ئۇيغۇرچە قۇرئان كەرىم توربىكىتى logo

بِسْمِ اللهِ الرَّحْمٰنِ الرَّحِيمِ‎

67- سۈرە مۇلك مەككەدە نازىل بولغان، 30 ئايەت

پادىشاھلىق قولىدا بولغان زات نېمىدېگەن ئۇلۇغ! ئۇ ھەر نەرسىگە قادىردۇر. ‏
1




ئۇ قايسىڭلارنىڭ ئەمىلىنىڭ ئەڭ ياخشى ئىكەنلىكىنى سىناش ئۈچۈن ئۆلۈمنى ۋە ھاياتلىقنى ياراتقان زاتتۇر. ئۇ ئەزىزدۇر، مەغپىرەت قىلغۇچىدۇر. ‏‎  ‎
2




ئۇ يەتتە ئاسماننى بىر-بىرىگە ماس قىلىپ ياراتقان زاتتۇر. رەھماننىڭ يارىتىشىدا ھېچ تەرتىپسىزلىك كۆرمەيسەن. قاراپ باققىن، بىرەر يوچۇق كۆرەمسەن؟
3




ئاندىن تەكرار-تەكرار قاراپ باقىن، كۆزۈڭ ساڭا ئۈمىدسىز ۋە تالغان ھالدا قايتىدۇ.‏
4




بىز زېمىنغا ئەڭ يېقىن ئاسماننى چىراغلار بىلەن زىننەتلىدۇق، ئۇلارنى شەيتانلارغا ئېتىلىدىغان نەرسىلەر قىلدۇق، ئۇ شەيتانلارغا يالقۇنلۇق ئوتنىڭ ئازابىنى تەييارلىدۇق.‏
5




رەببىگە كافىر بولغانلارغا جەھەننەم ئازابى بار. ئۇ نېمىدېگەن يامان جاي!‏
6




ئۇلار ئۇنىڭغا تاشلانغاندا ئۇنىڭ قايناپ چىقارغان خىرتىلدىشىنى ئاڭلايدۇ.‏
7




ئۇ ئاچچىقىدىن پارچىلىنىپ كەتكىلى تاس قالىدۇ. قاچانىكى ئۇنىڭغا بىر گۇرۇھ تاشلانسا، ئۇنىڭ مەسئۇللىرى ئۇلاردىن: «سىلەرگە ئاگاھلاندۇرغۇچى كەلمىگەنمۇ؟» دەپ سورايدۇ.‏
8




ئۇلار: «ھەئە، بىزگە ئەلۋەتتە ئاگاھلاندۇرغۇچى كەلگەن، لېكىن بىز يالغانچى دېگەن ۋە ئاللاھ ھېچ نەرسە نازىل قىلمىدى، سىلەر بۈيۈك ئازغۇنلۇق ئىچىدىسىلەر دېگەن» دەيدۇ.‏
9




ئۇلار يەنە: «ئەگەر قۇلاق سالغان بولساق ياكى ئەقلىمىزنى ئىشلەتكەن بولساق، يالقۇنلۇق ئوتنىڭ ئەھلى قاتارىدا بولماسكەنمىز» دەيدۇ.‏
10




دېمەك، ئۇلار گۇناھىنى مانا مۇشۇنداق ئېتىراپ قىلىدۇ. يوقالسۇن يالقۇنلۇق ئوتنىڭ ئەھلى!‏
11




شۈبھىسىزكى، رەببىنى كۆرمەي تۇرۇپ، ئۇنىڭدىن ئەيمىنىدىغانلارغا كەلسەك، ئۇلار مەغپىرەت ۋە بۈيۈك ئەجىر بار.‏
12




سۆزۈڭلارنى يوشۇرۇن قىلىڭلار ياكى ئاشكارا قىلىڭلار ئاللاھقا ئوخشاشتۇر[1]، چۈنكى ئاللاھ دىللاردىكىنى بىلگۈچىدۇر.‏
13




ياراتقان زات بىلمەمدۇ؟ ئۇ پۈتۈن ئىنچىكىلىكلەرنى بىلگۈچى ۋە ھەر نەرسىدىن خەۋەردار بولۇپ تۇرغۇچى زات تۇرسا!‏
14




ئۇ شۇنداق زاتكى، زېمىننى سىلەرگە كۆنۈك ئۇلاغقا ئوخشاش قىلىپ بەردى. ئۇ ھالدا زېمىننىڭ ئۈستىدە مېڭىڭلار ۋە ئۇ زات بەرگەن رىزىقتىن يەڭلار، قايتا تىرىلدۈرۈلۈپ ئۇنىڭ ھۇزۇرىغا قايتۇرۇلىسىلەر.‏
15




