ئۇيغۇرچە قۇرئان كەرىم توربىكىتى logo

بِسْمِ اللهِ الرَّحْمٰنِ الرَّحِيمِ‎

26- سۈرە شۇئەرا مەككەدە نازىل بولغان، 227 ئايەت

تا، سىن، مىم.‏
1




بۇلار روشەن كىتابنىڭ ئايەتلىرىدۇر.‏
2




ئى مۇھەممەد! ئۇلارنىڭ مۇئمىن بولمىغانلىقىدىن ئۆزۈڭنى ھالاك قىلىۋېتىشىڭ مۇمكىن!‏
3




خالىساق ئۇلارنىڭ ئۈستىگە ئاسماندىن ئايەت چۈشۈرىمىز- دە، بويۇنلىرى ئۇنىڭغا ئېگىلىدۇ.‏
4




ئۇلار رەھماندىن كەلگەن ھەر يېڭى زىكىردىن يۈز ئۆرۈيدۇ.‏
5




ئۇلار يەنە راستنى يالغان دېيىشتى. ئۇلار مەسخىرە قىلغان نەرسىنىڭ خەۋەرلىرى يېقىندا ئۇلارغا كېلىدۇ.‏
6




ئۇلار زېمىنغا قارىمىدىمۇ؟ بىز ئۇنىڭدا نۇرغۇن پايدىلىق ئۆسۈملۈكلەرنى ئۈندۈردۇق.‏
7




شۈبھىسىزكى، بۇنىڭدا چوقۇم ئايەت بار. لېكىن ئۇلارنىڭ تولىسى مۇئمىن بولمىدى.‏
8




شۈبھىسىزكى، سېنىڭ رەببىڭ ئەزىزدۇر، كۆپ ئىنئام قىلغۇچىدۇر.‏
9




ئۆز ۋاقتىدا رەببىڭ مۇساغا مۇنداق نىدا قىلدى: «زالىم قەۋمنىڭ يېنىغا بارغىن،
10




يەنى فىرئەۋننىڭ قەۋمىنىڭ يېنىغا بارغىن. ئۇلار تەقۋادار بولمامدۇ؟»‏
11




مۇسا مۇنداق دېدى: «رەببىم! ئۇلارنىڭ مېنى ‹يالغانچى› دېيىشىدىن قورقىمەن.‏
12




يۈرىكىم سىقىلىدۇ، تىلىم راۋان بولمايدۇ. شۇڭا ھارۇنغىمۇ ئەلچىلىك بەرگىن.‏
13




ئۇلارنىڭ ئالدىدا گۇناھىممۇ بار. شۇڭا ئۇلارنىڭ مېنى ئۆلتۈرۈۋېتىشىدىن قورقىمەن».‏
14




ئاللاھ مۇنداق دېدى: «ھەرگىز قورقمىغىن! ئىككىڭلار ئايەتلىرىمىزنى ئېلىپ بېرىڭلار، بىز سىلەر بىلەن بىللىمىز، ئاڭلاپ تۇرىمىز.‏
15




فىرئەۋننىڭ يېنىغا بېرىپ مۇنداق دەڭلار: ‹بىز ئالەملەرنىڭ رەببىنىڭ ئەلچىسىدۇرمىز.‏
16




ئىسرائىل ئەۋلادىنى بىز بىلەن بىللە كەتكىلى قويغىن›».‏
17




فىرئەۋن مۇنداق دېدى: «بىز سېنى بالا چېغىڭدا ئارىمىزغا ئېلىپ تەربىيەلىمىدۇقمۇ؟ ئۆمرۈڭدىن يىللارنى ئارىمىزدا تۇرۇپ ئۆتكۈزدۈڭ،
18




قىلغان ھېلىقى قىلمىشىڭنى قىلدىڭ. سەن تۇزكورلاردىنسەن!».‏
19




مۇسا ئېيتتى: «مەن ئۇ ئىشنى قىلغان چېغىمدا گۇمراھلاردىن ئىدىم.‏
20




سىلەردىن قاچتىم، چۈنكى سىلەردىن قورققان ئىدىم. رەببىم ماڭا توغرا ھۆكۈم چىقىرىش قابىلىيىتى ئاتا قىلدى ۋە مېنى ئەلچىلىرىدىن قىلدى.‏
21




سېنىڭ ماڭا مىننىتىنى قىلغان ياخشىلىقىڭ ئىسرائىل ئەۋلادىنى قۇل قىلىشىڭدىن بولغان».‏
22




فىرئەۋن: «ئالەملەرنىڭ رەببى دېگەن نېمە؟» دېدى.‏
23




مۇسا: «ئاسمانلارنىڭ، زېمىننىڭ ۋە ئۇ ئىككىسىنىڭ ئارىسىدىكى نەرسىلەرنىڭ رەببىدۇر. ئەگەر جەزمەن ئىشىنىدىغان بولساڭلار» دېدى.‏
24




