ئۇيغۇرچە قۇرئان كەرىم توربىكىتى logo

بِسْمِ اللهِ الرَّحْمٰنِ الرَّحِيمِ‎

27- سۈرە نەمل مەككەدە نازىل بولغان، 93 ئايەت

تا، سىن. بۇ قۇرئاننىڭ ۋە روشەن كىتابنىڭ ئايەتلىرىدۇر.‏
1




مۇئمىنلارغا توغرا يولنى كۆرسەتكۈچىدۇر ۋە خۇش خەۋەر بەرگۈچىدۇر.‏
2




ئۇلار شۇنداق كىشىلەركى، نامازنى تولۇق ۋە داۋاملىق ئۆتەيدۇ، زاكاتنى بېرىدۇ ۋە ئاخىرەتكە جەزمەن ئىشىنىدۇ. ‏
3




ئاخىرەتكە ئىشەنمەيدىغانلار بولسا، بىز ئۇلارغا ئۆز قىلمىشلىرىنى چىرايلىق كۆرسەتتۇق. بۇ سەۋەبتىن ئۇلار تېڭىرقاپ يۈرۈيدۇ.‏
4




ئەنە شۇلار ئەڭ يامان ئازابقا دۇچار بولىدىغان كىشىلەردۇر. ئۇلار ئاخىرەتتىمۇ ئەڭ ئېغىر زىيان تارتقۇچىلاردۇر.‏
5




شۈبھىسىزكى، قۇرئان ساڭا ھېكمەت بىلەن ئىش قىلغۇچى ۋە ھەر نەرسىنى بىلگۈچى ئاللاھ تەرىپىدىن بېرىلمەكتىدۇر.‏
6




ئۆز ۋاقتىدا مۇسا ئائىلىسىگە: «مەن يىراقتا ئوت كۆردۈم. بېرىپ ئۇنىڭ يېنىدىن سىلەرگە خەۋەر ئېلىپ كېلەي، ياكى سىلەرگە ئۇنىڭدىن بىر پارچە چوغ ئېلىپ كېلەي، ئىسسىنارسىلەر» دېدى.‏
7




شۇنىڭ بىلەن مۇسا ئوتنىڭ يېنىغا كەلگەن ئىدى، مۇنداق دەپ نىدا قىلىندى: «ئوتنىڭ يېنىدىكىلەر ۋە ئەتراپىدىكىلەر مۇبارەك قىلىندى. ئالەملەرنىڭ رەببى ئاللاھ پاكتۇر.‏
8




ئى مۇسا! مەن ئەزىز ۋە ھېكمەت بىلەن ئىش قىلغۇچى ئاللاھتۇرمەن.‏
9




ھاساڭنى تاشلىغىن». مۇسا يەرگە چۈشكەن ھاسىسىنىڭ خۇددى يىلاندەك تولغىنىپ مېڭىۋاتقانلىقىنى كۆرگەندە، ئارقىسىغا بۇرۇلۇپ قېچىشقا باشلىدى ۋە قايتمىدى. بۇ ئەسنادا ئۇنىڭغا مۇنداق دېيىلدى: «ئى مۇسا! قورقمىغىن، مېنىڭ ھۇزۇرۇمدا ئەلچىلىرىم قورقمايدۇ.‏
10




مەندىن قورقىدىغانلار زالىملاردۇر. لېكىن بۇلارمۇ يامانلىقتىن كېيىن ئۇنى ياخشىلىققا ئۆزگەرتسە، مەن ئۇلارغا مەغپىرەت قىلغۇچىمەن، كۆپ ئىنئام قىلغۇچىمەن.‏
11




قولۇڭنى قوينۇڭغا تىققىن، نۇقسانسىز ھالدا ئاپئاق چىقىپ فىرئەۋنگە ۋە ئۇنىڭ قەۋمىگە كۆرسىتىلىدىغان توققۇز ئايەتنىڭ بىرى بولسۇن. شۈھىسىزكى، ئۇلار ھەقىقەتەن فاسىق قەۋمدۇر».‏
12