ئاسماندىكى زاتنىڭ سىلەرنى يەرگە يۇتقۇزۇۋېتىشىدىن خاتىرجەم بولالامسىلەر؟ ئۇ چاغدا يەر بىردىنلا قاتتىق تەۋرەيدۇ.‏
16




ياكى ئاسماندىكى زاتنىڭ ئۈستۈڭلارغا تاش ياغدۇرۇشىدىن خاتىرجەم بولالامسىلەر؟ ئاگاھلاندۇرۇشۇمنىڭ قانداق ئىكەنلىكىنى يېقىندا بىلىسىلەر.‏
17




بۇلاردىن ئىلگىرىكىلەرمۇ راستنى يالغان دېگەن ئىدى. ئۇلارغا كۆرسەتكەن قارشىلىقىم قانداق بولدى؟
18




ئۇلار ئۇچارقاناتلارغا قارىمامدۇ؟ ئۇچارقاناتلار ئۇلارنىڭ ئۈستىدە قاناتلىرىنى يايغان ھالەتتە تۇرىدۇ ۋە قاناتلىرىنى يىغىدۇ. ئۇلارنى ھاۋادا رەھماندىن باشقىسى تۇتمايدۇ. شۈبھىسىزكى، ئۇ ھەر نەرسىنى كۆرۈپ تۇرغۇچىدۇر.‏
19




رەھماندىن باشقا سىلەرگە ياردەم بېرىدىغان قوشۇنۇڭلار كىمدۇر؟ كافىرلار ئالدىنىپ تۇرماقتىدۇر.‏
20




ئەگەر رەھمان بېرىۋاتقان رىزقىنى توختاتسا سىلەرگە كىم رىزىق بېرىدۇ؟ بەلكى ئۇلار بويۇنتاۋلىق قىلىشتا ۋە ھەقتىن ئۈركۈشتە ئەزۋەيلىدى.‏
21




دۈم چۈشۈپ ئۆمىلەپ ماڭىدىغان كىشىنىڭ يولى بەكرەك توغرىمۇ ياكى توغرا يولدا تۈز ماڭىدىغان كىشىنىڭمۇ؟
22




ئېيتقىنكى: «ئۇ سىلەرنى ياراتقان، سىلەر ئۈچۈن ئاڭلاش قابىلىيىتى، كۆرۈش قابىلىيىتى ۋە دىللارنى بار قىلغان زاتتۇر. بەكمۇ ئاز شۈكۈر قىلىسىلەر!».‏
23




ئېيتقىنكى: «ئۇ سىلەرنى كۆپەيتىپ زېمىنغا تارقاتقان زاتتۇر. ئاخىرىدا ئۇنىڭ ھۇزۇرىغا توپلىنىسىلەر».‏
24




ئۇلار: «ئەگەر راستچىل بولساڭلار، بۇ ۋەدە قاچان ئەمەلگە ئاشىدۇ؟» دەيدۇ.‏
25




ئېيتقىنكى: «ئۇنىڭ قاچان ئەمەلگە ئېشىشىنى پەقەتلا ئاللاھ بىلىدۇ. مەن پەقەت ئاشكارا ئاگاھلاندۇرغۇچىمەن».‏
26




ئۇلار ئۇنىڭ يېقىنلاشقانلىقىنى كۆرگەن چاغدا يۈزلىرى سەتلىشىپ كېتىدۇ، ئۇلارغا: «ئەنە شۇ سىلەر تەلەپ قىلغان نەرسىدۇر» دېيىلىدۇ.‏
27




ئېيتقىنكى: ئېيتىپ بېقىڭلارچۇ! ئەگەر ئاللاھ مېنى ۋە مەن بىلەن بىر يولدىكى كىشىلەرنى ھالاك قىلسا ياكى بىزگە مەرھەمەت قىلسا، كافىرلارنى ئەلەملىك ئازابتىن كىم قۇتۇلدۇرىدۇ؟‏
28




ئېيتقىنكى: «ئۇ رەھماندۇر. بىز ئۇنىڭغا ئىمان ئېيتتۇق، ئۇنىڭغىلا تەۋەككۇل قىلدۇق. كىمنىڭ ئاشكارا ئازغۇنلۇقتا ئىكەنلىكىنى يېقىندا بىلىسىلەر».‏
29




ئېىتقىنكى: «ئېيتىپ بېقىڭلارچۇ! ئەگەر سۈيۈڭلار سېڭىپ كەتسە، سىلەرگە كىم ئېقىن سۇ كەلتۈرۈپ بېرىدۇ؟».‏
30




Quran Uyghur Translation - www.uyquran.com - قۇرئان كەرىم ئۇيغۇرچە ئىزاھلىق تەرجىمىسى تور بىكىتى