فىرئەۋن چۆرىسىدىكىلەرگە: «ئاڭلاۋاتامسىلەر؟» دېدى.‏
25




مۇسا: «سىلەرنىڭمۇ رەببىڭلاردۇر، بۇرۇنقى ئاتا-بوۋىلىرىڭلارنىڭمۇ رەببىدۇر» دېدى.‏
26




فىرئەۋن: «شۈبھىسىزكى، سىلەرگە ئەۋەتىلگەن بۇ ئەلچىڭلار جىن چاپلىشىۋالغان ئادەمدۇر» دېدى.‏
27




مۇسا: «مەشرىقنىڭ، مەغرىبنىڭ ۋە ئۇلارنىڭ ئارىسىدىكى نەرسىلەرنىڭمۇ رەببىدۇر. ئەگەر ئەقلىڭلارنى ئىشلىتىدىغان بولساڭلار» دېدى. ‏
28




فىرئەۋن: «ئەگەر مەندىن باشقىسىنى ئىلاھ قىلىۋالىدىغان بولساڭ، سېنى چوقۇم زىندانغا تاشلانغۇچىلارنىڭ قاتارىدىن قىلىۋېتىمەن» دېدى[1].‏
29




مۇسا: «روشەن دەلىل كەلتۈرسەممۇ شۇنداق قىلامسەن؟» دېدى.‏
30




فىرئەۋن: «قېنى دەلىلىڭنى ئوتتۇرىغا قويغىن، ئەگەر راستچىللاردىن بولساڭ!» دېدى.‏
31




شۇنىڭ بىلەن مۇسا دەرھال ھاسىسىنى تاشلىدى. ئۇ بىردىنلا ھەقىقىي چوڭ يىلانغا ئايلاندى
32




ۋە قولىنى چىقاردى-دە، كۆرگۈچىلەرگە ئاپئاق كۆرۈندى.‏
33




فىرئەۋن چۆرىسىدىكى مەرتىۋىلىك كىشىلەرگە مۇنداق دېدى: «بۇ ھەقىقەتەن ئۇستا سېھىرگەر ئىكەن.‏
34




سىلەرنى يۇرتۇڭلاردىن چىقىرىۋەتمەكچى. نېمىگە بۇيرۇيسىلەر؟».‏
35




ئۇلار ئېيتتى: «ئۇنى ۋە قېرىندىشىنى نەزەربەند قىلغىن ۋە شەھەرلەرگە توپلىغۇچىلار يوللىغىن.‏
36




ئۇلار ئەڭ ئۇستا سېھىرگەرلەرنىڭ ھەممىسىنى يېنىڭغا ئېلىپ كەلسۇن».‏
37




شۇنىڭ بىلەن مەلۇم بىر كۈننىڭ بەلگىلەنگەن ۋاقتىدا بارلىق ئۇستا سېھىرگەرلەر توپلاندى.‏
38




ئىنسانلارغا مۇنداق دېيىلدى: «قېنى توپلىنىڭلار.‏
39




سېھىرگەرلەر غالىب كەلسە ئۇلارغا ئەگىشەرمىز».‏
40




شۇنىڭ بىلەن سېھىرگەرلەر كېلىپ فىرئەۋنگە: «ئەگەر غالىب كەلگۈچىلەر بىز بولساق، بىزگە چوقۇم مۇكاپات بېرىلىدۇ، شۇنداقمۇ؟» دېدى.‏
41




فىرئەۋن: «ئەلۋەتتە، ھەمدە چوقۇم يېقىنلىرىمدىن بولىسىلەر» دېدى.‏
42




مۇسا ئۇلارغا: «تاشلىماقچى بولغان نەرسەڭلەرنى تاشلاڭلار» دېدى.‏
43




ئۇلار ئارغامچىلىرىنى، ھاسىلىرىنى تاشلىدى ۋە: «فىرئەۋننىڭ ئىززىتى بىلەن قەسەمكى، بىز چوقۇم غالىب كېلىمىز» دېيىشتى.‏
44




ئاندىن مۇسا ھاسىسىنى تاشلىدى. ھاسا ئۇلارنىڭ ئويدۇرغان نەرسىلىرىنى بىردىنلا يالماپ يۇتۇۋەتتى.‏
45




شۇنىڭ بىلەن سېھىرگەرلەر ئۆزلىرىنى تۇتۇۋالالماي سەجدىگە باش قويۇپ،
46




مۇنداق دېيىشتى: «ئالەملەرنىڭ رەببىگە ئىمان ئېيتتۇق،‏
47




مۇسا ۋە ھارۇننىڭ رەببىگە!».‏
48




فىرئەۋن مۇنداق دېدى: «مەن سىلەرگە رۇخسەت قىلماستىن ئۇنىڭغا ئىمان ئېيتتىڭلار. دېمەككى، ئۇ سىلەرگە سېھىرنى ئۆگەتكەن بۈيۈكۈڭلاردۇر. يېقىندا كۆرگۈلۈكىڭلارنى كۆرىسىلەر. قوللىرىڭلارنى ۋە پۇتلىرىڭلارنى چوقۇم چاپراس شەكىلدە كەستۈرىمەن. ئاندىن كېيىن ھەممىڭلارنى چوقۇم دارغا ئاستۇرىمەن».‏
49