ھەقنى كۆرسىتىدىغان ئايەتلىرىمىز ئۇلارغا كەلگەندە، ئۇلار: «بۇ ئوچۇق- ئاشكارا سېھىردۇر» دېيىشتى.‏
13




ئۇلار ئىچىدە ئۇ ئايەتلىرىگە قەتئىي ئىشىنىپ تۇرۇپ، زالىملىقىدىن ۋە ئۆزلىرىنى چوڭ تۇتقانلىقىدىن ئۇلارنى ئىنكار قىلدى. قارىغىنا، ئۇ بۇزغۇنچىلارنىڭ ئاقىۋىتى قانداق بولدى.‏
14




بىز داۋۇدقا ۋە سۇلەيمانغا ئىلىم ئاتا قىلدۇق. ئۇ ئىككىسى: «بىزنى مۇئمىن بەندىلىرىنىڭ تولىسىدىن ئۈستۈن قىلغان ئاللاھقا ھەمدۇسانالار بولسۇن!» دېدى.‏
15




سۇلەيمان داۋۇدقا ۋارىس بولدى ۋە مۇنداق دېدى: «ئى ئىنسانلار! بىزگە قۇشلارنىڭ تىلى ئۆگىتىلدى، بىزگە ھەر نەرسىدىن بېرىلدى. بۇ ئاشكارا پەزلدۇر».‏
16




سۇلەيماننىڭ جىنلاردىن، ئىنسانلاردىن ۋە قۇشلاردىن بولغان قوشۇنلىرى ھۇزۇرىدا توپلىنىپ، قىسىملارغا ئايرىلغان ئىدى.‏
17




ئۇلار ئىنتىزاملىق ھالدا مېڭىپ، چۈمۈلىلەر ۋادىسىغا كەلگەندە، بىر چىشى چۈمۈلە مۇنداق دېدى: «ئى چۈمۈلىلەر! ئۇۋىلىرىڭلارغا كىرىپ كېتىڭلار، سۇلەيمان ۋە ئۇنىڭ قوشۇنلىرى تۇيماستىن سىلەرنى ئېزىۋەتمىسۇن».‏
18




سۇلەيمان چۈمۈلىنىڭ بۇ سۆزىدىن تەبەسسۇم قىلىپ كۈلدى ۋە مۇنداق دېدى: «رەببىم! مېنى، ماڭا ۋە ئاتا-ئانامغا ئىنئام قىلغان نېمىتىڭگە شۈكۈر ئېيتىشقا، سەن رازى بولىدىغان ياخشى ئەمەلنى قىلىشقا قىزىقتۇرغىن. مېنى ئۆز رەھمىتىڭ بىلەن ياخشى بەندىلىرىڭ قاتارىغا كىرگۈزگىن».‏
19




سۇلەيمان قۇشلارنى كۆزدىن كەچۈردى ۋە مۇنداق دېدى: «ماڭا نېمە بولدىكىن، ھۆپۈپنى كۆرمەيۋاتىمەنغۇ! يا ئۇ غايىب بولغۇچىلاردىن بولدىمۇ؟
20




ئۇنى قاتتىق ئازابلايمەن، يا ئۇنى بوغۇزلىۋېتىمەن يا ئۇ ماڭا روشەن دەلىل كەلتۈرىدۇ».‏
21




ھۆپۈپ ئۇزۇن ئۆتمەيلا كېلىپ مۇنداق دېدى: «مەن سەن بىلمىگەن بىر نەرسىنى ئۆگەندىم ۋە ساڭا سەبەئدىن توغرا خەۋەر ئېلىپ كەلدىم:‏
22




مەن ئۇ يەرنىڭ ئاھالىسىگە پادىشاھلىق قىلىۋاتقان بىر ئايالنى ئۇچراتتىم، ئۇنىڭغا ھەر نەرسىدىن بېرىلگەن ئىكەن، ئۇنىڭ چوڭ تەختى بار ئىكەن.‏
23




