ئۇيغۇرچە قۇرئان كەرىم توربىكىتى logo

بِسْمِ اللهِ الرَّحْمٰنِ الرَّحِيمِ‎

73- سۈرە مۇززەممىل مەككەدە نازىل بولغان، 20 ئايەت

ئى يۆگىنىۋالغۇچى[1]!‏
1




كېچىنىڭ ئاز بىر قىسمىدىن باشقىسىدا ئورنۇڭدىن تۇرغىن،‏
2




يەنى كېچىنىڭ يېرىمىدا ياكى يېرىمىدىن ئازراقىدا‏
3




ياكى يېرىمىدىن كۆپرەكىدە ئورنۇڭدىن تۇرغىن، قۇرئاننى تەرتىل قىلغىن[2].‏
4




شۈبھىسىزكى، بىز ساڭا يېقىندا ئېغىر سۆز چۈشۈرىمىز.‏
5




شۈبھىسىزكى، كېچىنىڭ ئىبادىتى ئەڭ تەسىرلىك، قىرائىتى ئەڭ توغرىدۇر.‏
6




شۈبھىسىزكى، سەن ئۈچۈن كۈندۈزدە ئۇزۇن ئۈزۈش بار[3]. ‏
7




رەببىڭنىڭ ئىسمىنى زىكىر قىلغىن ۋە ئۇنىڭغىلا يۆنەلگىن.‏
8




ئۇ مەشرىق ۋە مەغرىبنىڭ رەببىدۇر، ئۇنىڭدىن باشقا ھېچ ئىلاھ يوقتۇر، ئۇنى ئۆزۈڭگە ۋەكىل قىلىۋالغىن.‏
9




مۇشرىكلارنىڭ سۆزلىرىگە سەۋر قىلغىن، ئۇلارنى چىرايلىقچە تەرك ئەتكىن.‏
10




راستنى يالغان دېگۈچى دۆلەتمەنلەرنى ماڭا قويۇۋەتكىن، ئۇلارغا بىرئاز مۆھلەت بەرگىن.‏
11




شۈبھىسىزكى، بىزنىڭ يېنىمىزدا ئېغىر ئىشكەللەر ۋە دوزاخ بار،‏
12




گالغا تۇرۇپ قالىدىغان تائام ۋە ئەلەم بېرىدىغان ئازاب بار.‏
13




كۈن كېلىدۇ، زېمىن ۋە تاغلار قاتتىق تەۋرەيدۇ، تاغلار قۇيۇلۇپ تۇرىدىغان قۇم دۆۋىلىرىگە ئايلىنىدۇ.‏
14




شۈبھىسىزكى، بىز سىلەرگە، بۇرۇن فىرئەۋنگە ئەلچى ئەۋەتكىنىمىزدەك زىيىنىڭلارغا گۇۋاھلىق بېرىدىغان ئەلچى ئەۋەتتۇق.‏
15




فىرئەۋن ئەلچىمىزگە ئاسىيلىق قىلدى. شۇنىڭ ئۈچۈن بىز ئۇنى قاتتىق جازالىدۇق.‏
16




ئى مۇشرىكلار! ئەگەر كۇفرىلىقتا چىڭ تۇرساڭلار، بالىلارنىڭ چاچلىرىنى ئاقارتىۋېتىدىغان كۈننىڭ ئازابىدىن قانداق ساقلىنىسىلەر؟‏
17




ئاسمان ئۇ كۈننىڭ دەھشىتىدىن يېرىلىپ كېتىدۇ. ئاللاھنىڭ ۋەدىسى چوقۇم ئەمەلگە ئاشىدۇ.‏
18




شۈبھىسىزكى، بۇ ئەسلىتىشتۇر. خالىغان كىشى رەببىگە يەتكۈزىدىغان يولنى تۇتسۇن.‏
19




ئى مۇھەممەد! رەببىڭ بىلىپ تۇرىدۇكى، سەن كېچىنىڭ ئۈچتىن ئىككىسىگە يېقىن قىسمىدا، كېچىنىڭ يېرىمىدا، كېچىنىڭ ئۈچتىن بىرىدە ئورنۇڭدىن تۇرۇۋاتىسىەن. سەن بىلەن بىللە بولغانلاردىن بىر جامائەمۇ شۇنداق قىلىۋاتىدۇ. كېچە بىلەن كۈندۈزنىڭ مىقدارىنى ئاللاھ بەلگىلەيدۇ. ئاللاھ سىلەرنىڭ ئۇنى ھېسابلاپ بولالمايدىغانلىقىڭلارنى بىلىپ سىلەرگە يىنىكلەتتى. بۇنىڭدىن كېيىن قۇرئاندىن سىلەرگە ئاسان بولغان مىقدارنى ئوقۇڭلار. ئاللاھ بىلىپ تۇرىدۇكى، يېقىندا سىلەردىن كېسەل كىشىلەر، ئاللاھنىڭ پەزلىدىن تىلەپ زېمىندا سەپەر قىلىدىغان باشقا كىشىلەر ۋە ئاللاھنىڭ يولىدا ئۇرۇشىدىغان يەنە باشقا كىشىلەرمۇ بولىدۇ. شۇنىڭ ئۈچۈن قۇرئاندىن سىلەرگە ئاسان بولغان مىقدارنى ئوقۇڭلار. نامازنى تولۇق ۋە داۋاملىق ئۆتەڭلار، زاكاتنى بېرىڭلار ۋە ئاللاھقا ياخشى قەرز بېرىڭلار. ئۆزۈڭلار ئۈچۈن ئاخىرەتكە ياخشىلىقتىن نېمە ئەۋەتسەڭلار، ئۇنى ئاللاھنىڭ ھۇزۇرىدا تېخىمۇ ياخشى ۋە مۇكاپاتى ئەڭ بۈيۈك ھالەتتە تاپىسىلەر. ئاللاھتىن مەغپىرەت تىلەڭلار. شۈبھىىسزكى، ئاللاھ مەغپىرەت قىلغۇچىدۇر، كۆپ ئىنئام قىلغۇچىدۇر.‏
20




Quran Uyghur Translation - www.uyquran.com - قۇرئان كەرىم ئۇيغۇرچە ئىزاھلىق تەرجىمىسى تور بىكىتى