ئۇلار ئېيتتى: «ھېچ زىيان يوق. شۈبھىسىزكى، بىز رەببىمىزنىڭ ھۇزۇرىغا قايتقۇچى كىشىلەرمىز.‏
50




ئۈمىد قىلىمىزكى، رەببىمىز خاتالىقلىرىمىزنى مەغپىرەت قىلغاي! چۈنكى بىز مۇئمىنلارنىڭ ئاۋۋىلى بولدۇق».‏
51




بىز مۇساغا: «بەندىلىرىم بىلەن بىرلىكتە كېچىدە يولغا چىققىن. شۈبھىسىزكى، سىلەر ئىزدىلىسىلەر[2]» دەپ ۋەھىي قىلدۇق.‏
52




فىرئەۋن شەھەرلەرگە توپلىغۇچىلار ئەۋەتتى.‏
53




ئۇلارغا مۇنداق دېدى: «شۈبھىسىزكى، ئۇلار ئاز بىر ئوچۇم كىشىلەردۇر.‏
54




ھەقىقەتەن ئاچچىقىمىزنى كەلتۈرمەكتىدۇر.‏
55




بىز بولساق، ئېھتىياتچان بىر جامائەمىز».‏
56




نەتىجىدە بىز ئۇلارنى باغلاردىن ۋە بۇلاقلاردىن چىقىرىۋەتتۇق.‏
57




خەزىنىلەردىن ۋە ئېسىل ماقامدىن ئايرىۋەتتۇق.‏
58




ئىش ئاشۇنداق بولدى. بىز ئۇ نەرسىلەرنى ئىسرائىل ئەۋلادىغا مىراس قىلىپ بەردۇق.‏
59




فىرئەۋن ۋە ئادەملىرى ئۇلارنى كۈن چىقىپ ئەتراپنى يورۇتقاندا قوغلاپ كەلدى.‏
60




ئىككى تەرەپ بىر-بىرىنى كۆرگەن ئىدى، مۇسانىڭ قېرىنداشلىرى: «چوقۇم تۇتۇلۇپ قالدۇق» دېيىشتى.‏
61




مۇسا: «ھەرگىز! رەببىم مەن بىلەن بىللىدۇر. ئۇ ماڭا چوقۇم قۇتۇلۇش يولى كۆرسىتىدۇ» دېدى.‏
62




شۇنىڭ بىلەن بىز مۇساغا: «ھاساڭ بىلەن دېڭىزغا ئۇرغىن» دەپ ۋەھىي قىلدۇق. مۇسانىڭ ئۇرۇشى بىلەن دېڭىز ئىككىگە ئايرىلىپ، ھەر قىسمى چوڭ تاغدەك بولدى.‏
63




باشقىلارنى ئۇ يەرگە يېقىنلاشتۇردۇق.‏
64




مۇسانى ۋە ھەمراھلىرىنىڭ ھەممىسىنى قۇتقۇزدۇق.‏
65




ئاندىن باشقىلارنى غەرق قىلدۇق.‏
66




شۈبھىسىزكى، بۇنىڭدا چوقۇم ئايەت بار. لېكىن ئۇلارنىڭ تولىسى مۇئمىن بولمىدى.‏
67




شۈبھىسىزكى، رەببىڭ ئەزىزدۇر، كۆپ ئىنئام قىلغۇچىدۇر.‏
68




ئى مۇھەممەد! ئۇلارغا ئىبراھىمنىڭ خەۋىرىنى ئوقۇپ بەرگىن:‏
69




ئىبراھىم ئۆز ۋاقتىدا ئاتىسىغا ۋە قەۋمىگە: «نېمىگە چوقۇنىسىلەر؟» دېگەن ئىدى.‏
70




ئۇلار: «بۇتلارغا چوقۇنىمىز ۋە بۇ چوقۇنىشىمىزنى داۋاملاشتۇرىمىز» دېدى.‏
71




ئىبراھىم مۇنداق دېدى: «دۇئا قىلغان چېغىڭلاردا ئۇلار ئاۋازىڭلارنى ئاڭلامدۇ؟‏
72




ياكى ئۇلار سىلەرگە پايدا يەتكۈزەلەمدۇ؟ ۋە ياكى زىيان يەتكۈزەلەمدۇ؟».‏
73




ئۇلار: «ياق، ھېچبىرىنى قىلالمايدۇ. ئاتا-بوۋىلىرىمىز مۇشۇنداق قىلغان ئىكەن» دېيىشتى.‏
74