بايقىشىمچە، ئۇ ۋە ئۇنىڭ قەۋمى ئاللاھنى قويۇپ قۇياشقا سەجدە قىلىدىكەن. شەيتان ئۇلارغا ئەمەللىرىنى چىرايلىق كۆرسىتىپ، ئۇلارنى توغرا يولدىن توسۇپتۇ. بۇ سەۋەبتىن ئۇلار ھىدايەت تاپالمايۋېتىپتۇ.‏
24




ئۇلارنىڭ ئاسمانلاردىكى ۋە زېمىندىكى سىرلارنى ئوتتۇرىغا چىقىرىدىغان، سىلەرنىڭ يوشۇرۇن ۋە ئاشكارا قىلغان پۈتۈن قىلمىشىڭلارنى بىلىپ تۇرىدىغان ئاللاھقا سەجدە قىلىشلىرى كېرەك ئەمەسمىدى؟
25




ئاللاھ يەككە-يېگانە ئىلاھتۇر، بۈيۈك ئەرشنىڭ رەببىدۇر».‏
26




سۇلەيمان مۇنداق دېدى: «راست سۆزلىدىڭمۇ ياكى يالغانچىلاردىن بولدۇڭمۇ؟ كۆرىمىز.‏
27




بۇ خېتىمنى ئېلىپ بېرىپ ئۇلارغا تاشلىغىن، ئاندىن ئۇلاردىن يىراقلىشىپ نېمە دېيىشىدىغانلىقىغا قارىغىن».‏
28




ئۇ مەلىكە مۇنداق دېدى: «ئى دۆلەت ئەركانلىرى! ماڭا ناھايىتى قىممەتلىك بىر پارچە خەت تاشلاندى.‏
29




ئۇ خەت سۇلەيماندىن كەلدى ۋە مۇنداق يېزىلغان ئىكەن: ‹ياخشىلىقى چەكسىز، ئىنئامى كۆپ ئاللاھنىڭ ئىسمى بىلەن باشلايمەن.‏
30




ماڭا ھاكاۋۇرلۇق قىلماڭلار، تەسلىم بولغان ھالدا يېنىمغا كېلىڭلار›».‏
31




مەلىكە يەنە: «ئى دۆلەت ئەركانلىرى! ماڭا يول كۆرسىتىڭلار، نېمە قىلىشىم كېرەك؟ مەن ھازىرغىچە سىلەر بىلەن كېڭەشمەستىن ھېچبىر ئىش توغرىسىدا كەسكىن قارار بەرمىدىم» دېدى.‏
32




ئۇلار: «بىز كۈچلۈك ۋە جەڭگىۋار خەلقمىز، ھوقۇق سىزدە، نېمىگە بۇيرۇيدىغانلىقىڭىزنى ئۆزىڭىز ئويلاپ كۆرۈڭ» دېدى.‏
33




مەلىكە مۇنداق دېدى: «شۈبھىسىزكى، پادىشاھلار بىرەر يۇرتقا كىرسە ئۇ يەرنى بۇزىدۇ ۋە ئۇ يەرنىڭ ئەزىز كىشىلىرىنى خار قىلىدۇ. ئۇلارمۇ شۇنداق قىلىدۇ.‏
34




مەن ئۇلارغا سوۋغات ئەۋەتىمەن ۋە ئەلچىلەرنىڭ قانداق جاۋاب ئېلىپ كېلىدىغانلىقىغا قارايمەن».‏
35




ئەلچى سۇلەيماننىڭ ھۇزۇرىغا كەلگەندە، سۇلەيمان مۇنداق دېدى: «سىلەر ماڭا ئىقتىسادىي ياردەم قىلماقچىمۇ؟ ئاللاھنىڭ ماڭا بەرگىنى، سىلەرگە بەرگىنىدىن ياخشىدۇر. سوۋغىتىڭلار بىلەن مەن ئەمەس، سىلەر سۆيۈنىسىلەر.‏
36




ئى ئەلچى! ئۇلارنىڭ يېنىغا قايتقىن. ئۇلار شۇنى بىلىپ قويسۇنكى، بىز ئۇلارنىڭ ئۈستىگە ئۇلار تاقابىل تۇرالمايدىغان قوشۇنلار بىلەن كېلىمىز، ئۇلارنى يۇرتلىرىدىن خار ۋە بوينى پۈكۈك ھالدا چىقىرىۋېتىمىز».‏
37




