ئۇيغۇرچە قۇرئان كەرىم توربىكىتى logo

بِسْمِ اللهِ الرَّحْمٰنِ الرَّحِيمِ‎

76- سۈرە ئىنسان مەدىنەدە نازىل بولغان، 31 ئايەت

ئىنسانغا زاماندىن شۇنداق مۇددەت كەلدىكى، ئۇ چاغدا ئۇ زىكىر قىلىنغۇچى نەرسە ئەمەس ئىدى، شۇنداق ئەمەسمۇ! ‏
1




شۈبھىسىزكى، بىز ئىنساننى ئۇرۇقلانغان ئارىلاشما تۇخۇمدىن ياراتتۇق. ئۇنى سىنايمىز. شۇنىڭ ئۈچۈن ئۇنى ئاڭلىغۇچى ۋە كۆرگۈچى قىلدۇق.‏
2




شۈبھىسىزكى، بىز ئۇنىڭغا يولنى كۆرسەتتۇق. ئۇ يا شۈكۈر قىلغۇچى يا تۇزكورلۇق قىلغۇچى بولىدۇ.‏
3




شۈبھىسىزكى، بىز كافىرلارغا زەنجىرلەرنى، تاقاقلارنى ۋە دوزاخنى تەييارلىدۇق.‏
4




شۈبھىسىزكى، ياخشىلار كافۇر ئارىلاشتۇرۇلغان قەدەھلەردىن ئىچىدۇ.‏
5




ئۇ، ئاللاھنىڭ بەندىلىرى خالىغان يەرلىرىگە ئېقىتىپ ئىچىدىغان بۇلاقتۇر.‏
6




ئۇ بەندىلەر نەزىرلىرىگە[1] ۋاپا قىلىدۇ، يامانلىقى كەڭ تارقىلىدىغان كۈندىن قورقىدۇ،‏
7




تائامنى ئۆزلىرىنىڭ يېگۈسى كېلىپ تۇرسىمۇ مىسكىن، يېتىم ۋە ئەسىرلەرگە يېگۈزىدۇ،‏
8




ئۇلارغا تائام يېگۈزىۋېتىپ مۇنداق دەيدۇ: «شۈبھىسىزكى، بىز سىلەرگە ئاللاھ رىزاسى ئۈچۈن تائام يىگۈزىمىز، سىلەردىن مۇكاپاتمۇ، تەشەككۈرمۇ كۆزلىمەيمىز.‏
9




چۈنكى بىز رەببىمىزنىڭ، تۇتۇق ۋە دەھشەتلىك كۈنىدىن قورقىمىز».‏
10




بۇ سەۋەبتىن ئاللاھ ئۇلارنى ئۇ كۈننىڭ يامانلىقىدىن ساقلىدى، ئۇلارنىڭ يۈزلىرىگە نۇر، دىللىرىغا خۇشاللىق بەردى،
11




ئۇلارنى سەۋر قىلغانلىقلىرى ئۈچۈن جەننەت ۋە يىپەك كىيىملەر بىلەن مۇكاپاتلىدى.‏
12




ئۇلار ئۇ جەننەتتە تەختلەرنىڭ يۆلەنچۈكلىرىگە يۆلۈنۈپ ئولتۇرىدۇ. ئۇلار ئۇ جەننەتتە ئاپتاپمۇ، سوغۇقمۇ كۆرمەيدۇ.‏
13




ئۇلارغا ئۇ جەننەتنىڭ سايىلىرى يېقىن بولىدۇ، مېۋىلىرىنى ئۈزۈش ئاسان قىلىنىدۇ.‏
14




ئۇلارنىڭ ئەتراپىدىن كۈمۈش قاچىلار ۋە پىيالىلەر ئايلاندۇرۇپ تۇرۇلىدۇ. ئۇ پىيالىلەر شېشىلەردىن ياسالغان.‏
15




ئۇ شېشىلەر كۈمۈشتىن ياسالغان. ئۇلار ئۇنى ئۆلچەيدۇ.‏
16




ئۇلار يەنە ئۇ جەننەتتە زەنجەبىل ئارىلاشتۇرۇلغان قەدەھلەر بىلەن سۇغىرىلىدۇ.‏
17




ئۇ جەننەتتە بىر بۇلاق بولۇپ، سەلسەبىل دەپ ئاتىلىدۇ.‏
18




ئۇلارنىڭ ئەتراپىدا بىر خىل تۇرىدىغان بالىلار ئايلىنىپ تۇرىدۇ. سەن ئۇلارنى كۆرگەن چېغىڭدا، ئۇلارنى چېچىلغۇچى مەرۋايىت دەپ ئويلايسەن.‏
19




ئۇ يەردە كۆرسەڭ، نېمەت ۋە بۈيۈك پادىشاھلىق كۆرىسەن.‏
20




ئۇلارنىڭ ئۈستىدە نىپىز ۋە قېلىن يىپەكلەردىن يېشىل كىيىملەر بولىدۇ. ئۇلار كۈمۈش بىلەزۈكلەر بىلەن زىننەتلىنىدۇ. رەببى ئۇلارنى پاك ئىچىملىك بىلەن سۇغىرىدۇ.‏
21




ئۇلارغا مۇنداق دېيىلىدۇ: «مانا بۇ سىلەرنىڭ مۇكاپاتىڭلار ئىدى. مېھنىتىڭلارغا تەشەككۈر ئېيتىلغان ئىدى[2]».‏
22




شۈبھىسىزكى، بىز ساڭا قۇرئاننى نازىل قىلدۇق.‏
23




شۇنىڭ ئۈچۈن رەببىڭنىڭ ھۆكمىگە سەۋر قىلغىن، ئۇلارنىڭ ئىچىدىن ھېچبىر گۇناھكارغا ياكى تۇزكورغا ئىتائەت قىلمىغىن،
24




چۈشتىن ئىلگىرى ۋە كېيىن رەببىڭنىڭ ئىسمىنى زىكىر قىلغىن،‏
25




كېچىنىڭ بىر قىسمىدا ئۇنىڭغا سەجدە قىلغىن، كېچىنىڭ ئۇزۇن بىر قىسمىدا ئۇنىڭغا تەسبىھ ئېيتقىن.‏
26




شۈبھىسىزكى، مۇشرىكلار تېز ئۆتۈپ كەتكۈچىنى[3] ياخشى كۆرىدۇ، ئېغىر كۈننى ئارقىسىدا قويىدۇ.‏
27




بىز ئۇلارنى ياراتتۇق ۋە ئۇلارنىڭ بەدەنلىرىنى مەزمۇت قىلدۇق. خالىغان چېغىمىزدا ئۇلارنى ئوخشاشلىرى بىلەن ئالماشتۇرىمىز.‏
28




شۈبھىسىزكى، بۇ ئەسلىتىشتۇر. خالىغان كىشى رەببىگە يەتكۈزىدىغان يولنى تۇتسۇن.‏
29




سىلەر پەقەت ئاللاھ خالىغاننىلا خالىيالايسىلەر[4]. شۈبھىسىزكى، ئاللاھ بىلگۈچىدۇر، ھېكمەت بىلەن ئىش قىلغۇچىدۇر.‏
30




ئاللاھ خالىغان كىشىنى رەھمىتىگە ئېرىشتۈرىدۇ. زالىملارغا بولسا ئېغىر ئازاب تەييارلىدى.‏
31




Quran Uyghur Translation - www.uyquran.com - قۇرئان كەرىم ئۇيغۇرچە ئىزاھلىق تەرجىمىسى تور بىكىتى