ئىبراھىم ئېيتتى: «چوقۇنغان نەرسىلىرىڭلار توغرىسىدا ئويلىنىپ باقتىڭلارمۇ؟‏
75




بۇرۇنقى ئاتا-بوۋىلىرىڭلارچۇ؟
76




بىلىڭلاركى، سىلەر چوقۇنغان نەرسىلەر مېنىڭ دۈشمىنىمدۇر. ئالەملەرنىڭ رەببى بۇنىڭدىن مۇستەسنا.‏
77




ئۇ مېنى ياراتقان زاتتۇر. ئۇ مېنى توغرا يولغا باشلايدۇ.‏
78




ئۇ شۇنداق زاتكى، ماڭا يېمەكلىك بېرىدۇ، ماڭا ئۇسسۇلۇق بېرىدۇ،‏
79




ئاغرىپ قالسام شىپالىق بېرىدۇ.‏
80




ئۇ شۇنداق زاتكى، مېنى ئۆلتۈرىدۇ، ئاندىن كېيىن تىرىلدۈرىدۇ.‏
81




ئۇ شۇنداق زاتكى، مەن ئۇنىڭ جازا ۋە مۇكاپات كۈنى خاتالىقلىرىمنى مەغپىرەت قىلىشىنى ئۈمىد قىلىمەن.‏
82




رەببىم! ماڭا توغرا ھۆكۈم چىقىرىش قابىلىيىتى ئاتا قىلغىن، مېنى ياخشىلار قاتارىدا قىلغىن،‏
83




ماڭا كېيىنكىلەر ئىچىدە ياخشى نام قالدۇرۇشنى ۋە ياخشىلىق بىلەن ياد ئېتىلىشنى نېسىپ قىلغىن.‏
84




مېنى نەئىم جەننىتىنىڭ ۋارىسلىرىدىن قىلغىن.‏
85




ئاتامغا مەغپىرەت قىلغىن. چۈنكى ئۇ ئازغۇنلاردىندۇر.‏
86




ئىنسانلار قايتا تىرىلدۈرۈلىدىغان كۈندە مېنى رەسۋا قىلمىغىن،‏
87




مال ۋە ئوغۇللار پايدا يەتكۈزەلمەيدىغان كۈندە.‏
88




ئاللاھنىڭ ھۇزۇرىغا ساغلام قەلب بىلەن كەلگەنلەر بۇنىڭدىن مۇستەسنا».‏
89




ئۇ كۈنى جەننەت تەقۋادارلارغا يېقىنلاشتۇرىلىدۇ.‏
90




دوزاخ ئازغۇنلارغا ئوچۇق كۆرسىتىلىدۇ.‏
91




ئۇلارغا مۇنداق دېيىلىدۇ: «چوقۇنغان نەرسىلىرىڭلار قەيەردە؟‏
92




ئاللاھتىن باشقا ئىلاھلىرىڭلار قېنى؟ ئۇلار ھازىر سىلەرگە ياردەم بېرەلەمدۇ؟ ياكى ئۆزلىرىگە ئۆزلىرى ياردەم بېرەلەمدۇ؟».‏
93




ئاندىن ئۇلار ۋە ئازغۇنلار دوزاخقا ئۈستى-ئۈستىلەپ تاشلىنىدۇ.‏
94




ئىبلىسنىڭ بارلىق قوشۇنلىرىمۇ تاشلىنىدۇ.‏
95




ئۇلار دوزاختا بىر-بىرى بىلەن تالاش-تارتىش قىلىشىپ مۇنداق دەيدۇ:‏
96




«ئاللاھ بىلەن قەسەمكى، بىز ھەقىقەتەن ئوپئوچۇق ئازغۇنلۇق ئىچىدە ئىكەنمىز.‏
97




چۈنكى بىز سىلەرنى ئالەملەرنىڭ رەببى بىلەن تەڭ كۆرەتتۇق.‏
98




بىزنى پەقەت شۇ گۇناھكارلار ئازدۇردى.‏
99




ئەمدى بىزنىڭ ھېچ شاپائەتچىمىز يوق،‏
100




سەمىمىي دوستىمىزمۇ يوق.‏
101




كاشكى دۇنياغا قايتىپ، مۇئمىنلاردىن بولساقچۇ!».‏
102




شۈبھىسىزكى، بۇنىڭدا ئايەت بار. لېكىن ئۇلارنىڭ تولىسى مۇئمىن بولمىدى.‏
103




شۈبھىسىزكى، رەببىڭ ئەزىزدۇر، كۆپ ئىنئام قىلغۇچىدۇر.‏
104




نۇھنىڭ قەۋمى ئەلچىلەرنى يالغانچى دېيىشتى.‏
105




ئۆز ۋاقتىدا ئۇلارغا قېرىندىشى نۇھ مۇنداق دېگەن ئىدى: «تەقۋادارلىق بولمامسىلەر؟
106




مەن سىلەرگە ئەۋەتىلگەن ئىشەنچلىك ئەلچىمەن.‏
107




ئاللاھقا تەقۋادارلىق قىلىڭلار، ماڭا ئىتائەت قىلىڭلار.‏
108




مەن بۇ تەبلىغ ئۈچۈن سىلەردىن ئەجىر تەلەپ قىلمايمەن. مېنىڭ ئەجرىمنى ئالەملەرنىڭ رەببى بېرىدۇ.‏
109