سۇلەيمان: «ئى دۆلەت ئەركانلىرى! ئۇلار تەسلىم بولۇپ يېنىمغا كېلىشتىن بۇرۇن قايسىڭلار ئۇ ئايالنىڭ تەختىنى ھۇزۇرۇمغا ئېلىپ كېلىسىلەر؟» دېدى.‏
38




جىنلاردىن يامان بىرى: «مەن ئۇنى سەن ئورنۇڭدىن تۇرغۇچە ھۇزۇرۇڭغا ئېلىپ كېلىمەن. بۇنىڭغا كۈچۈم يېتىدۇ، ئۇنى زايە قىلماستىن ساق-سالامەت ئېلىپ كېلەلەيدىغان ئىشەنچلىك بىرىمەن» دېدى.‏
39




كىتابتىن ئىلمى بولغان زات: «مەن ئۇنى سەن كۆزۈڭنى يۇمۇپ ئاچقۇچە ئېلىپ كېلىمەن» دېدى. سۇلەيمان ئۇ ئاندا تەختنىڭ يېنىدا تۇرغانلىقىنى كۆرۈپ مۇنداق دېدى: «بۇ رەببىمنىڭ پەزلىدىندۇر. رەببىم ماڭا ئۇنى شۈكۈر قىلامدىمەن ياكى تۇزكورلۇق قىلامدىمەن، مېنى سىناش ئۈچۈن ئاتا قىلدى. كىم شۈكۈر قىلسا ئۆزى ئۈچۈن شۈكۈر قىلىدۇ، كىم تۇزكورلۇق قىلسا بىلسۇنكى رەببىم بىھاجەتتۇر، سېخىيدۇر».‏
40




سۇلەيمان يەنە: «ئۇنىڭ تەختىنى ئۆزگەرتىڭلار. تونۇيالامدۇ، تونۇيالمامدۇ؟ قارايلى» دېدى.‏
41




مەلىكە كەلگەندە: «سېنىڭ تەختىڭ مۇشۇنداقمۇ؟» دېيىلدى. ئۇ: «بەئەينى شۇ! بىز بۇنىڭدىن ئىلگىرى كۈچۈڭلارنىڭ نېمىلەرگە يېتىدىغانلىقىدىن ۋاقىپلانغان ئىدۇق ۋە تەسلىم بولدۇق» دېدى.‏
42




مەلىكىنى، ئاللاھنى قويۇپ چوقۇنغان نەرسىلىرى ئازدۇرغان ئىدى. چۈنكى ئۇ كافىر قەۋمدىن ئىدى.‏
43




ئۇنىڭغا: «سارايغا كىرگىن» دېيىلدى. ئۇ ساراينى كۆرۈپ، چوڭقۇر سۇ دەپ ئويلىدى ۋە ئىككى پاچىقىنى ئاچتى. سۇلەيمان: «بۇ ئەينەكتىن ياسالغان سارايدۇر» دېدى. ئۇ: «رەببىم! مەن ئۆزۈمگە زۇلۇم قىلدىم. مەن سۇلەيمان بىلەن بىرلىكتە ئالەملەرنىڭ رەببى ئاللاھقا تەسلىم بولدۇم» دېدى.‏
44




بىز سەمۇد قەۋمىگە قېرىندىشى سالىھنى «ئاللاھقا قۇللۇق قىلىڭلار» دېسۇن دەپ ئەلچى قىلىپ ئەۋەتتۇق. لېكىن ئۇلار بىردىنلا ئىككى پىرقىگە ئايرىلىپ بىر-بىرى بىلەن جېدەللىشىشكە باشلىدى. ‏
45




سالىھ مۇنداق دېدى: «ئى قەۋمىم! نېمىشقا ياخشىلىقنى قويۇپ يامانلىققا ئالدىرايسىلەر؟ نېمىشقا رەھمەتكە ئېرىشىش ئۈمىدى بىلەن ئاللاھتىن مەغپىرەت تىلىمەيسىلەر؟».‏
46




