بِسْمِ اللهِ الرَّحْمٰنِ الرَّحِيمِ‎

78-سۈرە نەبەئ مەككەدە نازىل بولغان، 40 ئايەت

مۇشرىكلار بىر–بىرىدىن نېمە توغرۇلۇق سورىشىۋاتىدۇ؟‏
1




بۈيۈك خەۋەر توغرۇلۇق.‏
2




ئۇ شۇنداق خەۋەركى، ئۇلار ئۇنىڭ ھەققىدە ئىختىلاپ قىلىشماقتىدۇر. ‏
3




ئۇنداق ئەمەس[1]، ئۇلار يېقىندا بىلىدۇ.‏
4




ھەرگىزمۇ ئۇنداق ئەمەس، ئۇلار يېقىندا بىلىدۇ.‏
5




بىز زېمىننى تۆشەك قىلمىدۇقمۇ؟
6




تاغلارنى قوزۇق قىلمىدۇقمۇ؟
7




سىلەرنى جۈپ ياراتتۇق‎.‎
8




ئۇيقۇڭلارنى راھەت قىلدۇق‎.‎
9




كېچىنى پەردە قىلدۇق‏‎.‎
10




كۈندۈزنى مەئىشەت ۋاقتى[2] قىلدۇق‏‎.‎
11




ئۈستۈڭلاردا مۇستەھكەم يەتتە ئاسمان بىنا قىلدۇق‎.‎
12




ئىسسىقلىق ۋە نۇر تارقىتىپ تۇرىدىغان چىراق ياراتتۇق.‏
13




سىققۇچىلاردىن[3] شارقىراپ ياغىدىغان سۇ چۈشۈردۇق[4].‏
14




بۇلارنى ئۇنىڭ بىلەن ئاشلىق ۋە ئوت-چۆپلەر چىقىرايلى، ‏
15




دەرەخلىرى گىرەلىشىپ كەتكەن باغلار يېتىشتۈرەيلى دەپ قىلدۇق‎.‎
16




شۈبھىسىزكى، ياخشى-ياماننى ئايرىش كۈنى بەلگىلەنگەن ۋاقىتتۇر.‏
17




ئۇ كۈنى سۇر چېلىنىدۇ. سىلەر توپ–توپ بولۇپ كېلىسىلەر،‏
18




ئاسمان ئېچىلىپ ئىشىكلەر ھالىتىگە كېلىدۇ،
19




تاغلار يۈرۈتۈلۈپ سەراپ[5] بولىدۇ‏‎.‎
20




شۈبھىسىزكى، جەھەننەم كۆزەتكۈچى بولىدۇ،‏
21




ھەددىدىن ئاشقۇچىلارنىڭ بارىدىغان جايى بولىدۇ.‏
22




ئۇلار ئۇ يەردە ئەبەدىي قالىدۇ‏‎.‎
23




ئۇلار ئۇ يەردە بىرەر سۆرۈنلۈكمۇ، بىرەر ئىچىملىكمۇ تېتىمايدۇ‎.‎
24




ئۇلار پەقەت قايناقسۇ ۋە يىرىڭ تېتىيدۇ.‏
25




مۇۋاپىق جازا‏‎!‎
26




چۈنكى ئۇلار ھېساب بېرىشنى ئويلىمايتتى،‏
27




ئايەتلىرىمىزنى يالغان دەيتتى‏‎.‎
28




بىز ھەر نەرسىنى بىر – بىرلەپ يېزىپ قويغان‏‎.‎
29




شۇڭا تېتىڭلار! سىلەرگە ئازابتىن باشقا نەرسە زىيادە قىلمايمىز.‏
30




شۈبھىسىزكى، تەقۋادارلارغا مۇۋەپپەقىيىتىنىڭ مۇكاپاتى بار‏‎:‎
31




باغلار، ئۈزۈملەر،‏
32




بويىغا يەتكەن تەڭتۇش قىزلار
33




ۋە ئىچىملىك بىلەن تولدۇرۇلغان قەدەھلەر‏‎.‎
34




ئۇلار جەننەتتە ھېچقانداق بىھۇدە سۆز ۋە يالغان سۆز ئاڭلىمايدۇ‏‎.‎
35




بۇلار رەببىڭنىڭ مۇكاپاتى ۋە يېتەرلىك ئىنئامىدۇر.‏
36




ئۇ ئاسمانلارنىڭ، زېمىننىڭ ۋە بۇ ئىككىسىنىڭ ئارىسىدىكىلەرنىڭ رەببىدۇر، رەھماندۇر[6]، ئۇنىڭ ھۇزۇرىدا ھېچكىم سۆز ئاچالمايدۇ.‏
37




رۇھ ۋە پەرىشتىلەر سەپ بولۇپ ئۆرە تۇرىدىغان كۈنى ھېچكىم گەپ قىلالمايدۇ. رەھمان رۇخسەت قىلغان ۋە توغرا سۆزلىگەن كىشى مۇستەسنا.‏
38




ئەنە شۇ ھەق كۈندۇر. خالىغان كىشى رەببىگە يەتكۈزىدىغان يولنى تۇتسۇن‏‎.‎
39




شۈبھىسىزكى، بىز سىلەرنى يېقىن ئازابتىن ئاگاھلاندۇردۇق. ئۇ كۈندە كىشى بۇرۇن ئۆزى قىلغان ئىشلىرىنى كۆرىدۇ، كافىر: «كاشكى، تۇپراق بولسامچۇ!»‏‎ ‎دەيدۇ‎.‎
40