ئاللاھقا تەقۋادارلىق قىلىڭلار، ماڭا ئىتائەت قىلىڭلار».‏
110




ئۇلار: «بىز ساڭا ئىشىنەمدۇق؟ ساڭا ئەڭ تۆۋەن تەبىقىدىكى ئادەملەر ئەگەشكەن تۇرسا!» دېيىشتى.‏
111




نۇھ مۇنداق دېدى: «مەن ئۇلارنىڭ نېمە قىلغانلىقىنى بىلمەيمەن.‏
112




ئۇلاردىن ھېساب ئېلىش رەببىمنىڭ ئىشىدۇر. كاشكى ھېس قىلساڭلارچۇ!‏
113




مەن مۇئمىنلارنى يېنىمدىن قوغلىۋىتىدىغان كىشى ئەمەس.‏
114




مەن ئوپئوچۇق ئاگاھلاندۇرغۇچى».‏
115




ئۇلار: «ئى نۇھ! ئەگەر بۇ سۆزلىرىڭدىن يانمىساڭ، چوقۇم چالما-كېسەك قىلىپ ئۆلتۈرۈلگۈچىلەردىن بولىسەن» دېدى.‏
116




نۇھ مۇنداق دېدى: «رەببىم! قەۋمىم مېنى يالغانچى دېدى.‏
117




مەن بىلەن ئۇلارنىڭ ئارىسىدا ھۆكۈم چىقارغىن، مېنى ۋە مەن بىلەن بىللە بولغان مۇئمىنلارنى قۇتقۇزغىن».‏
118




شۇنىڭ بىلەن بىز ئۇنى ۋە ئۇنىڭ بىلەن بىللە بولغانلارنى توشقۇزۇلغان كېمىدە قۇتقۇزدۇق.‏
119




ئاندىن قالغانلارنى غەرق قىلدۇق.‏
120




شۈبھىسىزكى، بۇنىڭدا چوقۇم ئايەت بار. لېكىن ئۇلارنىڭ تولىسى مۇئمىن بولمىدى.‏
121




شۈبھىسىزكى، رەببىڭ ئەزىزدۇر، كۆپ ئىنئام قىلغۇچىدۇر.‏
122




ئاد قەۋمى ئەلچىلەرنى يالغانچى دېيىشتى.‏
123




ئۆز ۋاقتىدا ئۇلارغا قېرىندىشى ھۇد مۇنداق دېگەن ئىدى: «تەقۋادار بولمامسىلەر؟
124




مەن سىلەرگە ئەۋەتىلگەن ئىشەنچلىك ئەلچىمەن.‏
125




ئاللاھقا تەقۋادارلىق قىلىڭلار، ماڭا ئىتائەت قىلىڭلار.‏
126




مەن بۇ تەبلىغ ئۈچۈن سىلەردىن ئەجىر تەلەپ قىلمايمەن. مېنىڭ ئەجرىمنى ئالەملەرنىڭ رەببى بېرىدۇ.‏
127




سىلەر ھەر ئېگىز جايغا ئويۇن-تاماشا ئۈچۈن ھەيۋەتلىك بىنا سالامسىلەر؟
128




ئۆلمەسلىك ئۈمىدى بىلەن مۇستەھكەم سارايلار سالامسىلەر؟‏
129




جازالىساڭلار، زۇلۇم قىلغان ھالدا جازالايسىلەر!‏
130




ئاللاھقا تەقۋادارلىق قىلىڭلار، ماڭا ئىتائەت قىلىڭلار.‏
131




سىلەرگە، سىلەر بىلىدىغان نېمەتلەرنى ئاتا قىلغان زاتقا تەقۋادارلىق قىلىڭلار.‏
132




ئۇ سىلەرگە تۆگە، كالا، قوي، ئۆچكە ۋە ئوغۇللار ئاتا قىلدى.‏
133




باغلار ۋە بۇلاقلار بەردى.‏
134




مەن سىلەرنىڭ ئۈستۈڭلارغا بۈيۈك كۈننىڭ ئازابى چۈشۈشتىن قورقۇۋاتىمەن».‏
135




ئۇلار مۇنداق دېدى: «ۋەز-نەسىھەت قىلامسەن ياكى ۋەز-نەسىھەت قىلغۇچىلاردىن بولمامسەن، بىز ئۈچۈن بەرىبىر.‏
136




بۇ پەقەت بۇرۇنقىلارنىڭ ئادىتى، خالاس.‏
137




بىزگە ھەرگىزمۇ ئازاب قىلىنمايدۇ».‏
138




دېمەك، ئۇلار ھۇدنى يالغانچى دېدى. شۇنىڭ بىلەن بىز ئۇلارنى ھالاك قىلدۇق. شۈبھىسىزكى، بۇنىڭدا چوقۇم ئايەت بار. لېكىن ئۇلارنىڭ تولىسى مۇئمىن بولمىدى.‏
139