ئۇلار: «سەن ۋە تەرەپدارلىرىڭ بىزگە شۇملۇق ئېلىپ كەلدىڭلار» دېدى. سالىھ: «شۇملۇقۇڭلارنى ئاللاھتىن بىلىڭلار. بەلكى سىلەر سىناق قىلىنىۋاتقان قەۋمسىلەر» دېدى.‏
47




شەھەردە توققۇز گۇرۇھ بار ئىدى. ئۇلار زېمىندا بۇزغۇنچىلىق قىلاتتى، ئىسلاھ قىلمايتتى.‏
48




ئۇلار ئاللاھ بىلەن قەسەم قىلىشىپ تۇرۇپ مۇنداق دېدى: «بىز بىر كېچىدە سالىھنىڭ ئۆيىگە بېسىپ كىرىپ، ئۆزىنى ۋە ئائىلىسىنى ئۆلتۈرەيلى، ئاندىن ئۇنىڭ ۋەلىيسىگە ‹ئۇنىڭ ئائىلىسىنىڭ ئۆلتۈرۈلۈشىدىن خەۋىرىمىز يوق. بىز ھەقىقەتەن راست سۆزلەۋاتىمىز› دەيلى».‏
49




ئۇلار پىلان تۈزدى. بىزمۇ بىر پىلان تۈزۈپ ئەمەلگە ئاشۇردۇق. ئۇلار تۇيماي قالدى.‏
50




قارىغىنا! ئۇلارنىڭ پىلانىنىڭ ئاقىۋىتى قانداق بولدى؟ بىز ئۇلارنى ۋە ئۇلارنىڭ قەۋمىنى پۈتۈنلەي ھالاك قىلدۇق.‏
51




ئەنە شۇلار ئۇلارنىڭ، زالىملىقلىرى تۈپەيلىدىن خارابىگە ئايلانغان ئۆيلىرى. بۇنىڭدا بىلىدىغان قەۋم ئۈچۈن چوقۇم ئايەت بار.‏
52




بىز ئىمان ئېيتقان ۋە تەقۋادار بولغانلارنى قۇتقۇزدۇق.‏
53




بىز لۇتنىمۇ ئەلچى قىلىپ ئەۋەتتۇق. ئۇ ئۆز ۋاقتىدا قەۋمىگە مۇنداق دېگەن ئىدى: «سىلەر بىلىپ تۇرۇپ قەبىھ ئىشنى قىلامسىلەر؟
54




سىلەر ئاياللىرىڭلارنى قويۇپ، شەھۋەت ئۈچۈن ئەرلەر بىلەن بىر يەردە بولۇۋاتىسىلەر، شۇنداققۇ! دېمەك، سىلەر جاھىللىق قىلىۋاتقان قەۋمسىلەر».‏
55




قەۋمىنىڭ لۇتقا بىردىنبىر جاۋابى شۇ بولدى: «لۇتنىڭ ئائىلە-تاۋابىئاتلىرىنى يۇرتۇڭلاردىن چىقىرىۋېتىڭلار. چۈنكى ئۇلار ئۆزىنى پاك تۇتۇشقا بەك ھېرىس ئىنسانلاردۇر![1]».‏
56




شۇنىڭ بىلەن بىز لۇتنى ۋە ئائىلىسىنى قۇتقۇزدۇق، ئايالى بۇنىڭدىن مۇستەسنا. ئۇنىڭ ئارقىدا قېلىپ ھالاك بولغۇچىلاردىن بولۇشىنى ئالدىن بېكىتتۇق.‏
57




بىز ئۇلارنىڭ ئۈستىگە بىر تۈرلۈك يامغۇر ياغدۇردۇق. ئاگاھلاندۇرۇلغان ئۇ كىشىلەرنىڭ ئۈستىگە ياغدۇرۇلغان يامغۇر نېمىدېگەن يامان!‏
58




ئى مۇھەممەد! ئېيتقىنكى: «ئاللاھقا ھەمدۇسانالار بولسۇن، ئاللاھنىڭ ئەلچىلىككە تاللىغان بەندىلىرىگە سالام بولسۇن! ئاللاھ ياخشىمۇ، ياكى مۇشرىكلار ئاللاھقا شېرىك قىلغان نەرسىلەرمۇ؟
59




