ئۇيغۇرچە قۇرئان كەرىم توربىكىتى logo

بِسْمِ اللهِ الرَّحْمٰنِ الرَّحِيمِ‎

83-سۈرە مۇتەففىفىن مەككەدە نازىل بولغان، 36 ئايەت

ئۆلچەمدە ۋە تارازىدا كەم بەرگۈچىلەرنىڭ ھالىغا ۋاي!‏
1




ئۇلار شۇنداق كىشىلەركى، ئىنسانلاردىن ئۆلچەپ ئالغان چاغلىرىدا تولۇق ئالىدۇ،‏
2




ئىنسانلارغا ئۆلچەپ ياكى تارتىپ بەرگەن چاغلىرىدا كەم بېرىدۇ.‏
3




ئۇلار ئۆزلىرىنىڭ قايتا تىرىلدۈرۈلىدىغانلىقىنى ئويلىمامدۇ؟‏
4




بۈيۈك كۈن ئۈچۈن.‏
5




ئۇ كۈندە ئىنسانلار ئالەملەرنىڭ رەببىنىڭ ھۇزۇرىدا ئۆرە تۇرىدۇ.‏
6




ئۇنداق قىلمىسۇن، يامانلارنىڭ كىتابى سىججىندىدۇر.‏
7




سىججىن نېمە، سەن نەدىن بىلىسەن؟‏
8




ئۇ بەلگە قويۇلغۇچى كىتابتۇر.‏
9




ئۇ كۈندە، راستنى يالغان دېگۈچىلەرنىڭ ھالىغا ۋاي!‏
10




ئۇلار جازا ۋە مۇكاپات كۈنىنى يالغان دەيدىغان كىشىلەردۇر.‏
11




ئۇنى ھەددىدىن ئاشقۇچى ۋە گۇناھ قىلغۇچىدىن باشقا ھېچكىم يالغان دېمەيدۇ.‏
12




ئۇنىڭغا ئايەتلىرىمىز تىلاۋەت قىلىنسا، ئۇ: «بۇرۇنقىلارنىڭ ئەپسانىلىرى» دەيدۇ.‏
13




ئۇنداق ئەمەس، بەلكى ئۇلارنىڭ قىلمىشلىرى قەلبلىرىنى داتلاشتۇرۇۋەتكەن.‏
14




ئۇنداق ئەمەس[1]، ئۇلار ئۇ كۈنى رەببىنى كۆرۈشتىن توسۇلۇپ قالغۇچىلاردۇر.‏
15




ئاندىن ئۇلار دوزاخقا كىرىپ كۆيگۈچىلەردۇر.‏
16




ئاندىن: «مانا بۇ، سىلەر يالغان دېگەن نەرسىدۇر» دېيىلىدۇ.‏
17




ئۇنداق ئەمەس[2]، ياخشىلارنىڭ كىتابى ئىللىيۇندىدۇر.‏
18




ئىللىيۇن نېمە، سەن نەدىن بىلىسەن؟‏
19




ئۇ بەلگە قويۇلغۇچى كىتابتۇر.‏
20




ئۇنىڭغا، يېقىنلاشتۇرۇلغانلار گۇۋاھ بولىدۇ.‏
21




شۈبھىسىزكى، ياخشىلار نەئىمدە بولىدۇ[3].‏
22




ئۇلار تەختلەرنىڭ ئۈستىدە قارايدۇ.‏
23




ئۇلارنىڭ يۈزلىرىدە نېمەتنىڭ گۈزەللىكىنى تونۇيسەن.‏
24




ئۇلار ئاغزى پېچەتلەنگەن ساپ ئىچىملىك بىلەن سۇغىرىلىدۇ.‏
25




ئۇنىڭ ئاخىرى ئىپاردۇر. بەسلەشكۈچىلەر ئەنە شۇنىڭ ئۈچۈن بەسلەشسۇن.‏
26




ئۇ ئىچىملىكنىڭ ئارىلاشمىسى تەسنىمدىندۇر.‏
27




تەسنىم يېقىنلاشتۇرۇلغانلار[4] ئىچىدىغان بۇلاقتۇر.‏
28




شۈبھىسىزكى، گۇناھكارلار مۇئمىنلارنى مەسخىرە قىلىپ كۈلەتتى،‏
29




ئۇلارنىڭ يانلىرىدىن ئۆتكەن چاغلىرىدا ئۆزئارا كۆز قىسىشاتتى،‏
30




ئەھلىنىڭ يېنىغا قايتقان چاغلىرىدا ئۇلارنىڭ غەيۋىتىنى قىلىپ كۆڭۈل ئېچىشقان ھالدا قايتاتتى،‏
31




ئۇلارنى كۆرگەن چاغلىرىدا: «ئەنە شۇلار، چوقۇم ئازغۇنلاردۇر» دەيتتى.‏
32




ھالبۇكى، ئۇلار مۇئمىنلارغا كۆزەتچى قىلىپ ئەۋەتىلمىگەن.‏
33




بۈگۈن مۇئمىنلار كافىرلارنى مەسخىرە قىلىپ كۈلىدۇ.‏
34




ئۇلار تەختلەرنىڭ ئۈستىدە قارايدۇ.‏
35




كافىرلارغا قىلمىشلىرىنىڭ جازاسى بېرىلدىمۇ؟
36




Quran Uyghur Translation - www.uyquran.com - قۇرئان كەرىم ئۇيغۇرچە ئىزاھلىق تەرجىمىسى تور بىكىتى