شۈبھىسىزكى، رەببىڭ ئەزىزدۇر، كۆپ ئىنئام قىلغۇچىدۇر.‏
140




سەمۇد قەۋمى ئەلچىلەرنى يالغانچى دېدى.‏
141




ئۆز ۋاقتىدا ئۇلارغا قېرىندىشى سالىھ مۇنداق دېگەن ئىدى: «تەقۋادار بولمامسىلەر؟
142




مەن سىلەرگە ئەۋەتىلگەن ئىشەنچلىك ئەلچىمەن.‏
143




ئاللاھقا تەقۋادارلىق قىلىڭلار، ماڭا ئىتائەت قىلىڭلار.‏
144




مەن بۇ تەبلىغ ئۈچۈن سىلەردىن ئەجىر تەلەپ قىلمايمەن. مېنىڭ ئەجرىمنى ئالەملەرنىڭ رەببى بېرىدۇ.‏
145




سىلەر بۇ يەردە خاتىرجەم قويۇۋېتىلەمسىلەر؟‏
146




باغلار ۋە بۇلاقلاردىن،‏
147




زىرائەتلەر ۋە يۇمشاق پىشقان خورمىلاردىن بەھرىمەن بولارمىز دەپ ئويلامسىلەر؟
148




تاغلاردىن ئۇستىلىق بىلەن ئويۇپ ئۆيلەر ياسارمىز دەمسىلەر؟
149




ئاللاھقا تەقۋادارلىق قىلىڭلار، ماڭا ئىتائەت قىلىڭلار.‏
150




ھەددىدىن ئاشقۇچىلارنىڭ ئەمرىگە ئىتائەت قىلماڭلار.‏
151




ئۇلار شۇنداق كىشىلەركى زېمىندا بۇزغۇنچىلىق قىلىدۇ، ئىسلاھ قىلمايدۇ».‏
152




ئۇلار مۇنداق دېدى: «سەن قاتتىق سېھىرلەنگەنلەردىنسەن.‏
153




سەن خۇددى بىزگە ئوخشاشلا ئىنسان. ئەگەر راستچىللاردىن بولساڭ قېنى بىرەر ئايەت[3] كەلتۈرۈپ باققىن!»‏
154




سالىھ ئېيتتى: «ئۇ ئايەت بۇ چىشى تۆگىدۇر. ئۇنىڭ بىر كۈن سۇ ئىچىش نۆۋىتى بار، سىلەرنىڭمۇ مۇئەييەن بىر كۈن سۇ ئىچىش نۆۋىتىڭلار بار.‏
155




ئۇنىڭغا يامانلىق قىلماڭلار، بولمىسا سىلەرگە بۈيۈك كۈننىڭ ئازابى چۈشىدۇ».‏
156




ئۇلار بۇنىڭغا قارىماي ئۇ تۆگىنى پۇتلىرىنى كېسىپ ئۆلتۈردى، ئارقىسىدىنلا پۇشايمان قىلدى.‏
157




شۇنىڭ بىلەن ئۇلارغا ئازاب چۈشتى. شۈبھىسىزكى، بۇنىڭدا چوقۇم ئايەت بار. لېكىن ئۇلارنىڭ تولىسى مۇئمىن بولمىدى.‏
158




شۈبھىسىزكى، رەببىڭ ئەزىزدۇر، كۆپ ئىنئام قىلغۇچىدۇر.‏
159




لۇتنىڭ قەۋمى ئەلچىلەرنى يالغانچى دېيىشتى.‏
160




ئۆز ۋاقتىدا ئۇلارغا قېرىندىشى لۇت مۇنداق دېگەن ئىدى: «تەۋادار بولمامسىلەر؟
161




مەن سىلەرگە ئەۋەتىلگەن ئىشەنچلىك ئەلچىمەن.‏
162




ئاللاھقا تەقۋادارلىق قىلىڭلار، ماڭا ئىتائەت قىلىڭلار.‏
163




مەن بۇ تەبلىغ ئۈچۈن سىلەردىن ئەجىر تەلەپ قىلمايمەن. مېنىڭ ئەجرىمنى ئالەملەرنىڭ رەببى بېرىدۇ.‏
164




سىلەر پۈتۈن ئالەم ئىچىدىن ئەرلەر بىلەن بىر يەردە بولامسىلەر؟‏
165




رەببىڭلار سىلەر ئۈچۈن ياراتقان ئاياللىرىڭلارنى تەرك ئېتەمسىلەر؟ بەلكى سىلەر ھەددىدىن ئاشقۇچى قەۋمسىلەر».‏
166




ئۇلار: «ئى لۇت! ئەگەر بۇ سۆزلىرىڭدىن يانمىساڭ، چوقۇم سۈرگۈن قىلىنغۇچىلاردىن بولىسەن» دېدى.‏
167