ئۇ نەرسىلەر ياخشىمۇ؟ ياكى ئاسمانلارنى ۋە زېمىننى ياراتقان، سىلەرگە ئاسماندىن سۇ چۈشۈرۈپ بەرگەن زات ياخشىمۇ؟ بىز ئۇ سۇ بىلەن سىلەر بىر تال دەرىخىنىمۇ يېتىشتۈرەلمەيدىغان گۈزەل باغلارنى يېتىشتۈردۇق. ئاللاھ بىلەن بىرلىكتە باشقا ئىلاھ بارمۇ؟ بەلكى ئۇلار ھەقتىن يىراقلىشىپ كەتكەن قەۋمدۇر.‏
60




ئۇ نەرسىلەر ياخشىمۇ؟ ياكى زېمىننى ياشاشقا لايىق قىلغان، زېمىننىڭ ئىچىدە دەريالار بار قىلغان، زېمىن ئۈچۈن مۇستەھكەم تاغلار ئورناتقان ۋە ئىككى دېڭىز ئارىسىدا توسۇق قويغان زات ياخشىمۇ؟ ئاللاھ بىلەن بىرلىكتە باشقا ئىلاھ بارمۇ؟ بەلكى ئۇلارنىڭ تولىسى بىلمەيدۇ.‏
61




ئۇ نەرسىلەر ياخشىمۇ؟ ياكى بېشىغا ئېغىرچىلىق كەلگەن كىشى دۇئا قىلسا دۇئاسىنى ئىجابەت قىلىپ، ئۇنىڭ بېشىغا كەلگەن ئېغىرچىلىقنى كۆتۈرۈۋېتىدىغان ۋە سىلەرنى زېمىننىڭ ئورۇنباسارلىرى قىلغان زات ياخشىمۇ؟ ئاللاھ بىلەن بىرلىكتە باشقا ئىلاھ بارمۇ؟ بەكمۇ ئاز ئويلىنىسىلەر!‏
62




ئۇ نەرسىلەر ياخشىمۇ؟ ياكى قۇرۇقلۇقنىڭ ۋە دېڭىزنىڭ قاراڭغۇلۇقلىرىدا سىلەرگە يول كۆرسىتىپ بېرىدىغان، شاماللارنى رەھمىتىنىڭ ئالدىدا خۇش خەۋەرچى قىلىپ ئەۋەتىدىغان زات ياخشىمۇ؟ ئاللاھ بىلەن بىرلىكتە باشقا ئىلاھ بارمۇ؟ ئاللاھ مۇشرىكلارنىڭ شېرىك قىلغان نەرسىلىرىدىن ئۈستۈندۇر.‏
63




ئۇ نەرسىلەر ياخشىمۇ؟ ياكى يارىتىشنى دەسلەپتە ئەمەلىيلەشتۈرىدىغان، ئاندىن كېيىن ئۇنى تەكرارلايدىغان، سىلەرگە ئاسماندىن ۋە زېمىندىن رىزىق بېرىدىغان زات ياخشىمۇ؟ ئاللاھ بىلەن بىرلىكتە باشقا ئىلاھ بارمۇ؟» ئېيتقىنكى: «ئەگەر راستچىل بولساڭلار دەلىلىڭلارنى كەلتۈرۈڭلار».‏
64




ئېيتقىنكى: «غەيبنى ئاسمانلاردىكى ۋە زېمىندىكى كىشىلەردىن ھېچكىم بىلمەيدۇ، غەيبنى پەقەتلا ئاللاھ بىلىدۇ». ئۇلار قاچان تىرىلدۈرۈلىدىغانلىقىنى تۇيمايدۇ.‏
65




بەلكى ئۇلارنىڭ ئاخىرەت توغرىسىدىكى ئىلمى يېتەرلىك ئەمەس، بەلكى ئۇلار ئاخىرەت توغرىسىدا گۇماندىدۇر، بەلكى ئۇلار ئاخىرەت توغرىسىدا كوردۇر.‏
66




