كەلگەندىن كېيىن ھىجرەت قىلغان، ئاندىن جىھاد قىلغان ۋە سەۋر قىلغانلارنىڭ ياردەمچىسىدۇر. رەببىڭ بۇ ياخشىلىقلاردىن كېيىن ئۇلارغا مەغپىرەت قىلغۇچىدۇر، كۆپ ئىنئام قىلغۇچىدۇر.‏
110




قىيامەت كۈنى ھەركىم ئۆزىنى ئاقلاشقا تىرىشدۇ ۋە ھەركىمگە ئۆز قىلمىشىنىڭ جازا ۋە مۇكاپاتى تولۇق بېرىلىدۇ، ھېچكىمگە زۇلۇم قىلىنمايدۇ.‏
111




ئاللاھ بىر يۇرتنى مىسال قىلدى. ئۇ تىنچ، خاتىرجەم، رىزقى ھەر تەرەپتىن كەڭتاشا كېلىپ تۇرىدىغان يۇرت ئىدى. لېكىن ئۇ يۇرتنىڭ ئاھالىسى ئاللاھنىڭ نېمەتلىرىگە تۇزكورلۇق قىلدى. ئاللاھ ئۇلارغا قىلمىشلىرى تۈپەيلى ئاچلىقنى ۋە قورقۇنچنى تېتىتتى. ئاچلىق ۋە قورقۇنچ كىيىم-كېچەكتەك ئۇلارنىڭ پۈتكۈل ۋۇجۇدىنى ئورىۋالدى.‏
112




ئۇلارغا ئۆز ئىچىدىن ئەلچى كەلدى، ئۇلار ئۇ ئەلچىنى يالغانچى دېدى، شۇنىڭ بىلەن ئۇلار ئازابقا يولۇقتى، ئۇلار ئۇ چاغدا زۇلۇم قىلۋاتقان ئىدى.‏
113




ئاللاھ سىلەرگە بەرگەن ھالال ۋە پاك رىزىقتىن يەڭلار. ئاللاھنىڭ نېمىتىگە شۈكۈر قىلىڭلار، ئەگەر ئاللاھقىلا ئىبادەت قىلىدىغان بولساڭلار.‏
114




ئاللاھ سىلەرگە پەقەت ئۆلتۈرۈپ يېگىلى بولىدىغان ھايۋانلاردىن ئۆزى ئۆلۈپ قالغىنىنى، قاننى، توڭگۇزنىڭ گۆشىنى ۋە ئاللاھتىن غەيرىينىڭ ئىسمى ئېيتىلىپ بوغۇزلانغان ھايۋاننىلا ھارام قىلدى. لېكىن چەكتىن ئاشمىغان ۋە ھەددىدىن ئاشمىغان ھالدا مەجبۇر بولۇپ قالغانلار ئۇلاردىن يېسە بولىدۇ. شۈبھىسىزكى، ئاللاھ مەغپىرەت قىلغۇچىدۇر، كۆپ ئىنئام قىلغۇچىدۇر.‏
115




تىللىرىڭلار توقۇغان يالغانغا ئاساسلىنىپ «ئۇ ھالال، بۇ ھارام» دېمەڭلار. بولمىسا ئاللاھقا يالغاننى چاپلىغان بولىسىلەر. ئاللاھقا يالغاننى چاپلىغانلار ھەرگىزمۇ مۇرادىغا يېتەلمەيدۇ.‏
116




بۇ ئازغىنە مەنپەئەتتۇر. ئۇلارغا ئەلەملىك ئازاب بار.‏
117




ئى مۇھەممەد! يەھۇدىيلارغا بىز ساڭا ئىلگىرى زىكىر قىلغان نەرسىلەرنى ھارام قىلغان ئىدۇق[9]. بۇنىڭ بىلەن بىز ئۇلارغا زۇلۇم قىلمىدۇق، لېكىن ئۇلار ئۆزلىرىگە ئۆزلىرى زۇلۇم قىلدى.‏
118




بۇلاردىن كېيىن شۇنى بىلگىنكى، رەببىڭ يامان ئىشنى بىلمەستىن قىلغان، لېكىن بۇنىڭ كەينىدىن تەۋبە قىلىپ ئۆزىنى ئىسلاھ قىلغانلارنىڭ ياردەمچىسىدۇر. ئۇلارنىڭ بۇ قىلمىشلىرىدىن كېيىن رەببىڭ مەغپىرەت قىلغۇچىدۇر، كۆپ ئىنئام قىلغۇچىدۇر.‏
119




شۈبھىسىزكى، ئىبراھىم بىر ئۇممەت ئىدى، ئاللاھقا ئىتائەتمەن ئىدى، ھەقكە يۆنەلگۈچى ئىدى، مۇشرىكلاردىن ئەمەس ئىدى،‏
120




ئاللاھنىڭ نېمەتلىرىگە شۈكۈر قىلغۇچى ئىدى. ئاللاھ ئۇنى تاللىدى ۋە توغرا يولغا باشلىدى.‏
121




بىز ئۇنىڭغا دۇنيادا ياخشىلىق ئاتا قىلدۇق. ئۇ ئاخىرەتتىمۇ چوقۇم ياخشىلارنىڭ قاتارىدا بولىدۇ.‏
122




ئاندىن كېيىن بىز ساڭا: «ھەقكە يۆنەلگەن ۋە مۇشرىكلاردىن بولمىغان ئىبراھىمنىڭ يولىغا ئەگەشكىن» دەپ ۋەھىي قىلدۇق.‏
123




شەنبە كۈنىنى دەم ئالىدىغان ۋە ئىبادەت قىلىدىغان كۈن قىلىش، بۇ توغرىدا ئىختىلاپ قىلىشقانلارغىلا بەلگىلەندى. شۈبھىسىزكى، رەببىڭ ئۇلار ئىختىلاپ قىلىشقان نەرسە ئۈستىدە قىيامەت كۈنى ئۇلارنىڭ ئارىسىدا ھۆكۈم چىقىرىدۇ.‏
124




سەن ئىنسانلارنى رەببىڭنىڭ يولىغا ھېكمەت بىلەن ۋە ياخشى نەسىھەت بىلەن دەۋەت قىلغىن، ئۇلار بىلەن ئەڭ چىرايلىق رەۋىشتە مۇنازىرىلەشكىن. رەببىڭ ئۆزىنىڭ يولىدىن ئېزىپ كەتكەنلەرنى ئوبدان بىلىدۇ، توغرا يولغا كەلگۈچىلەرنىمۇ ئوبدان بىلىدۇ.‏
125




ئەگەر جازالىساڭلار، سىلەرگە بېرىلگەن جازانىڭ ئوخشىشى بىلەن جازالاڭلار. ئەگەر سەۋر قىلساڭلار، بىلىڭلاركى، بۇ سەۋر قىلغۇچىلار ئۈچۈن ناھايىتى ياخشىدۇر.‏
126




سەۋر قىلغىن، سەۋر قىلىشىڭ پەقەت ئاللاھنىڭ ياردىمى بىلەنلا بولىدۇ. ئۇلارغا قايغۇرمىغىن ۋە ئۇلارنىڭ ھىيلە-مىكىرلىرىدىن يۈرىكىڭ سىقىلمىسۇن.‏
127




چۈنكى ئاللاھ تەقۋادارلىق قىلغانلار ۋە ياخشىلىق قىلغۇچىلار بىلەن بىللىدۇر.
128




Quran Uyghur Translation - www.uyquran.com - قۇرئان كەرىم ئۇيغۇرچە ئىزاھلىق تەرجىمىسى تور بىكىتى