لۇت مۇنداق دېدى: «مەن سىلەرنىڭ قىلىمىشىڭلارنى قاتتىق يامان كۆرگۈچىلەردىنمەن.‏
168




رەببىم! مېنى ۋە ئائىلە-تاۋابىئاتىمنى ئۇلارنىڭ قىلمىشلىرىدىن قۇتقۇزغىن».‏
169




شۇنىڭ بىلەن بىز ئۇنى ۋە ئۇنىڭ ئائىلە-تاۋابىئاتىنىڭ ھەممىسىنى قۇتقۇزدۇق.‏
170




ھالاك بولغۇچىلارنىڭ ئارىسىدا قالغان موماي بۇنىڭدىن مۇستەسنا.‏
171




ئاندىن باشقىلارنى ھالاك قىلدۇق.‏
172




ئۇلارنىڭ ئۈستىگە بىر تۈرلۈك يامغۇر ياغدۇردۇق. ئاگاھلاندۇرۇلغان ئۇ كىشىلەرنىڭ يامغۇرى نېمىدېگەن يامان!‏
173




شۈبھىسىزكى، بۇنىڭدا چوقۇم ئايەت بار. لېكىن ئۇلارنىڭ تولىسى مۇئمىن بولمىدى.‏
174




شۈبھىسىزكى، رەببىڭ ئەزىزدۇر، كۆپ ئىنئام قىلغۇچىدۇر.‏
175




ئەيكەلىكلەر ئەلچىلەرنى يالغانچى دېيىشتى[4].‏
176




ئۆز ۋاقتىدا ئۇلارغا شۇئەيب مۇنداق دېگەن ئىدى: «تەقۋادار بولمامسىلەر؟
177




مەن سىلەرگە ئەۋەتىلگەن ئىشەنچلىك ئەلچىمەن.‏
178




ئاللاھقا تەقۋادارلىق قىلىڭلار، ماڭا ئىتائەت قىلىڭلار.‏
179




مەن بۇ تەبلىغ ئۈچۈن سىلەردىن ئەجىر تەلەپ قىلمايمەن. مېنىڭ ئەجرىمنى ئالەملەرنىڭ رەببى بېرىدۇ.‏
180




كەمچەننى تولۇق تۇتۇڭلار، زىيان تارتقۇزغۇچىلاردىن بولماڭلار.‏
181




توغرا ئۆلچەم بىلەن ئېغىرلىق ئۆلچەڭلار.‏
182




ئىنسانلارنىڭ نەرسىلىرىنى كەم بەرمەڭلار، بۇ زېمىندا بۇزغۇنچىلىق قىلىپ، قالايمىقانچىلىق چىقارماڭلار.‏
183




سىلەرنى ۋە ئىلگىرىكى خەلقلەرنى ياراتقان زاتقا تەقۋادارلىق قىلىڭلار.‏
184




ئۇلار مۇنداق دېدى: «شۈبھىسىزكى، سەن قاتتىق سېھىرلەنگەنلەردىنسەن.‏
185




سەن خۇددى بىزگە ئوخشاشلا ئىنسان. بىزنىڭچە سەن چوقۇم يالغانچىلاردىن.‏
186




ئەگەر راستچىللاردىن بولساڭ، ئۈستىمىزگە ئاسماندىن پارچىلار چۈشۈرگىن».‏
187




شۇئەيب: «رەببىم قىلمىشىڭلارنى ئوبدان بىلىدۇ» دېدى.‏
188




دېمەك، ئۇلار شۇئەيبنى يالغانچى دېيىشتى. شۇنىڭ بىلەن ئۇلارنى سايە كۈنىنىڭ ئازابى تۇتتى. ئۇ ھەقىقەتەن چوڭ كۈننىڭ ئازابى ئىدى.‏
189