كافىرلار مۇنداق دېدى: «بىز ۋە ئاتا-بوۋىلىرىمىز ئۆلۈپ توپىغا ئايلىنىپ كەتكەندىن كېيىن قايتا تىرىلدۈرۈلۈپ قەبرىمىزدىن چىقىرىلامدۇق؟‏
67




بىزگە سېلىنغان بۇ تەھدىت، بۇرۇن ئاتا-بوۋىلىرىمىزغىمۇ سېلىنغان ئىدى. بۇ قەدىمكىلەرنىڭ ئەپسانىلىرى، خالاس!».‏
68




ئېيتقىنكى: «يەر يۈزىدە سەير قىلىپ، گۇناھكارلارنىڭ ئاقىۋىتىنىڭ قانداق بولغانلىقىنى كۆزىتىڭلار!».‏
69




ئۇلارغا قايغۇرمىغىن، ئۇلارنىڭ ھىيلە-مىكىرلىرىدىن ئىچىڭنى پۇشۇرمىغىن!‏
70




ئۇلار: «ئەگەر راستچىل بولساڭلار، بۇ ۋەدە قاچان ئەمەلگە ئاشىدۇ؟» دەيدۇ.‏
71




ئېيتقىنكى: «سىلەر تېز كېلىشىنى تەلەپ قىلغان ئازابنىڭ ئۈستۈڭلارغا كېلىشى يېقىندۇر».‏
72




سېنىڭ رەببىڭ ئىنسانلارغا ئىلتىپات قىلغۇچىدۇر. لېكىن ئۇلارنىڭ تولىسى شۈكۈر قىلمايدۇ.‏
73




سېنىڭ رەببىڭ ئۇلارنىڭ دىللىرى مەخپىي ساقلىغان نەرسىلەرنى ۋە ئۇلار ئاشكارا قىلغان نەرسىلەرنى بىلىپ تۇرىدۇ.‏
74




ئاسمان-زېمىندا روشەن كىتابتا بولمىغان ھېچقانداق مەخپىي نەرسە يوق.‏
75




بۇ قۇرئان ئىسرائىل ئەۋلادىغا، ئىختىلاپ قىلىشقان نەرسىلىرىنىڭ تولىسىنى بايان قىلىپ بېرىدۇ.‏
76




شۈبھىسىزكى، ئۇ قۇرئان مۇئمىنلارغا ھىدايەت ۋە رەھمەتتۇر.‏
77




رەببىڭ ئۇلارنىڭ ئارىسىدا ئۆز ھۆكمى بىلەن ھۆكۈم قىلىدۇ. ئۇ ئەزىزدۇر، بىلگۈچىدۇر.‏
78




ئۇ ھالدا ئاللاھقا تەۋەككۇل قىلغىن، چۈنكى سەن روشەن ھەق ئۈستىدىسەن.‏
79




سەن ئۆلۈكلەرگە ئاڭلىتالمايسەن، ئارقىسىنى قىلىپ كەتكەن گاسلارغىمۇ دەۋەتنى ئاڭلىتالمايسەن.‏
80




سەن كورلارنى گۇمراھلىقلىرىدىن قۇتقۇزالمايسەن. سەن پەقەت ئايەتلىرىمىزگە ئىشىنىپ تەسلىم بولغانلارغىلا ئاڭلىتالايسەن.‏
81




ئېيتىلغان سۆز ئۇلارنىڭ باشلىرىغا كەلگەندە، ئۇلارغا زېمىندىن بىر جانلىق چىقىرىمىز. جانلىق ئۇلارغا، ئىنسانلارنىڭ ئايەتلىرىمىزگە ھەقىقىي ئىشەنمىگەنلىكىنى سۆزلەيدۇ.‏
82




ئۇ كۈنى بىز ھەر ئۇممەتنىڭ ئىچىدىن ئايەتلىرىمىزنى يالغان دېگۈچىلەردىن بىر جامائە چىقىرىمىز. ئاندىن ئۇلار ھېساب مەيدانىغا ئىنتىزاملىق ھالدا ئېلىپ مېڭىلىدۇ.‏
83