شۈبھىسىزكى، بۇنىڭدا چوقۇم ئايەت بار. لېكىن ئۇلارنىڭ تولىسى مۇئمىن بولمىدى.‏
190




شۈبھىسىزكى، رەببىڭ ئەزىزدۇر، كۆپ ئىنئام قىلغۇچىدۇر.‏
191




شۇبھىسىزكى، قۇرئان ئالەملەرنىڭ رەببى تەرىپىدىن نازىل قىلىنغان.‏
192




ئۇنى ئىشەنچلىك رۇھ ئېلىپ چۈشتى، ‏
193




ئاگاھلاندۇرغۇچىلاردىن بولۇشۇڭ ئۈچۈن سېنىڭ قەلبىڭگە ئېلىپ چۈشتى،
194




ئوچۇق ئەرەب تىلى بىلەن.‏
195




شۈبھىسىزكى، قۇرئان چوقۇم بۇرۇنقىلارنىڭ كىتابلىرىدىدۇر.‏
196




بەنى ئىسرائىل ئۆلىمالىرىنىڭ قۇرئاننى بىلىشى ئۇلار ئۈچۈن دەلىل بولمامدۇ؟
197




ئەگەر بىز قۇرئاننى ئەجەملەرنىڭ بىرىگە نازىل قىلغان بولساق،‏
198




قۇرئاننى ئۇلارغا ئۇ ئوقۇغان بولسا، ئۇلار ئۇنىڭغا يەنىلا ئىشەنمەيتتى.‏
199




بىز قۇرئاننى گۇناھكارلارنىڭ قەلبلىرىگە ئەنە شۇنداق كىرگۈزدۇق.‏
200




ئۇلار قۇرئانغا ئەلەملىك ئازابنى كۆرمىگۈچە ئىشەنمەيدۇ.‏
201




ئازاب ئۇلارغا ئۇشتۇمتۇت كېلىدۇ. ئۇلار تۇيماي قالىدۇ.‏
202




ئۇ چاغدا ئۇلار: «بىزگە مۆھلەت بېرىلەمدۇ؟» دەيدۇ.‏
203




ئۇلار ئازابىمىزنىڭ تېز كېلىشىنى تەلەپ قىلامدۇ؟
204




ئېيتىپ باققىنا! بىز ئۇلارنى ئۇزۇن يىل نازۇنېمەتلەر ئىچىدە ياشاتساق،‏
205




ئاندىن كېيىن ئۇلارغا، ئۇلارنىڭ بېشىغا كېلىشى ۋەدە قىلىنغان ئازاب كەلسە،‏
206




ئۇلارنىڭ ئۇ نازۇنېمەتلەر ئىچىدە ئۆتكەن ھاياتى بىر نەرسىگە ئەسقاتامدۇ؟
207




بىز ھېچبىر يۇرتنى ئاگاھلاندۇرغۇچىلىرى بولماستىن ھالاك قىلمىدۇق.‏
208




ھەر بىرىگە ئەسلىتىلدى. بىز زۇلۇم قىلمىدۇق.‏
209




قۇرئاننى شەيتانلار ئېلىپ چۈشمىدى.‏
210




بۇ ئۇلار قىلىدىغان ئىش ئەمەس، ئۇلار بۇنىڭغا قادىرمۇ بولالمايدۇ.‏
211




چۈنكى ئۇلار ۋەھىينى تىڭشاشتىن مەنئى قىلىنغان.‏
212




ئۇنداقتا ئاللاھقا قوشۇپ باشقا ئىلاھقا دۇئا قىلمىغىن! بولمىسا ئازاب قىلىنغۇچىلاردىن بولىسەن.‏
213




ئەڭ يېقىن تۇغقانلىرىڭنى ئاگاھلاندۇرغىن.‏
214




ساڭا ئەگەشكەن مۇئمىنلارغا كەمتەر بولغىن.‏
215




ئەگەر ئۇ تۇغقانلىرىڭ ساڭا ئاسىيلىق قىلسا ئۇلارغا: «مەن سىلەرنىڭ قىلمىشىڭلاردىن ئادا-جۇدامەن» دېگىن.‏
216




ئەزىز ۋە كۆپ ئىنئام قىلغۇچى ئاللاھقا تەۋەككۇل قىلغىن.‏
217




ئۇ شۇنداق زاتكى سېنى قەيەردە تۇرساڭ كۆرىدۇ.‏
218




سەجدە قىلغۇچىلارنىڭ ئارىسىدىكى ھەرىكەتلىرىڭنىمۇ كۆرىدۇ.‏
219




چۈنكى ئۇ ئاڭلاپ تۇرغۇچىدۇر، بىلىپ تۇرغۇچىدۇر.‏
220




مەن سىلەرگە شەيتانلارنىڭ كىمگە چۈشىدىغانلىقىنى ئېيتىپ بېرەيمۇ؟
221




ئۇلار بوھتان چاپلاشقا ۋە گۇناھ قىلىشقا ھېرىسمەن ھەر كىشىگە چۈشىدۇ.‏
222




ئۇلار شەيتانلارغا قۇلاق سالىدۇ. ئۇلارنىڭ تولىسى يالغانچىدۇر.‏
223




شائىرلارغا ئازغۇنلار ئەگىشىدۇ.‏
224




قارىغىنا! ئۇلار ھەر ۋادىدا تېڭىرقاپ يۈرۈيدۇ.‏
225




ئۇلار ئۆزلىرى قىلمىغان ۋە قىلمايدىغان نەرسىلەرنى سۆزلەيدۇ.‏
226




لېكىن ئىمان ئېيتقان، ياخشى ئەمەللەرنى قىلغان، ئاللاھنى كۆپ زىكىر قىلغان ۋە زۇلۇمغا ئۇچرىغاندىن كېيىن ئىنتىقام ئالغان شائىرلار ئۇنداق ئەمەس. زالىملار يېقىندا‏‎ ‎‏ ئۆزلىرىنىڭ تامامەن يىقىلىدىغانلىقىنى بىلىدۇ.‏
227




Quran Uyghur Translation - www.uyquran.com - قۇرئان كەرىم ئۇيغۇرچە ئىزاھلىق تەرجىمىسى تور بىكىتى