ئۇلار مېڭىپ، تاكى ھېساب مەيدانىغا كەلگەندە، ئاللاھ ئۇلارغا: «سىلەر مېنىڭ ئايەتلىرىمنى تولۇق بىلمەي تۇرۇپ يالغان دېدىڭلارمۇ؟ ياكى قىلغىنىڭلار نېمە ئىدى؟» دەيدۇ.‏
84




ئېيتىلغان سۆز ئۇلارنىڭ باشلىرىغا كەلدى، چۈنكى ئۇلار زۇلۇم قىلغان ئىدى. بۇندىن ئېتىبارەن ئۇلار سۆز قىلالمايدۇ.‏
85




ئۇلار بىزنىڭ كېچىنى راھەتلەندۈرگۈچى، كۈندۈزنى كۆرسەتكۈچى قىلغانلىقىمىزنى كۆرمەمدۇ؟ شۈبھىسىزكى، بۇنىڭدا ئىشىنىدىغان قەۋم ئۈچۈن ئايەتلەر بار.‏
86




سۈر چېلىنغان كۈنى ئاسمانلاردىكى ۋە زېمىندىكى كىشىلەرنى قاتتىق قورقۇنچ باسىدۇ. ئاللاھ خالىغانلار بۇنىڭدىن مۇستەسنا. ھەممىسى ئاللاھنىڭ ھۇزۇرىغا بويۇن ئەگكەن ھالدا كېلىدۇ.‏
87




سەن تاغلارنى كۆرۈپ، ئۇلارنى ئورنىدا مۇقىم تۇرۇۋاتىدۇ دەپ ئويلايسەن. ھالبۇكى، ئۇلار بۇلۇت ئۆتكەندەك ئۆتۈپ كېتىدۇ. بۇ ھەر نەرسىنى پۇختا قىلغان ئاللاھنىڭ قىلغان ئىشىدۇر. ئاللاھ قىلمىشىڭلاردىن خەۋەرداردۇر.‏
88




كىم ياخشىلىقنى ئېلىپ كېلىدىكەن، ئۇ تېخىمۇ ياخشىسىغا ئېرىشىدۇ ۋە ئۇ كۈنى ھېچ قورقمايدۇ.‏
89




كىم يامانلىقنى ئېلىپ كېلىدىكەن، ئۇلار يۈزلىرى بىلەن دوزاخقا تاشلىنىدۇ. ئۇلارغا: «پەقەت ئۆز قىلمىشىڭلار بىلەنلا جازالاندۇرۇلىسىلەر ئەمەسمۇ!» دېيىلىدۇ.‏
90




ئى مۇھەممەد! ئېيتقىنكى: «مەن بۇ شەھەرنىڭ رەببىگە ئىبادەت قىلىشقا بۇيرۇلدۇم. ئۇ، بۇ شەھەرنى ھۆرمەتلىك قىلغان زاتتۇر. ھەر نەرسە ئۇنىڭدۇر. مەن مۇسۇلمانلاردىن بولۇشقا بۇيرۇلدۇم.‏
91




مەن يەنە قۇرئاننى تىلاۋەت قىلىشقا بۇيرۇلدۇم. كىم ھىدايەت تاپسا ئۆزى ئۈچۈن ھىدايەت تاپىدۇ. كىم ئېزىپ كەتسە ئېيتقىنكى: ‹مەن ئاگاھلاندۇرغۇچىلاردىنمەن›».‏
92




ئى مۇھەممەد! ئېيتقىنكى: «ئاللاھقا ھەمدۇسانالار بولسۇن. ئاللاھ سىلەرگە يېقىندا ئايەتلىرىنى كۆرسىتىدۇ، سىلەر ئۇ ئايەتلەرنى تونۇيسىلەر». رەببىڭ قىلمىشىڭلاردىن غاپىل ئەمەستۇر.‏
93




Quran Uyghur Translation - www.uyquran.com - قۇرئان كەرىم ئۇيغۇرچە ئىزاھلىق تەرجىمىسى تور بىكىتى